《我係窮郵差，專門幫陰陽相隔嘅親人送信》（書局上架中）: 10

「協助查案？」我實在唔太理解咁對住眼前哩兩個警察問。
 
 
「係。」一個年紀大啲嘅、大槪四十歲左右已經成頭白髮嘅警察，西裝筆挺叫陳SIR。
 
 
佢坐低一邊擦佢嘅漆皮皮鞋一邊講：「琴日碼頭發生一宗命案，一個六十歲嘅男子溺死係海上。追查下有兩個嫌疑人在場，但雙方都話自己唔係兇手，僵持不下，所以想你哋都幫一幫手。」
 
 
「殺人案關我哋郵局咩事？」我聽唔明，唔係你哋去查㗎咩，唔好同我講郵局有福爾摩斯。


 
 
跟喺陳SIR後面嘅後生便衣警員插嘴話：「我哋就係知道你哩個部門係送信去陰間，所以先想搵你幫手。」
 
 
「唔係掛，現今科學咁昌明，應該好快就可以破案啦，洗乜靠我哋呀。」我一咁講，個後生警員就喺後面點點頭，表示非常之認同咁。
 
 
「哩方面當然我哋都會跟進，只係想多唔同嘅途徑調查。我一直都認為，查案嘅方式可以革新一啲，由死者口中講出真正嘅兇手係邊個，必定準確，係最理想不過。」陳SIR講嘢嘅時候，個後生警員喺後面嘆氣同搖搖頭。
 


 
「但我哋無咁嘅先例，一向都只係受親人委託送信。」


 
「事關人命，你咁都唔幫呀？」後生警員皺眉話。
 
 
「我只係怕開壞咗先例。部門創立嘅原意都唔係畀警察拎嚟查案。」
 


 
後生警員細細聲同陳SIR講：「拿我都話唔方好㗎啦，走啦，反正哩啲嘢信唔過。」
 
 
佢仲壓低聲線：「我都唔知政府入面點解會有一個咁樣嘅部門，好迷信。」
 
 
佢想走，但陳SIR仍然坐喺度，無走嘅意慾。
 
 
「如果我保證只此一次呢？」陳SIR開口講。
 
 
「一次咁多？」
 


 
「以後唔會再打擾你哋，我保證。」陳SIR企起身，伸手呈握手姿態講。
 
 
就咁樣，我就被逼開始跨部門嘅合作，追查哩單案件。
 
 
死者叫張有成，張有成喺物流公司做緊貨車司機，今年六十五歲。其實已經過咗退休年齡，但因為生計問題，依然工作緊。
 
 
只不過已經難咗好多搵食。
 
 
2004年前，香港嘅葵青貨櫃碼頭係全球最繁忙嘅貨櫃港口，吞吐量全球第一，不過其後不斷被中國、新加坡同韓國嘅港口追過，由龍頭跌到得返第六。
 


 
有啲人話加上十號碼頭遲遲未落成，配套失衡，有唔少物流公司都選擇撒出香港，搬去其他地方。
 
 
包括張有成本身做咗幾十年嘅公司。
 
 
無奈之下，佢唯有轉公司，不過退休再加上轉工，自然又畀人壓價，壓價就要跑多幾轉。
 
 
不過有時跑多幾轉都未必可以糊口。
 
 
我同陳SIR佢哋返到警署，然後陳SIR話：「哩個案發現場嘅嫌疑人之一，叫迷叔，係張有成多年嘅同事。」
 


 
迷叔係一個頂住大啤酒肚、地中海嘅肥男人，個樣有少少似周中。
 
 
迷叔聲稱，自己係為咗阻止張有成犯罪，先出現係案發現場。
 
 
「唔通一場朋友，睇住佢破壞法紀，繼續錯落去咩，我就係最睇重法紀嘅人嚟。」迷叔咁講。
 
 
「老張呀⋯⋯佢應該係一時睇唔開，又需要錢，所以咪幫人運毒囉。好搵嘛，又係快錢，但過到自己嘅良心咩？」迷叔一臉可惜咁講：「以前阿張明明係一個好正直嘅人，唉，都係怪政府無能，幫唔到我哋啲物流司機，生活逼人啦。但我哩世人最嫉惡如仇，所以，嗰晚我咪去勸佢，阻止佢囉。」
 
 
據迷叔嘅口供，嗰晚張有成照樣幫人運毒，迷叔尾隨其後，係碼頭上截住咗張有成嘅車。
 


 
「阿迷，你想死呀？」張有成喺車上怒罵迷叔，佢咁樣忽然插車入嚟，差啲變交通意外。
 
 
「你就想死呀老張，仲唔收手？」迷叔落車，語重心長咁講。
 
 
「你講咩呀？」張有成眼神閃避。
 
 
「我講你車後嘅嘢呀！」
 
 
「你畀我做多一轉啦，做多一轉就夠㗎啦。」
 
 
「老張，哩啲係害人嘅嘢呀！」
 
 
迷叔死都唔肯畀佢走，兩個人開始起爭執，迷叔想阻止佢走，唔小心嘅推撞，令張有成個頭受傷流血。
 
 
哩個時候，張有成打電話求救，無幾耐佢個仔——張國贇就嚟到。
 
 
無幾耐，張有成嘅仔，張國贇趕到嚟。
 
 
三人之後混戰得更利害，你爭我奪，迷叔順勢將某啲毒品扔入大海，唔畀佢再害人。
 
 
點知張有成同張國贇都雙雙跳海救毒品，但唔知點解，張有成就咁溺死咗，
 
 
「我驚佢哋追殺我，梗係驚到即刻走啦。佢點死，我點知呀，可能係張國贇想獨吞毒品，就殺咗張有成。」迷叔咁講。
 
 
迷叔嘅口供到哩度。
 
 
聽完之後，陳SIR問我：「你覺得點？」
 
 
「有啲奇怪嘅感覺，但⋯⋯我又講唔到有咩奇怪。」
 
 
「廢話。」年輕警員不屑咁講。
 
 
陳SIR點點頭話：「咁你不如聽埋下一個先。」
 
 
 
我哋再入一間細房，微弱嘅白燈下，見到房間角落坐住一個眼神憔悴、一臉頹廢嘅男人。
 
 
張國贇係一個四十幾歲嘅中學老師，但個樣睇落幾後生，仲有幾分似洪永城。
 
 
「你一早知你爸爸係運毒？」
 
 
張國贇緩慢咁點點頭。
 
 
陳SIR問佢點解唔報警。
 
 
張國贇眼神飄忽咁話：「孔子都話，要為親者諱，佢係我爸爸，無理由䧟害自己親父。再加上⋯⋯爸爸係一個好正直嘅人，唔係為生計⋯⋯佢根本唔會咁做。」
 
 
「咁案發時，到底係點樣？」
 
 
嗰日，張國贇收到佢爸爸嘅電話，話遇到困難，要佢去碼頭。
 
 
張國贇話聽爸爸講，迷叔以前都係運毒嘅成員，只係誠信唔好，好耐已經無搵佢出貨。所以迷叔一直都好眼紅張有成。
 
 
當日，迷叔就係想搶張有成啲貨，張國贇就馬上趕到現場幫手。
 
 
當佢趕到，就見到張有成個頭受咗傷流緊血，佢當然好憤怒，一嘢衝去打迷叔，想為佢爸爸出氣。
 
 
「打我？我就獨吞晒你哋所有嘅貨！」迷叔咁講。
 
 
三人喺漆黑無人嘅碼頭混戰期間，迷叔突然兇狠咁一腳將張有成踢落海，張國贇好緊張咁衝落海想救張有成時，迷叔纏住佢唔放。
 
 
「我爸爸呀，救我爸爸！」
 
 
「就唔畀你去！」
 
 
到張國贇真正落到海救人時，一切都已經太遲，而迷叔亦都已經揸住車走咗。
 
 
而啲毒品亦沉咗落海底，搵唔返。
 
 
「成件事就係咁。」
 
 
陳SIR問我：「哩個你覺得點？」
 
 
「更加奇怪，都唔知佢邊個講嘅嘢先係真。兩個版本咁。」我聽到頭到大埋。
 
 
「正常，所以就要請你幫手，麻煩你⋯⋯『落去』搵張有成，我哋想知道佢嘅口供係點，真相到底係點。」
 
 
「嗯，我明白。」
 
 
「你幾耐可以⋯⋯？一日？」
 
 
我笑住咁話：「畀張床我就可以。」