《我係窮郵差，專門幫陰陽相隔嘅親人送信》（書局上架中）: 137

 
說話之間，佢已經拔足狂奔，暴跳攀爬上樹。
 
 
我心裏暗叫不妙，立即跳落樹枝，借力到地。
 
 
但佢追得好貼。
 
 


「喂喂喂！」
 
 
我幾乎用盡力量去跑，但仍然感覺好似下一秒就會畀佢捉住咁，後身嘅背都有種毛毛嘅感覺。
 
 
「嘩⋯⋯嘩⋯⋯」
 
 
前面係一個小狹谷，高萬丈深，跌落去就死硬。


 
 
但有危就有機。
 
 
我唔知哪來嘅勇氣，真係痴咗線，一嘢跳過去，落地嗰下自己都覺得自己好彩。
 
 
應該安全啦掛，無人會咁癲。
 


 
下一秒，阿龍已經撲咗過嚟。


 
「捉到你了。」
 
 
「阿龍你真係好勁。」
 
 
我哋三個玩完之後，攤咗喺草地上，哩個時候我都忍唔住要讚下阿龍，佢實在太勁。
 
 
「我一出世就無屋企人，無人照顧，係靠自己先生存到。」佢淡淡然咁講：「你就好，一出世有爸爸媽媽。」


 
 
「陰間都要講生存㗎咩？」我問。
 
 
「阿龍唔係一出世就喺度，佢係幾歲之後先嚟，畀佢爸爸媽媽⋯⋯」
 
 
「都係唔好講嗰兩個拋棄人嘅父母，我有你哋咪得，你哋唔會拋棄我嘛。」阿龍笑住咁講。
 
 
自此，我哋成為好朋友，成日都會一齊去玩，過住快樂嘅時光。
 
 
哩段時光，三角形嘅平衡，畀某啲嘢打破咗。


 
 
「生日快樂，南門亮。」佟蓳萓同我講：「但正日你唔係應該同屋企人過㗎咩？」
 
 
風不停咁吹動地上嘅幼草，幼草喺夕陽下搖晃自己嘅身軀，左擺右搖，好似跳舞咁。
 
 
我諗返起啱啱先發完媽咪同阿妹脾氣，媽咪我唔擔心，細妹⋯⋯佢應該而家嬲住咁食緊我個蛋糕。
 
 
「我同妳哋過咪一樣。」
 
 
「但陪屋企人好似重要啲啵。」