《我係窮郵差，專門幫陰陽相隔嘅親人送信》（書局上架中）: 151

即使自殺事件接二連三，全城人心惶惶，但旺角仍然人來人往、熱鬧繁盛，畢竟再痛苦，人都係要娛樂，甚至因為好痛苦，所以人先更需要娛樂。
 
 
遊戲機店、戲院同時鐘酒店等等生意都好咗好多，喺不安之中，大家都講及時行樂。
 
 
不過街道上係少咗好多連群結隊嘅學生閒逛，因為教育局同家長都好緊張，對學生嘅監管嚴厲唔少，有啲要求佢哋放學要即刻返屋企，以致大部分嘅學生放學後都留咗喺屋企。
 
 
街上面得返嘅，都係一對對嘅情侶多。


 
 
只不過，街上仍然不時有一兩個人會無啦啦認得我。
 
 
「喂！佢⋯⋯佢⋯⋯」一對情侶望一望電話再盯住我話：「係咪就係嗰個累死人嘅郵差？」
 
 
「好似係⋯⋯」
 


 
我焗住要即刻加快腳步同戴返口罩，心裡面好冤枉。
 
 
點解我明明乜都無做過，但點解會落得咁樣嘅收場。
 
 
曾經想自殺嗰個學生，就住喺旺角嘅一座唐樓上面。
 
 


臨上樓前，嗰對情侶仲喺度打緊電話，希望唔會有事。
 
 
上到單位，禁鐘之後，開門嘅係一個女人，應該係學生嘅媽咪，佢掩門而問：「你係邊個？」
 
 
「你好呀，我係生果日報嘅記者，關於先前嘅自殺，想訪問下你個仔。」我正想行入去時，嗰個女人話：「生果？前幾日唔係已經畀你哋訪問咗啦咩？」
 
 
「呃⋯⋯」我完全唔知點應佢，眼見佢就要關門之時，忽然王胤瀅出現，用手頂住門，開口講：
 
 
「⋯⋯係呀，但因為總編對嗰份稿仍然有啲問題，所以就派我哋嚟改一改。」
 
 


我有啲驚奇佢嘅出現，佢只係向我單單眼。
 
 
「會照有稿費㗎。」
 
 
學生媽咪仲半信半疑之際，王胤瀅乘亂而上，推門而入：「唔會阻你好耐㗎。」
 
 
「喂喂⋯⋯」
 
 
一入到廳，我哋就見到有一個後生仔坐咗喺客廳，望住一張相。
 
 


佢應該就係自殺未遂嗰個學生，李繁生。
 
 
「李同學你好。」
 
 
佢一見到我哋，走都走唔切咁竄入房間，關埋房門。
 
 
「李同學⋯⋯我唔係壞人嚟㗎。」
 
 
「我唔想再畀你哋當精神病啦。」佢隔住對門大叫。