《我係窮郵差，專門幫陰陽相隔嘅親人送信》（書局上架中）: 41

 
我同佢講解咗一陣自己嘅職業後，佢顯然接受能力幾高，我就留咗我工作地址畀佢，如果真係有需要就可以過嚟。
 
 
由於到咗中環站，我就出車，同哩個教授講再見。
 
 
返到郵局無幾耐，娟姐就過嚟同我抱怨：「郵局又CUT人手！有無諗過我哋呀？」
 
 


「無計啦，佢已經第三年蝕錢。」
 
 
喺近幾年嘅郵包數量一直下降，其中一個原因係因為私人市場嘅物流服務做得太好，郵局相對之下就唔太跟得上腳步，即係唔夠人打，所以越嚟越少人用郵局。
 
 
蝕錢，自然就要節流，節流最簡單就係炒人。
 
 
「唉想做死我哋咩，少咗人，又攰死原本嗰班員工。」


 
 
「咁佢唔改革都無辦法嘅。」
 
 
「不過有樣仲奇怪嘅嘢。」娟姐個樣好詭異咁望住我。
 
 
「係乜嘢？」
 


 
「你唔覺近排少咗人㗎咩？」
 
 
「少咗人？」
 
 
「少咗客人嚟見你呀，你話郵包都話啫，但寄信去陰間，正常應該忙到死㗎嘛。」
 
 
娟姐咁樣提起，我的確無乜留意，但又好似如佢咁講，近排無咁忙。
 
 
就喺哩個時候，我收到王胤瀅嘅訊息。
 


 
「點解我會喺屋企嘅？」
 
 
「妳飲醉咗嘛，我咪送妳返屋企囉。」
 
 
「我唔同咗衫嘅！？」
 
 
唉，睇嚟又有排解釋。
 
 
所以⋯⋯我決定都係唔解釋。