《我係窮郵差，專門幫陰陽相隔嘅親人送信》（書局上架中）: 149

 
 
所以第二日一朝早，我戴住口罩返郵政局。
 
 
一入去郵政局入邊，所有同事都望住我，有好多唔同類型嘅目光，我完全唔想去猜測。
 
 
唯獨娟姐一個走過來，同我講：「無事呀嘛？」
 


 
「無呀，娟姐你有心啦。」突然覺得鼻哥有啲酸。
 
 
「其實我返嚟都係同局長交代成件事。」
 
 
「佢今日係度啊，你快啲入去啦。」
 
 


當我入到去局長間房嘅時候，佢正坐喺度，呷咗一口咖啡。
 
 
第一句就問我：「洗唔洗要一杯？」
 
 
「我唔使啦⋯⋯我自己有。」講完，就由口袋裏面拎咗一罐咖啡出嚟。
 
 
佢微微笑咁點點頭：「相信你都知發生咩事啦，琴日我哋接到好多投訴，全部都係指向你一個人，上面高官都有問過我哩件事。佢哋好重視今次嘅事件。」


 
 
「對唔住，我就係想同你解釋番⋯⋯其實我真係乜嘢都唔知，唔知點解個檔案會流出去。」
 
 
局長企起身，望一望身邊嘅盆栽，然後話：「我當然相信你啦，你係大叔揀選返嚟嘅人，我當然相信。我亦都係咁樣向上面交代。而嗰個點解會流出，我一定會徹查清楚。」佢轉身返嚟對住我講：「只不過⋯⋯你知道今次嘅事牽涉好大，上頭唔滿意我嘅解釋。」
 
 
「真係好對唔住，要你難做。」我鞠躬向佢道歉。