《我係窮郵差，專門幫陰陽相隔嘅親人送信》（書局上架中）: 121

 
娟姐拎住報紙，托住眼鏡，好詳細咁閱讀：「今次仲要係好平均，唔單只係學生，仲有老人家、成年人全部都有份。」
 
 
就好似背後有個人謀殺緊佢哋咁樣。
 
 
呢個時候，我嘅電話又響，係王胤瀅嘅信息。
 
 


「喂，我哋今晚七點旺角等。」
 
 
大概有一段好長嘅時間我都無出旺角玩，今次嚟到，覺得旺角已經今非昔比。
 
 
以前嘅旺角係會令人好想行街，有好多唔同類型嘅小店，例如美甲舖、零食舖、卡舖，依家得返啲大型連鎖店同埋藥店，仲要條街勁多人喺度唱歌，嘈到拆天，又有好多自由行。
 
 
得兩種感受，一個係逼，另一個係嘈。


 
 
「啊啊啊啊，對不起！」
 
 
啱啱行出地鐵站我隻腳已經畀人踩咗十幾次。
 
 
我哋約咗喺朗豪坊嘅戲院等，佢好早已經嚟度等，可能因為見到我成個樣好似畀人蹂躪完咁，就好奇問：
 


 
「做咩你個樣咁慘嘅？」
 
 
「我痛死咗⋯⋯」
 
 
佢笑住咁聽完我講返之後，就話：「咁我哋去其他地方囉。」