《我係窮郵差，專門幫陰陽相隔嘅親人送信》（書局上架中）: 9

聽前輩講過：「仇恨嘅信係最麻煩。」
 
 
喺寧靜、毫無熱鬧氣氛嘅陰間，我向張有成先生遞上一封信。
 
 
「係咩信嚟？」佢點望都唔似親人寫畀佢嘅信，因為有警方嘅蓋印。
 
 
佢左望右望，好似喺度諗緊邊個仔係警察。


 
 
「呃⋯⋯係警方嘅查詢信。」我同佢解釋。
 
 
「查詢信？」
 
 
「佢哋希望你可以協助調查。」
 


 
張有成笑咗一笑話：「我已經死咗啦啵。」
 
 
「我知⋯⋯佢哋就係想知道邊個先係殺害你嘅兇手。」
 
 
哩個時候，我見到張有成嘅臉色一沉再沉。
 
 


事情，又要返去四個鐘前。
 
 
每日嘅早、午晚食飯時間，我都會飲2-3杯咖啡。而非食飯時間，我都會係咁飲咖啡，可以話係啡不離手。
 
 
好多人都話，我遲早糖尿病。
 
 
理得佢呀。
 
 
對於咖啡，我有一份執著，唔Cheap嘅我都唔飲。高級嗰啲，我唔飲，唯獨Starbuts、燕巢嗰啲，就係我嘅至愛。
 
 


通常我儲一個星期食飯錢就可以飲Starbuts.
 
 
至於點儲？就係食飯就帶飯返去。
 
 
正確啲嚟講，係淨係帶飯。
 
 
通常郵局都有好多人同我一樣係帶飯，但問題佢哋係食唔晒啲餸，又或者係畀我嚇到唔敢食。
 
 
例如娟姐今日係食五香肉丁炒飯配肥牛。
 
 


「嘩，娟姐，妳哩排容光煥發咗啵。」
 
 
「係？真係㗎？」
 
 
「不過咁，妳好似肥咗啵⋯⋯」
 
 
「吓！唔係掛⋯⋯」
 
 
「哎呀，如果娟娟瘦返啲真係成個米雪咁。嘩，妳仲食肥牛，肥牛每100G就有200卡路里啦！」
 
 


「吓，咁點算？」
 
 
「無計啦，一係我捱下義氣幫妳食咗佢啦。」
 
 
「阿亮你真係好人！」
 
 
就係咁又過到一餐，儲到錢去買咖啡飲。
 
 
而今日，咖啡店嘅妹妹又再投嚟傾慕嘅眼神。
 
 


我前面嘅型仔鬼佬：「one grande hot caramel machiatto plz, sweetie.」
 
 
佢咁樣講兩講，搞到我都有啲想用英文。
 
 
輪到我嘅時候，我就開口話：「er…er… grand hot camara machine, plz. Er…swee…sweet.」
 
 
「sweet？」
 
 
「⋯⋯一杯碎朱廉拎走唔該。」
 
 
拎住杯咖啡返到郵局嘅時候，娟姐就好緊張咁走過嚟同我講，有兩個警察喺房等緊我。