《我係窮郵差，專門幫陰陽相隔嘅親人送信》（書局上架中）: 7

最鍾意嘅人係明日香，最鍾意嘅動漫係新世紀福音戰士，最鍾意電影係新世紀福音戰士Q，講野細聲無人聽到、少朋友、怕怕醜醜，行路DUM低頭，深度近視。
 
 
基本上毒男有嘅特質，佢都有，甚至更勁，真係毒到出汁。
 
 
「阿妹，我今日去買明日香嘅閃卡，你要唔要？」
 
 
只要有明日香嘅嘢，佢就會笑得好開心，真係毒到打冷震。


 
 
「食屎啦我唔要呀！」
 
 
雖然我咁鬧佢，但佢嗰晚返到嚟，仍然係好開心，但佢唔係同我炫耀明日香嘅閃卡，而係講咗句令我好震驚嘅說話：「我......戀愛啦。」
 
 
「吓？你有女朋友啦！？」我好驚訝咁問。
 


 
竟然有人可以令佢由二次元個世界返返嚟？
 
 
佢目光呆滯咁搖搖頭。
 
 
「有人鍾意你？」
 
 


佢再搖一搖頭，我已經知出事。
 
 
「我遇到我人生嘅天使，明日香。」
 
 
據佢講，係一個落雨嘅早上，啲雨落到好似東華水災咁，但佢無遮，喺哩個時候，好似拍電影咁，有個女仔用聽落去好爽朗嘅聲音問佢：「洗唔洗遮埋你？」
 
 
啊係，講漏毒男最後一個特質：太易動情。
 
 
係這個世界最壞嘅罪名。
 
 


嗰年，佢中三。
 
 
個女仔同佢同級，叫唐詩詩，性格同佢個名完全唔相襯，佢其實好男仔頭，直率開朗，天真活潑。
 
 
佢為咗唐詩詩，日日都會早半個鐘起身，明明自己住荔枝角，九唔搭八搭到去九龍塘，為嘅係同佢搭同一架小巴返學。
 
 
7:35分，準時到達。
 
 
大佬怕醜到死嘅性格，又點會主動同唐詩詩打招呼，所以每次都係唐詩詩主動笑住同佢講野。我諗其實唐詩詩都無乜嘢，只係覺得哩個男仔怕怕醜醜咁，幾可愛。
 
 


「你又咁早嘅。」
 
 
佢每次都係坐喺單人位先，等到唐詩詩笑住say hi之後，佢先敢坐過去唐詩詩隔離個位。
 
 
唐詩詩總會同佢講琴晚睇咗地獄少女邊集；教數學嘅林sir點靚仔；鋼琴李老師點嚴，琴日林老師病咗無返可以轉自修堂。
 
 
bili吧啦bili吧啦。
 
 
佢默默咁聽，佢好享受哩個時間，聽唐詩詩講野嘅時間。
 
 


就咁樣一段時間，每日返學都如常，大佬間唔時行過課室偷望下佢，咁又一日。
 
 
直到聖誕節前夕，唐詩詩講完王老師同陳SIR好似有嘢之後，忽然間問大佬：「你⋯⋯會唔會送聖誕禮物畀我？」
 
 
「吓？」
 
 
大佬當時係唔識得應，直至佢返到屋企問我。
 
 
「細妹細妹，你覺得如果有個女仔問你拎聖誕禮物，代表啲咩？」
 
 


「代表佢想要一份聖誕禮物？」我講完都覺得自己答得好有邏輯。
 
 
「係咪代表佢都重視你？」佢唔放棄咁追問。
 
 
「係掛。」
 
 
我睇到佢嘅眼神，出現好多期望。
 
 
我知道，咁唔係一件好事。
 
 
「咁送咩好？」
 
 
「你自己鍾意咩呀？」
 
 
「送明日香模型畀佢？」
 
...............................
 
 
到嗰日，佢哋係小巴交換咗聖誕禮物，佢開心咗成日，其實只係一本書，佢返到屋企包到佢好似絕種動物，然後鎖入佢個擺動漫公仔櫃入面。
 
 
「我想表白。」當大佬將本書鎖完入櫃之後，佢就咁講。
 
 
「你認真架？」我有啲不安咁問。
 
 
「嗯。」
 
 
嗰日，佢返得好夜。我問佢結果點，佢話佢俾人拒絕咗。
 
 
唐詩詩答佢：「我唔想拍拖住。」
 
 
唔想拍拖住，另一個翻譯叫：「我唔想同你拍拖。」
 
 
我想講，嗰晚我一直訓唔到，因為佢以為佢匿係被入面，就無人聽到佢啲絕泣聲。
 
 
佢喊咗成晚。
 

第二朝，佢帶住通紅嘅眼問我：「妹B呀，女仔......係咪唔鍾意男仔咁......毒。」
 
 
「當然啦，邊個會鍾意成日睇明日香，講野無禮貌，又細聲又唔望住人，又咁怕醜呀！」我連珠炮發，自己講完都覺得有啲過份。
 
 
佢聽完之後，又係低頭咁講：「咁......妳可唔可以幫我脫毒呀？」
 
 
「你捨得你啲公仔咩？」
 
 
佢好痛苦咁係度思考。
 
 
「你變完人哋都未必一定鍾意你架啵。」
 
 
佢仍然都係好掙扎嘅樣，然後講：「我願意！」
 
 
「結婚咩你。」
 
 
我帶佢由頭買過晒啲衫，重新包裝過佢；剪過一個新髮型，唔再油頭油臉；行路傾計要望人；講野要中氣十足畀人聽到！
 
 
經過我一翻打扮，佢終於叫轉咗形象。
 
 
「我係咪唔同啦？」
 
 
「似返個人啦而家。」
 
 
就係咁，佢又走去咗表白。
 
 
「其實你一直都係好朋友⋯⋯如果我畀錯咩訊息你⋯⋯一係我哋遠啲？」
 
 
唐詩詩第二次咁近應佢。
 
 
但個結果係，佢哋變得更加友好。
 
 
我真係對哩個結果反晒白眼。
 
 
「點解呀，你唔係以為你仲有機會呀？」
 
 
「我覺得我無。」
 
 
「痴線㗎你！」
 
 
「但無咪無囉，關我同佢做好朋友咩事？」
 
 
我唔知佢哩種係真痴定假痴，但嗰刻覺得哩個大佬，好單純天真。
 
 
「妹B，女仔係咪會嫌男仔講野悶？」
 
 
佢某一日又好煩惱咁返嚟問我野，因為唐詩詩唔開心唔講野，佢又唔識氹佢笑。
 
 
「當然啦。」
 
 
佢之後走咗買咗一大堆李力持啲真係笑話，背晒佢，等返學嘅時候可以講畀佢聽，哄下佢笑。
 
 
佢話，見到詩詩笑就係嗰日最大嘅幸福。
 
 
佢地照樣如常咁返學，放學，直到多咗一個人嘅出現。
 
 
佢叫馮士林。
 
 
馮士林係轉學入嚟，因為搭同一架小巴，好多時就同佢哋一齊返學同放學。
 
 
亦係咁熟咗。
 
 
兩個人或者會好奇怪，但三個人嘅團體出去玩就唔同。
 
 
好快地，佢哋成日約出去，一齊唱K一齊溜冰。
 
 
三個人變成好朋友。
 
 
除咗食飯各自同返本身嘅朋友一齊食之外，佢哋三個人基本上係糖痴豆。
 
 
士林係一個健談嘅男仔，一齊嘅時候，多數都係佢兩個講野，然後大佬係度笑或者聽。
 
 
或者當佢哋鬥嘴嘅時候，就由大佬代為審判，做判斷。
 
 
去到有一日，情人節，佢哋三個人繼續如常咁約出嚟玩，去咗海洋公園玩咗成日。
 
 
當唐詩詩去咗廁所嘅時候，士林忽然好緊張咁講。
 
 
「我有啲緊要野想同你講呀。」
 
 
「係咩？」
 
 
「我要同詩詩表白呀！你會唔會祝福我架？」
 
 
嗰晚，當唐詩詩係廁所行出嚟時，士林拎住收係袋嘅玫瑰花，向佢表白。
 
 
「做我女朋友好無？」
 
 
唐詩詩點點頭。
 
 
「你大佬一定傷心死。」我講。
 
 
「嗯。佢話......個心好似畀刀割咁。」Crystal哩個時候，望向窗外嘅鏡色，鼻紅紅想喊咁。
 
 
「個女仔.....都幾無理過佢感受，明知佢鍾意佢。」
 
 
「係呀。真係好衰，見到佢，我真係想親手打佢⋯⋯不過佢都唔好受。」
 
 
「妳又知佢點諗？」
 
 
佢無應我，我只好繼續問：「咁之後點？」
 
 
大佬不嬲有氣管病，佢係跑十五分鐘都無氣嗰啲人嚟。
 
 
但嗰晚，佢跑咗足足10k。
 
 
佢話要筋疲力盡，腦袋先會識得停止運作，唔去諗佢。
 
 
朝早返學搭小巴，變咗係馮士林坐喺唐詩詩嘅隔離。
 
 
中午由三個人食飯變咗兩個人食飯。
 
 
放學佢哋拖住手行街。
 
 
佢好似係街外人咁。
 
 
馮士林拖住唐詩詩，同我大佬講：「我哋仲有地方去呀，可能行到好夜。一係⋯⋯你返去先？」
 
 
「喔⋯⋯好呀⋯⋯」
 
 
大佬又落街，跑咗12K，返到嚟塊臉紅晒，呼吸不順，心跳過快，入咗急症室。
 
 
哩個狀態，直到佢哋分咗手。
 
 
馮士林喺轉校前，同大佬講咗一句：「可唔可以拜託你照顧佢。」
 
 
「哩啲嘢唔應該係我做。」
 
 
「我知道你鍾意佢。」
 
 
雖然佢哋兩個分咗手，但大佬一啲開心嘅感覺都無，因為佢睇得出，唐詩詩好傷心。
 
 
佢哋分咗手嘅第二個星期，大佬去搵唐詩詩傾計。
 
 
「唔好喊啦。」
 
 
「點解呀⋯⋯」
 
 
「因為喊唔好睇。」
 
 
「咁唔喊有咩獎先？」
 
 
其實哩句只係唐詩詩開玩笑，根本唔係諗住當真。
 
 
「唔喊，我每日都摺一粒星星畀你，好唔好？」
 
 
「好呀。」佢笑返，雖然唔係真笑。
 
 
「你識摺星星咩？」
 
 
返到屋企，我問佢。
 
 
「唔識呀。我諗住妹B你教我咋。」
 
 
男人老狗，摺咩星星呀？
 
 
然後，佢真係每日都會摺一粒星星，唔同顏色嘅，放係佢檯面，風雨不改，放假嘅話，星期一仲會補返兩粒。
 
 
就係咁，摺星星變成佢每日嘅任務，直到中學畢業、放榜入U。
 
 
佢哋都分別入咗唔同嘅大學，有唔同嘅生活，慢慢都識到唔同嘅朋友，有唔同嘅圈子。
 
 
就係大學升YEAR 2之前嗰幾個月，因為唐詩詩同一個男仔行得幾埋，所以大佬又再做傻事。
 
 
佢係一個成日都做傻事嘅人嚟。
 
 
「你第3次表白啦.....但我......對唔住......」
 
 
「唔緊要呀，我預咗失敗嘅，我只係怕，當個你同個男仔一齊後，我又會無機會同妳講。」
 
 
唐詩君喊咗好耐，佢喊住咁講，唔明點解自己唔可以鍾意大佬。
 
 
大佬聽到哩句更加傷心。
 
 
臨走前，大佬更正：「不過今次唔係第3次。」
 
 
「哩次係我第1437次嘅表白。」
 
 
1437次？
 
 
唐詩詩佢當然唔係好明白大佬講咩啦。
 
 
嗰晚，大佬又跑咗15K，返到嚟成個人都虛脫，個樣紅到可以隨時去急症。
 
 
大學嗰三年，佢哋無再交流。
 
 
唐詩詩同佢新男朋友過得好好，同時佢都搵到一份模特兒嘅工作。
 
 
大佬只係晚晚默默咁睇佢IG，但無同佢講任何野。
 
 
之後大佬就去咗英國Working Holiday。
 
 
記得佢去外國嗰日，我喊到要生要死，佢抹一抹我嘅眼淚，好溫柔咁同我講：「傻妹，我又唔係唔返嚟。」
 
 
「我去到賺錢，賺夠錢畀妳開一間咖啡店，好無？」佢笑住咁講。
 
 
係嗰一刻，我發現原本好怕事、無自信嘅大佬，唔知幾時開始變得好高大同可靠。
 
 
「Bye⋯⋯bye⋯⋯大佬。」
 
 
飛機將哥哥帶走，同時將我最親嘅人同眼淚都帶走。
 
 
本來都好平安無事，大佬喺嗰邊讀書都讀得好順利。
 
 
直到唐詩詩某日分手，因為好孤單嘅關係，佢淨係諗起大佬，就打電話畀大佬，自己喊到七彩。
 
 
佢話，佢好掛住大佬。
 
 
大佬二話不說飛返香港。
 
 
係哩個時候，眼前Crystal已經眼淚流到成塊面都係，鼻都紅晒。
　
 
深深吸一口氣，抹一抹眼淚，佢又戴返墨鏡。
 
 
佢真係好熟口面。
 
 
「如果唔係因為唐詩詩叫佢返嚟香港，佢就唔會喺街見到佢個前男朋友，就唔會打起上嚟混成一團，就唔會急亂之中衝出咗馬路⋯⋯」
 
 
佢講唔到落去，直接就轉移話題：「你係咪真係可以帶我見佢。」
 
 
「⋯⋯如果妳要畀野佢，我可以幫妳畀。」
 
 
「唔得，我想要親自交畀佢。」
 
 
佢戴咗墨鏡，但依然好似見到佢好堅定嘅眼神。
 
 
「會折壽。」我警吿佢。
 
 
「唔緊要，我願意㗎。」
 
 
「對唔住，我哋部門真係無先例可以帶人去，而且你唔會知個後果係幾嚴重。」
 
 
「但係⋯⋯」
 
 
「我哋愛莫能助，但我一定會將妳嘅嘢交到佢身上，我答應你好無？」
 
 
佢個樣好掙扎，過咗好耐先話：「好。」
 
 
然後將一樽嘢放喺桌前。
 
 
我好奇問：「哩樽喺⋯⋯星星？」
 
 
係載滿紙星星嘅玻璃瓶。
 
 
「係唐詩詩摺返畀大佬嘅星星。」
 
 
「星星？」
 
 
「哩個就係點解大佬話自己表咗1437次白嘅原因。」
 
 
係唐詩詩去到好後期先知，大佬每摺一粒星星之前，都係紙條寫住佢對自己嘅感受。
 
 
『唐詩詩，唔好唔開心啦，因為有我喺度。』
 
 
『考得唔好唔緊要，妳係我心目中永遠都係第一，我永遠都喺度。』
 
 
『聖誕節快樂，我永遠都喺妳身邊。』
 
 
『祝妳同佢快樂，我愛妳⋯⋯即使我唔喺妳身邊。』
 
 
每日一粒，風雨不改。