《我係窮郵差，專門幫陰陽相隔嘅親人送信》（書局上架中）: 132

 
爸爸滿意一笑。
 
 
「但Maggie咁勁，性格又咁男仔，會唔會好難搵男朋友啊。」
 
 
「我都唔知佢⋯⋯」
 
 


「女仔邊洗咁快拍拖啊，讀大學先啦。」Maggie嘅大佬幫口。
 
 
只係望住Maggie喺場上面耀舞嘅英姿，爸爸有啲擔心
 
「點解你仲未有男朋友嘅？」
 
 
呢個問題由高中一直問到大學畢業，Maggie始終都答唔到屋企人。
 


 
嗰日，Maggie嘅爸爸啱啱參加完反對訂立性傾向歧視法嘅遊行，返到屋企見Maggie無所事事咁攤喺梳化，又追問佢呢個問題。
 
 
「你性格又唔係唔好，樣又唔係話真係差，點會冇男朋友啊。」
 
 
「冇男仔鍾意我掛。」
 
 


「荒謬啦，你又唔係嗰啲乜鬼同性戀，你又靚又叻，點會冇男朋友。」
 
 
「你大佬又係嘅，一直都搵唔到女朋友，都唔知你哋兩兄妹究竟搞啲乜嘢。」
 
 
終於Maggie嘅爸爸忍唔住要幫佢同佢大佬搞相親。
 
 
不過相親咗好耐，都冇好結果。
 
 
唔係呢個唔啱，嗰個太有錢，就呢個睇唔順眼。
 
 


爸爸冇放棄過，直到有一日，佢地兩兄妹同時宣布要結婚。