《我係窮郵差，專門幫陰陽相隔嘅親人送信》（書局上架中）: 153

 
當我哋離開佢哋屋企時，王胤瀅嘅眼仍然好紅，我遞上一張紙巾畀佢。
 
 
今次佢接收咗。
 
 
「妳⋯⋯點解會嚟嘅？」
 
 


佢用紙巾抹抹眼淚後話：「唔知係咪天意，咁啱喺街到見到你，咪跟你上嚟囉。」
 
 
「我嘅意思係⋯⋯妳唔嬲我啦咩？」
 
 
「我唔想咁蠢，因為一啲未確定嘅事，而放棄相信一個好朋友。」
 
 
當我覺得有啲感動嘅時候，佢卻又開口講：「同埋無我，你根本入唔到去啦。」


 
 
「好啦，所謂嘅感動已經無晒。」
 
 
「你下一步諗住點？」
 
 
「下一步，我打算要去陰間一趟。」
 


 
我打算同王湚瀅解釋返我點遇返細妹，同阿龍嘅事時，點知四周圍閃光不斷，有一群記者圍過嚟問：「南門先生，你對日前流言蜚語話你累死好多人自殺，有咩睇法？」
 
 
「點解要有哩個部門存在？仲要對公眾隱暪？」
 
 
「你覺唔覺兩個世界唔應該有聯絡？有無諗過令好多人懷念親人而死？你有無諗過後果？定份工緊要？」
 
 
 
又嚟⋯⋯
 
 
真係好頭痛。


 
逼到完全透唔到氣，我唔知點做好時，好彩王胤瀅捉住我隻手話：「走啦！」然後帶住我跑，先逃脫到班人。
 
 
我哋去到旺角嘅一間食米線出名嘅食店，哩度人流唔算多，但職員卻更加少，個個都無嚟神氣。
 
 
「凍咖啡呀唔該⋯⋯兩杯。」
 
 
「你咁樣遲早糖尿病。」王胤瀅語氣好似鬧我咁。
 
 
「我諗我都係早死嘅人。」我衝口而出講。
 


 
「點解？」
 
 
「無⋯⋯我只係講下啫。」
 
 
「你啱啱講到一半，話係阿龍推你，到底點解？」
 
 
「我都未係好知成件事係點，阿龍淨係話佢好羨慕我⋯⋯」我自己都講到一頭霧水，都唔知佢聽唔聽得明白。
 
 
我再補充：「暫時我淨係知道⋯⋯當初就係我帶咗我媽咪同細妹落去陰間，最後連累佢哋⋯⋯無咗個身體。」
 


 
細妹同媽咪如無意外，應該係被欺騙，幫人代贖還孽。
 
 
一諗到哩度，個心就隱隱作痛。
 
 
究竟有無方法救到佢哋？
 
 
好內疚連累家人，同時⋯⋯佟蓳萓佢嘅出賣⋯⋯而家個腦仲係一片空白。
 
 
「我只係唔明白，點解佢要一直喺陰間避開我。」我話。
 


 
王胤瀅話：「你咁都唔明白？」
 
 
「吓？」
 
 
 
「你而家咁苦痛嘅樣咪已經表明一切，你屋企人咁明白你。」
 
 
王胤瀅拍拍我肩膀，幫我打氣話：「加油！你得嘅！」
 
 
哩個鼓勵有啲窩心。
 
 
「妳都係⋯⋯」
 
 
佢啱啱先經歷父親母親離世，但佢嘅反應好似已經好返好多。
 
 
「究竟嗰個男人係邊個呢⋯⋯點解要故意搵哩班人⋯⋯」我托頭問。
 
 
王胤瀅眼神變得閃閃縮縮，有啲心不在焉。
 
 
一路食米線嘅時候，佢都問非所答，講嘢九唔搭八咁。
 
 
「妳做咩呀？唔舒服？」
 
 
「唔係⋯⋯」佢低頭望住碗食完嘅米線。
 
 
「妳咁奇怪嘅。」
 
 
「我⋯⋯可能知道點解佢哋哩班人有咩共通點。」
 
 
「有咩共通點？」我好奇地問。
 
 
「哩層⋯⋯我未完全肯定，當我查到之後再同你講。」王胤瀅好堅定咁講，我都唔好意思再追問落去。
 
 
「你今次去，打算點查？」
 
 
「我都係想搵到底點解會發生哩啲事，我諗唯一可以解釋嘅，就係記錄晒哩一切嘅書。」
 
 
「書？」
 
 
「生死簿。」
 
 
陰間嘅保安其實從來唔森嚴，唔森嚴嘅意思係，佢哋主要針對嘅都只係喺陰間還孽嘅人，畢竟哩度少外人嚟。
 
 
加上守衛哩種恐怖但呆頭呆腦嘅生物，對熟路嘅我嚟講，要偷偷竄入陰間嘅政府大樓都唔係啲難事。