《我係窮郵差，專門幫陰陽相隔嘅親人送信》（書局上架中）: 106

 
「唉，南門亮，你到底喺度做咩呀？」我自己問自己。
 
 
我以為惡夢已完，點知第二日喺海旁，又再見到大叔。
 
 
救命。
 
 


「喂，有無新嘅雞場好介紹。」佢又拎住罐啤酒，臉紅紅咁話。
 
 
真係一個死雞蟲。
 
 
「無呀，你可唔可以唔好再煩我？」
 
 
「咁又唔得啵。」


 
 
「點解呀？」
 
 
「因為你係我未來嘅同事。」
 
 
「同事？」我聽到一頭霧水，完全唔知哩個大叔究竟搞咩。
 


 
「你做咩唔覆我WhatsApp？」
 
 
我有啲不可置信咁問：「你⋯⋯你就係WhatsApp嗰個人？」
 
 
「唔通係你呀？」
 
 
「咁⋯⋯咁你點知，我屋企會出事？」
 
 
大叔呵咗一口氣：「我知道你嘅事，遠比你多啦。」
 


 
「咁我阿媽同細妹到底去咗邊呀？」我激動咁衝上前，捉住佢隻手問。
 
 
佢馬上FING開我隻手話：「哎呀，冷靜啲先啦你。」
 
 
「點解你會知，到底我屋企人去咗邊，求下你講我知啦！」
 
 
佢留低咗一張卡片畀我：「如果你真係做到我同事，我就將所有嘢同你講啦，記住聽日嚟面試著靚啲。」
 
 
上面寫住嘅，就係郵局嘅地址。
 


 
考慮咗幾日，加上無新工叫我見面，無奈之下，我就去咗中環見哩份⋯⋯奇怪嘅工。
 
 
話說我真係好耐都無入過郵局，我都已經唔記得上次嚟係幾時。
 
 
一入到去，排咗一陣隊係一個大嬸見我，當然我嗰時唔知佢就係娟姐啦。