《我係窮郵差，專門幫陰陽相隔嘅親人送信》（書局上架中）: 122

 
 結果我哋又轉咗去中環。
 
 
黃色、紅色、藍色嘅燈光係我哋中間遊走，燈光不時曬落喺我哋中間，海風吹送，散步喺海邊令人好不舒服。
 
 
「細個一直想一家人玩摩天輪。」王胤瀅望住摩天輪講。
 
 


「妳同妳爸爸佢哋仲未好返咩？」
 
 
「唔想見到佢哋住。」
 
 
去到哩一刻我都唔知點樣講嘢。
 
 
摩天輪貴到瞓喺度，我大概要食半個月麵包。


 
 
最後我都係鼓起勇氣話：「咁我哋上去玩啦。」
 
 
「吓？」
 
 
佢仲呆下呆下，我已經帶咗佢上摩天輪。
 


 
老實講，喺上面睇個景又唔係真係話好好，但志在個氣氛。
 
 
佢成個細路囡咁望住窗外，又睇得幾開心。
 
 
「我哋影張相啦。」
 
 
「我唔影相㗎啵。」我話。
 
 
「咁而家就影第一張啦。」佢拎起手機，我哋就自拍咗一張相。
 


 
「好好保存啦，我好少影相，話唔定哩張係我最後一張相。」
 
 
「亂講嘢啦你。」
 
 
「講下笑都唔畀。」
 
 
「我覺得，你係一個好朋友⋯⋯無咗你哩個朋友⋯⋯會好傷心。」
 
 
聽到哩度，唔知點解，真心有啲感動。
 


 
「何況⋯⋯你仲答應過我，會帶我去見母親㗎嘛，你都未做到，唔畀死。」
 
 
 
佢最後嗰句唔畀死真係有啲搞笑。
 
 
話咁快摩天輪就轉完，我哋從摩天輪返翻落地面。