《我係窮郵差，專門幫陰陽相隔嘅親人送信》（書局上架中）: 138

 
 
「我想同妳過多啲。」我拔出地上嘅吹動緊嘅雜草話：「我對現實真係無乜興趣⋯⋯我同現實嘅人根本溝通唔到⋯⋯佢哋唔似妳哋⋯⋯」
 
 
一個人嘅日子。
 
 
一個人返學、食飯、上堂。
 


 
分組⋯⋯
 
 
講嘅話題格格不入。
 
 
現實⋯⋯究竟有咩意義？
 
 


佟蓳萓只係含笑咁話：「賣口乖都無用㗎啵。」
 
 
「我係想同妳過多啲。」
 
 
「嗯，好啦好啦，咁我叫埋阿龍過嚟。」
 
 
佟蓳萓想企喺身之際，我拉住咗佢隻手，佢錯愕咁回頭。


 
 
「唔係⋯⋯」
 
 
佢疑惑咁望住我。
 
 
喺哩一刻，風靜默、草止舞，我深呼吸話：「我係話哩一刻⋯⋯淨係想同妳過。」
 
 
 
 
 
「我諗⋯⋯哩啲一切一切你都全部唔記得晒，係咪？」阿龍話。


 
 
佢嘅眼神⋯⋯好似正係望緊我嘅心臟。
 
 
「到底⋯⋯」
 
 
「你知唔知，有時我真係羨慕你，又有親人⋯⋯又有朋友⋯⋯又有愛人⋯⋯你就好。」
 
 
「你就好⋯⋯」
 
 
「你就好⋯⋯」


 
 
哩句喺我腦海徘徊，刺痛不已。
 
 
究竟點解咁熟？
 
 
眼前嘅阿龍⋯⋯又同記憶中嘅阿龍身影重疊。
 
 
「你就好⋯⋯」
 
 
我正拖住佟蓳萓嘅手返去，阿龍見到我哋，就講咗哩句。