《我係窮郵差，專門幫陰陽相隔嘅親人送信》（書局上架中）: 107

 
「Sorry⋯⋯我係嚟見工⋯⋯」
 
 
「見工？我哋請夠人啦啵，下年早啲嚟啦。」
 
 
「我係嚟見⋯⋯李生㗎。」
 
 


佢見我係搵李生，口風即刻變咗，臉色蒼白。
 
 
「跟⋯⋯跟我嚟。」
 
 
佢帶住我喺郵局左穿右插，行到勁深入，入去好隱密嘅一間房，係門口敲兩敲，就叫我入去。
 
 
「小心啲啦你。」


 
 
 
佢講咗句意味深遠嘅說話。
 
 
「吓？」
 
 
推門入去，入面係一間全係白色嘅房入面，入面只有大叔


 
 
「呃⋯⋯你好，我叫南門亮，係嚟應徵⋯⋯」
 
 
大叔都未聽完我講嘢，就開始話：「我哋開始面試啦。」
 
 
「吓⋯⋯？喔，好呀。」
 
 
咁直接突然嘅？
 
 
「第一題：踏破鐵鞋無覓處⋯⋯下一句係咩？」


 
 
乜而家考試係考哩啲咁新潮嘅嘢架咩？
 
 
「呃⋯⋯一失足成千古恨 ？」
 
 
「明月幾時有呢？」
 
 
「⋯⋯但見旁人談情何引誘？」
 
 
「日賭夜賭。」


 
 
「⋯⋯光宗耀祖。」
 
 
「壯志飢餐胡虜肉，笑談渴飲匈奴血。」
 
 
「驀然回首，那人卻在燈火闌珊處。」
 
 
「Could you tell us why you' ve been out of work for this long? 」
 
 
「吓？what？」


 
佢好大力咁合埋本薄，雙眼好銳利咁望住我問：「最後一條問題。」
 
 
「係。」
 
 
「你有無見過鬼？我必須事先聲明，如果你有哩方面嘅經驗，我哋請你嘅機會就會大大增加。」
 
 
「我無呀⋯⋯同埋，雖然我哋睇法唔同，但我都想講，哩個世界根本無鬼。」
 
 
「恭喜你，我哋已經決定請你。你幾時可以返工？」
 


 
「吓？咁簡單？」
 
 
「問題一兩條就夠試啦，你中文又唔好，英文又唔得，我哋唔驚你走咗去。而且為人又老實，亦啱晒我哋嘅要求。」
 
 
「⋯⋯」
 
哩個大叔講嘢，唔知點解有種好串嘅感覺，仲要係當臉就嚟。