《我係窮郵差，專門幫陰陽相隔嘅親人送信》（書局上架中）: 108

 
「我想問⋯⋯你究竟係點知⋯⋯我屋企會出事，同埋哩份工可以點幫到我？」
 
 
「跟住呢？」王胤瀅問，意識又返返嚟現實。佢已經一早食完眼前嘅拉麵，飲埋杯凍水。
 
 
「唔知點解，有啲記憶，我就係記唔起，好似斷片咁。」
 
 


「唔緊要，你慢慢記。」
 
 
我哋食完拉麵之後，就行出街度，喺市中心周圍游下逛下。
 
 
好努力咁記返下⋯⋯
 
 
大叔當時只係拎出一個打火機畀我。


 
 
「打火機？」
 
 
「遲啲你就會知道㗎啦。不要問，只要信。」佢咁樣同我講。
 
 
就咁，我就正式開始咗我嘅郵差生活。
 


 
不過，老實講，我都唔知郵差係做咩。
 
 
「其實哩份工係做啲咩？」我主要想問嘅其實係意義。
 
 
「郵差呢，就返八放五，最主要嘅工作就係派信。」
 
 
「咁都幾好。」
 
 
大叔飲咗一啖啤酒，遞過嚟，我推開，指指手中嘅咖啡話：「唔洗啦，我飲哩個得。」
 


 
「不過哩個係正常嘅郵差生活。」
 
 
「你嘅意思係？」
 
 
「我哋係唔正常嘅郵差生活。大概六點之後先開始派信。」