《我係窮郵差，專門幫陰陽相隔嘅親人送信》（書局上架中）: 8

陰間有好多唔同嘅區域，分成大孽區、小孽區、靈薄區。
 
 
越近黃泉就係大孽區，畀啲生前犯咗重孽嘅人住。生前無咩犯事嘅，就會住喺小孽區。
 
 
穿過陰間嘅大街小巷時，唔知點解有種畀人監視嘅感覺。
 
 
望一望後面，有一個黑影正喺度跟住我。


 
 
雖然唔知係咩事，但唔方好事。
 
 
我開始加緊腳步，轉幾個彎再望後，發現係一個著黑裙嘅身影。
 
 
奇怪⋯⋯
 


 
之後我就無咗畀人跟蹤嘅感覺，然後喺小孽區一間小木屋搵到Crystal嘅大佬，張文生。
 
 
張文生木屋旁有塊OK大嘅田。
 
 
「我係嚟自人間嘅郵差，受你嘅親人委託，嚟送信畀陰間嘅你。」
 
 


「我嚟咗哩度咁耐，都唔知人間會有送信服務。」
 
 
「因為要有親人送信，哩度嘅人先會收到。」
 
 
 
「係你個妹寄畀你嘅信。」
 
 
佢有啲不可相信咁講：「無可能架啵⋯⋯我個妹⋯⋯」
 
 
「哩封信⋯⋯我唔想收。」
 


 
我遞出嘅信件懸係半空。
 
 
「唔想收？」
 
 
「我個妹⋯⋯無可能寄信畀我⋯⋯」
 
 
「點解會咁講？」
 
 
「因為我個妹已經死咗⋯⋯同我一齊死咗。」
 


 
「死咗⋯⋯？」我開始有啲混亂。佢繼續講：「我阿妹係同我一齊畀車撞！係一齊呀！死咗啦！」
 
 
佢轉身，背脊不斷咁抖動。
 
 
「哩封信⋯⋯對唔住，我⋯⋯唔太想收。」
 
 
佢講完哩句就返咗入屋，得返我一個留喺出面。
 
 
我⋯⋯我真係未試過有客人唔收信，睇佢個樣又好嬲咁⋯⋯
 


 
可以點做？
 
 
「你仲未走？」張文生打開門出嚟。
 
 
我喺張文生嘅門口坐咗一個鐘左右，飲咗10罐咖啡，就咁望住啲綠油油嘅山水，山水雖美，但望得耐都厭，望到成個人都呆晒。
 
 
「我嘅任務係送信，你都未收信，我點會走。」
 
 
「你都係慳返口氣，我係唔會收。」佢拎起鋤頭，轉頭就走向自己嘅田裡。
 


 
「喂⋯⋯」
 
 
都未講完就走咗。
 
 
即係我又要喺度等。
 
 
佢一直喺田裡工作，過咗好耐先返嚟。
 
 
「怕咗你，你走啦好嘛。」
 
 
「我咪講咗，你唔收我唔走。」
 
 
「我唔敢再掂哩個人嘅嘢，我已經以後都無得見我個妹啦！」
 
 
佢同佢個妹雖然都喺陰間，但其實陰間嘅人好難互相聯絡，大家都固定喺自己嘅田地，特別如係住喺唔同地區更難。
 
 
「乜你哋嘅死，都有得怪邊個㗎咩。」
 
 
「我⋯⋯」
 
 
「如果你真係想好好放低，不如勇敢面對哩段關係啦？」
 
 
「張文生，
 
好多謝每一個歲月，你都總會喺我身邊支持我，不離不棄咁照顧我。
 
 
記得我哋第一次相遇、我遮你嘅時候，你好得意，唔敢正眼咁望住我，我問你點解只係話：『妳太靚，唔敢望住妳。』
 
 
我都唔知你係口花定係咩，但我當下覺得你係一個好好嘅人，好和善，諗嘢總係諗咗人哋先。
 
 
如果我鍾意嗰個係你，或者我哋就會好似公主同王子咁，永遠開心幸福落去。
 
 
你第一次同我表白嘅時候，我真係好想講，我好開心。但同時好擔心，我知道你係一個好好嘅人，我最怕就係傷害到你。
 
 
我好怕，我哋嘅友情會被破壞，你會唔再聽我唱歌，唔再聽我講我嘅事，唔再同我一齊坐小巴。
 
 
張文生，你明唔明白，其實太緊張一樣嘢，就會好害怕失去。因為愛情比友情更容易流逝。
 
 
當我一次又一次拒絕你嘅表白嘅時候，每一次其實我都好驚，好驚我哋之間唔再係朋友。
 
 
但你一次又一次留喺我嘅身邊，我分唔清⋯⋯咁到底係好定係唔好。
 
 
「唔緊要呀我。」你總係會咁同我講。
 
 
我哋就好似明明有好大嘅傷口，但貼上咗膠布就當自己好返咁。
 
 
哩個都係我哋大家呃大家嘅方法。
 
 
當馮士林同我表白時，我除咗開心，但之後諗到嘅就係你，最放唔低嘅都係你。
 
 
你嘅眼神，總係充滿住無比嘅溫暖，但又有同淡淡嘅憂傷。
 
 
喺你去英國，走咗之後，你個妹喺機場真係走嚟打咗我一拳。
 
 
你個妹一邊喊住咁講返你嘅點點滴滴畀我聽，我睇得出你細妹對你真係好好，同好錫你哩個大佬。
 
 
究竟我有無關顧過你感受，好似真係無，一直以嚟都係你包容我。
 
 
對唔住，係我嘅任性連累你哋⋯⋯對唔住⋯⋯
 
 
一千四百三十七粒星星，我學你咁摺一次。
 
 
然後我發現，原來每摺一粒星星，諗一個人嗰種思念真係好深，我好似能夠體會到你嘅心情。
 
 
張文生，如果我可以愛你，你話幾好呢。
 
 
如果時間可以倒回，我一定會返去阻止當日嘅自己，阻止自己去認識你。
 
 
但時間可以倒退嗎？唔能夠，所以我都係傷害咗你。
 
 
對唔住⋯⋯
 
你的好朋友
唐詩詩上」
 
一千四百三十七粒星星。
 
張文生係我面前，一粒一粒咁拆開後每一粒上面都寫住：「對唔住」、「好掛住你」
 
 
張文生望住唐詩詩摺畀佢嘅星星話：「我曾經以為，為愛情放棄好多野、不停咁付出係一件好美麗嘅事。」
 
 
「但原來唔係，當你為愛情放棄太多嘢時，忽略身邊嘅人，就會變咗係一個好蠢嘅舉動。」
 
 
「我覺得⋯⋯好對唔住細妹，無用時間好好咁關心佢、錫佢。」
 
 
「我覺得你細妹好關心你，如果唔係都唔會記得咁多你嘅野，佢一直都將你放係心入面，好錫你哩個哥哥。」我忽然諗起唐詩詩嘅傷，就話：「仲幫你出頭。」
 
 
「可惜，我哋已經無可能再相見。」
 
 
張文生望住天空，眼睛入面只有夕陽。
 
 
「你後悔？」我問。
 
 
佢將信收返好，然後話：「嗯，我真係覺得後悔。」
 
 
只係最後，我仍然見佢將一粒粒拆開口嘅星星，好好咁保存返，每一粒摺返好。
 
 
 
「哥哥⋯⋯高高。」每當細妹講「高高」，佢嘅意思就係想騎膞馬。
 
 
「好累呀，唔好煩我啦。」我啱啱返到屋企瞓喺梳化，阿媽喺廚房煮緊飯。
 
 
細妹圓碌碌嘅大眼睛開始充滿淚水。
 
 
根據我嘅經驗，佢三秒後就會喊，然後媽咪聽到就會嚟打死我。
 
 
「咪喊啦咪喊啦！騎啦！」
 
 
當佢可以玩「高高」，就開心返晒，好似擁有全世界咁笑。
 
 
佢就開心，無諗過我係幾辛苦。
 
 
「南門亮！今日先生同我講你默書又0分！」
 
 
雖然唔係因為阿妹，但我最終都係接受咗媽咪嘅雞毛掃教訓，不停咁喊。
 
 
細妹唔知做咩，走過嚟然後背住我，蹲低。
 
 
「妳又做咩嘢呀！行開啦唔好煩我！」
 
 
「哥哥，高高，開心返。」
 
 
當我醒返返到現實，離開郵局嘅時候時，見到Crystal⋯⋯唔係⋯⋯係唐詩詩先啱。
 
 
佢喺郵局外面嘅天橋，一個人咁係度等。
 
 
「唐小姐，仲未走？」我行埋去問，佢抬頭見到我，馬上企起身。
 
 
「唔怪得妳咁熟口面，原來妳就係模特兒嚟。」
 
 
佢聽到我叫佢唐小姐，估計到我應該已經知道一切。佢苦笑又鞠躬咁話：「對唔住，我真係唔係有心。因為我知道哩個服務係親人先會幫寄，我都係逼得不已。」
 
 
「算啦。我又唔係警察，唔通拉你咩。」



佢沉思咗一陣後問：「佢⋯⋯睇完封信有咩反應？」
 
 
「佢話，好後悔為咗妳，無好好照顧妹妹。」我如實咁反映畀佢知。
 
 
「但係⋯⋯佢好重視妳送畀佢嘅星星，每一粒都好小心咁摺返入樽。」我交粒星星畀佢。
 
 
佢點點頭，身體開始抖顫，佢低住頭，淚水一滴滴落入地面。
 
 
「對唔住⋯⋯真係對唔住⋯⋯」
 
 
係哩一刻，我都唔知可以做咩，只係靜靜咁喺佢身邊陪住佢，睇住佢默默咁喊。
 
 
今晚嘅中環有啲凍，天氣轉涼，涼風四起。冷清嘅天橋，有一個女仔為咗一段後悔嘅關係，痛哭流淚。
 
 
淚水一滴滴落喺地面，可惜點樣都穿唔透到去陰間。好可惜，水亦無法回流，時光都係。