《我係窮郵差，專門幫陰陽相隔嘅親人送信》（書局上架中）: 133

 
估唔到一嚟就雙喜臨門。
 
 
「好囉，你哋結婚，咁我有孫可以玩下啦。」
 
 
只是一直都無孫，哩樣嘢好不解，直到佢死後都唔明白。
 
 


「對唔住啊爸爸，我哋一直都瞞住你。
 
 
原來同屋企人講大話，守住一個秘密，一講唔講得嘅秘密，真係好辛苦。
 
 
爸爸，其實我係同性戀。
 
 
我同哥哥都係同性戀。


 
 
兩對新人，一場婚禮，雙囍臨門。
 
 
Maggie嘅父母大概係今日最開心嘅人。
 
 
「你是否願意⋯⋯」
 


 
當證婚人宣讀誓詞時，Maggie微笑咁講我願意。
 
 
「我用最真誠的喜樂，與你共赴新的生命⋯⋯」
 
 
只係好少人留意到，新娘子嘅目光真正注視嘅，並唔係新郎，而係新郎身後、企喺Maggie大佬身後嘅「新娘」。
 
 
「因此，在我們一生中，無論遭遇什麼，我願意對你承諾，我將成為你順服、忠心的妻子。」
 
 
我願意。
 


 
Maggie流出眼淚，講咗最後一句誓詞。
 
 
「感動呀感動呀，新娘子太鍾意新郎！」
 
 
場內嘅人都起哄，為哩對幸福嘅新人送上祝福。
 
 
 
原來講大話，仲要對至親嘅人講大話，真係好攰，今日佢終於感受到謊言嗰一種沉重。
 
 
「爸爸，


 
 
曾經無數次，深夜嘅時候喺你房門徘徊踱步。
 
 
但我始終都無勇氣行入去，特別當你激動不已咁對住電視鬧嗰啲人時，
 
 
好多次，我都想開口同你講，其實你個女就係你口中鬧緊嘅人。
 
 
收藏一個秘密，好辛苦。特別當我知道，大佬都同我一樣時，我更加無法想像，你知道哩個消息之後會點樣。
 
 
你中風嘅畫面一直都出現喺我眼前，歷歷在目，我實在唔想你有第二次。


 
 
『不如⋯⋯我哋結婚，完阿爸一個心願。』」我同阿哥講。
 
 
就咁樣，一場荒謬嘅婚禮就展開。
 
 
記得嗰日你笑得好開心，咁樣我就覺得足夠。
 
 
「如果暪⋯⋯你覺得可以暪幾耐？」阿哥嗰晚問我。
 
 
「我希望⋯⋯一世。」


 
 
直到有人同我講，「一世」其實唔係「一世」。
 
 
人死，並唔係如燈滅，仲要去下一站。
 
 
我好怕，將來再見到你，你會怪我，怪我從來都無同你講過。越遲，傷害越大，所以我先下決心，寫哩封信同你講⋯⋯
 
 
對唔住，爸爸，我真係唔係你諗咁。
 
 
你會唔會⋯⋯明白我？
 
 
你「不正常」的女兒上」
 
 
隔咗陣，我已經聽到Maggie爸爸將封信撕爛嘅聲音。