《我係窮郵差，專門幫陰陽相隔嘅親人送信》（書局上架中）: 150

 
「唔緊要，只不過真係風聲太緊⋯⋯我經過長時間嘅思考，作出以下嘅決定⋯⋯」
 
 
「你介唔介意呢一段時間停薪留職先呢？到呢件事丟淡嘅時候，返嚟都未遲。你接唔接受呢個安排？」
 
「但⋯⋯但⋯⋯一旦我停職嘅話，就無人會再送信去陰間㗎啦啵⋯⋯」
 
 
「哩一層，我哋都冇辦法。」


 
 
「對唔住，我實在接受唔到。」我好誠懇咁講。
 
 
「我已經講咗話可以啦，你唔洗擔心哩樣。」
 
 
「明白但哩樣嘢真係做唔到，如果停止嘅話，實在有違前輩嘅願望。」
 


 
「你最好諗清楚，難道你睇唔到出面好多人因為死咗嘅親人而自殺咩，我係唔會畀你咁做。」
 
 
企喺房門前，我諗唔到有啲咩阻止我，我好相信我做緊嘅嘢。
 
 
我背住佢話：「我會照做。」
 
 


「你仲未累夠人自殺？」
 
 
「我唔覺得係關送信事。」
 
 
「即係你唔聽命令？」
 
 
「恕難從命。」
 
 
「咁好可惜，南門亮，由於嚴重犯錯嘅關係，哩一刻開始，你已經再唔係郵局嘅職員。」
 
 


佢指住門口，話：「請。」
 
 
臨走前，我問：「局長⋯⋯其實哩個係咪你最想見到嘅結果？」
 
 
佢無答我。
 
 
當走出房間時，娟姐正正就拎住茶正正喺門口企住。
 
 
佢嘅眼神已經表明佢聽到晒。
 
 


我對佢苦笑一下，佢問我：「咁你而家打算點呀？」
 
 
「我都唔知⋯⋯但諗住點都要搵到啲人自殺嘅原因，佢哋無可能無啦啦見得返以前嘅親人。當中一定有啲原因。」我望住手中嘅報紙講。
 
 
娟姐嘅臉容都係好似好擔心我。
 
 
「你真係要小心呀，局長一定會阻止你咁樣做，因為哩樣都關乎郵局嘅聲譽。」
 
 
「多謝妳呀娟姐。」到咗哩一刻，佢都係咁關心我，搞到我真係有啲感動。
 
 


「咁你會由邊度入手？」
 
 
「新聞報道話哩個人曾經想自殺，但咁啱屋企人經過救返佢，我諗我第一步係會搵佢先。」
 
 
我舉起手中嘅報紙，報紙上係一個四眼學生嘅樣。