Rubbishptgf 賤男週記: 分手旅行團
日子一日比一日難過。雖然同自己講呢次係最後一次搵佢，但係最後都係忍唔住send msg比佢。我唔知道除左芷純之後，我仲可以同邊個講。香港每一個地方都好似有佢既影子咁，每一間戲院都有同佢既腳印。朝早起身已經再見唔到電話既msg提示。踢完波之後發覺冇人等緊我。全日我都會聽住同佢既電話錄音，感覺好似覺得佢無離開過咁。
身邊有個朋友知道左我失戀，話想介紹個女仔我識。我自己都好想知道，到底係咪識一個新既人，就可以放底到以前果一個？於是我答應左我朋友add左果個女仔同佢開始傾計。
果個女仔叫jenny，20歲讀緊大學，同芷純一樣都係170高，瘦瘦地咁，之前做過a＆f。我諗係好多香港男仔心目中所謂既女神。不過唔知係咪我心入面只係得芷純，我覺得呢個女仔一d都唔靚。佢同芷純完全係兩種人。佢同樣都住公屋，不過佢會自己返part time搵錢。佢唔同芷純，佢唔鍾意聽廣東歌，只係聽英文歌。閒時會去外國做下義工，係香港得閒就會去下展覽，畫下畫咁。聽落好似好多人心目中完美既女仔咁。
我：「點解你會同你男朋友散既#oh# ？」
jenny：「佢打我囉。」
我諗返起同芷純岩岩識果時既對話。雖然打女人係好唔岩，但係我總係覺得一個男人係唔會冇原因之下打人。我開始覺得呢個jenny會唔會都係一個好臭脾氣既女仔？
我：「點解既#oh# ？」
jenny：「佢話我同d男仔傾計。但其實我都冇。我其實已經對佢好好，咩都就晒佢。」
聽住jenny一句又一句讚自己既說話，唔知點解我一d都聽唔入耳。諗返起岩岩識芷純果時，佢都成日話自己好脾氣，講過好多好多自己既優點。但係到最後，根本就係另一回事。
我相信好多男同女岩岩認識果時都會係咁，只會講自己係上一段關係點樣受害，講自己好既一面出黎，但從來就唔會講自己唔好既野出黎。
jenny：「係呢，你有冇叫過雞架。」
我成日都會問自己，如果我同芷純係正常既情況之下認識，結果會唔會好好多？或者，今次我應該試下唔好咁坦白。
我：「冇。。。」
jenny：「點解唔叫既？我好多男仔fd都有叫過。」
我：「er。。。我覺得唔係咁好，冇愛既sex係差好遠。」
雖然我真係咁諗，但係呢句說話由我口中講出黎，我都有少少心虛。
同jenny 雖然都有傾有講，不過就係冇左同芷純既感覺。可能因為jenny唔會秒回我，而佢send既每一句說話都冇表情符號。可能因為咁，令我覺得佢冇咁nice。同佢講既每一句說話，我都諗返起芷純，同佢黎做對比。越傾，我只係越掛住芷純。
其實當你真係好愛一個人既時候，你根本唔會有心情去同另一個人傾計，因為你腦海中只有果個人既影子，眼前既人咩都比唔上佢。再諗返起芷純搵人傾計，同果個狗公講佢無男朋友果一刻，我諗佢已經唔再鍾意我。
jenny：「不如我地下星期去行博物館丫？」
我心諗，唔撚係掛。我呢d咁無文化既人，叫我去行博物館一定悶撚死。其實jenny都有send過唔少佢畫既畫比我睇。佢畫既好似係抽象畫。不過我一d都睇唔明。
最後我同jenny出左黎食飯，始終朋友介紹都唔想推。而我d fd都同我講，叫我試下，話唔定會心情好返d。
我：「想食咩丫你？」
jenny：「em。。不如去赤柱？」
分手無耐就要我去赤柱呢個曾經同芷純有咁開心回憶既地方，真係想玩死我。同jenny一路係赤柱到行，腦海中出現既都係芷純。jenny同我講咩，我都係hea應佢。最後佢揀左間扒房。
望住眼前呢個女仔，好似好有學識，好有氣質。識得飲紅酒，用英文點菜。但係就少左一份真實感。雖然我成日都帶芷純食貴野，不過芷純最鍾意食既係吉野家。而我成日都會同佢去食m記，食平野。呢樣係我其中一樣好鍾意芷純既野，唔似d港女咁，要成日食貴野。
經過今次見面之後，我發覺咩搵個新人就可以放底到果d野全部都係假。當你好愛一個人既時候，根本唔會再愛上第二個人。所以係我未放底到之前，我決定唔再去識新既人。
「遺傳自你的生活 和珍惜的某些
時空中交錯多少感覺 似抱住你暖一些
原來自你消失後 才懂珍惜這些
陽光今天這麼燦爛 多麼想你」
https://www.youtube.com/watch?v=a8MbDgHMfSA
日日係屋企做廢青，差唔多天光先訓得著。唯有寫故打發下時間。幾經辛苦終於寫完個故頭果一part。可以專心去寫同芷純既故事。我將我同佢水蛇春咁長既msg 重新睇一次。每一日既每一句。一路寫，就好似重新同芷純拍一次拖咁，好甜，好開心。寫到鬧交既時候我又會好嬲佢，唔明點解佢會咁對我。
一路寫一路回憶其實已經好辛苦，仲要睇住d人既回覆鬧我同笑我的確唔係咁好受。其實一開始寫呢個故主要係想寫頭果一part，始終普通人都係想睇甜故，睇下人點叫雞。後半part其實只係為左我自己而寫，不過我估唔到原來有唔少人睇完之後有唔同既感受。令我最意外既係好多女仔都不約而同咁打左d千字文比我講佢地既讀後感同自己既故事。
一篇又一篇既安慰既說話令本身心情跌到落谷底既我好返好多，覺得人間有愛。我開始問自己，點解連一d同我平水相逢既人對我都好過芷純對我？睇住一個又一個鬧佢既留言，我開始慢慢反省，到底佢係咪真係咁唔值得我愛？
唔經唔覺已經去到七月二十號，原本我地買左機票同酒店二十一號去東京。雖然我知道芷純唔會同我去，不過我都想最後問多佢一次。
我：「仲去唔去東京？當同個老朋友去，你鍾意既可以分房訓。」
芷純：「no la thx。」
呢一句，係佢兩個星期以黎第一次應我既說話。
我：「咁一係你自己同你d 朋友去，我幫你改機票名。我唔去。」
芷純：「no la thx。」
直頭廿一號果日佢都冇搵過我。而我亦都覺得自己係時候心死。
突然間收到芷純既sms。
芷純：「可以幫我買con嗎？thx。」
當時我見到呢個msg既時候真係好嬲。blue tick左我幾個星期。同佢講過無數既說話佢都冇應過我。今日竟然可以為左d con黎搵我。到底佢心目中係咪剩係得d con 同d mask？
所以我冇應到佢。過左幾個鐘，佢又send左個msg 黎。
芷純：「你又無去到東京？」
其實我一早已經同佢講左我唔會自己一個去，再者，而家d機票都已經過左，已經唔再重要。
唔知係咪因為連我地最後既一個trip既日期都過埋，我開始死心。果晚既凌晨，我一個人訓唔著，自己渣左架車出去買野食。係架車到聽住富士山下呢首歌。其實聽左呢首歌咁多年，都冇認真了解過佢歌詞講咩，不過果晚，我終於聽得明。
「誰都只得那雙手 靠擁抱亦難任你擁有 要擁有必先懂失去怎接受」
一直以黎我都好想霸住芷純，因為我好怕失去佢。但係有d野就好似沙咁，你捉得越緊，佢只會走得越快。或者我應該好好學下點樣接受失去一個人既事實。
「曾沿著雪路浪遊 為何為好事淚流 誰能憑愛意要富士山私有」
無論我有幾愛佢，都唔係一個理由去私有化呢個人。
「何不把悲哀感覺 假設是來自你虛構 試管裡找不到它染污眼眸」
或者我傷心既感覺，全部都係我自己虛構出黎，只係我一直係到掛住以前甜蜜既片段先會放唔底。
「前塵硬化像石頭 隨緣地拋下便逃走」
識芷純之前，我係一個好放低既人，冇咩野會令到我唔開心。我諗我應該好好放底呢舊石頭。
「我絕不罕有 往街裡繞過一周 我便化烏有」
好似我咁普通既人，或暫佢真係講得岩，隨便搵一個都好過我。
「人活到幾歲算短 失戀只有更短」
人生流流長，好多年後望返轉頭，其實可能只係好少事。更何況只係一年既感情。
「忘掉我跟你恩怨 櫻花開了幾轉 東京之旅一早比一世遙遠」
要忘記一個人，談何容易，可能到我忘記既時候，櫻花都開左幾轉。
聽完呢首歌之後，唔知點解個人好似睇通晒所有野咁，個身無啦啦起晒雞皮咁，心情突然間變得好好。我諗，我真係放底左。
我買左好多野食返去，準備enjoy下廢青既時光。一個人，其實都冇咩大不了姐，以前咁多年都係咁架啦。
突然間，電話響起。心諗咁夜仲有邊個打黎？
望望電話，原來係芷純。
芷純：「喂。。。係東京丫？」
已經唔記得有幾耐冇聽過芷純咁溫柔咁同我講野。
我：「唔係。」我好cool咁答佢。
芷純：「係香港？」
我：「係。」
芷純：「你冇去咩。」
我：「冇。」
芷純：「點解呢。」
我：「冇。」
芷純：「咁。。咁一個人去都冇兩個人唔去晒咁多錢丫麻。。係咪丫。」
聽芷純既語氣好似岩岩喊完咁既聲。呢種語氣令我諗返起以前佢發完我脾氣之後打返黎氹我既感覺。
芷純：「冇去到咩真係。。。」
我：「冇。。。」
芷純：「咁。。。咁果兩張機票咪晒左囉。。。」
我：「係。」
芷純：「噢。。。So sad....咁果d 酒店錢呢。。」
我：「比晒啦。」
芷純：「冇得cancel 架咩。。。。」
我：「冇。。。」
芷純：「不如我地book 機票再去咯。」
聽到芷純咁講，我當下真係好開心。雖然我地發生過好多問題，有過好多唔開心既經歷。但係唔錯過又邊會識珍惜大家。我唔知道點解佢會搵返我。但係只要佢想，我真係好希望大家可以重新開始過，開開心心咁去呢次旅行。
我：「好丫。」
芷純：「好無丫。。。」
我：「好丫。」
雖然我好cool咁答佢，不過其實我已經開心都喊左出黎。失而復得，一定會以前更加珍惜。
芷純：「咁我地睇下幾時有得去囉。。。咁起碼。。起碼唔會晒左之後既酒店丫麻。。」
聽到芷純把聲好似喊緊咁。
我：「星期一去？」
芷純：「其實我而家可以去架啦haha。不過好似好趕咁。」
我：「我睇下幾時有。」
芷純：「係囉，你睇下啦，其實買d cheap d 既都ok 架啦，唔一定要國泰架。」
我：「好，我睇下。」
芷純：「我睇到幾個鐘之後有班機去，不過可唔可以咁急買架？」
我：「可以，不過你唔洗pack 野咩。」
芷純：「我唔洗丫，我即刻去得架啦haha。」
我：「其實你唔洗因為我比晒錢而特登同我去架。。。果d 錢好少事。」
芷純：「唔係丫。。。其實都有兩個原因既。。。你知啦，放假係屋企都冇咩好做。咁我又冇可能自己一個去架麻。。我都唔識。。如果你去既話咁咪去。。。如果唔去既話就唔去。。。」
我：「咁我換機票啦。我仲有分剩。晏晝四點有班機去。」
芷純：「四點丫。。。仲有半日喎。。。咁咪要等多半日。。。我想快d 去丫haha。」
我：「我都未pack 野。。。」
芷純：「好難捱丫。。。」
我：「訓下覺pack 下野啦。」
芷純：「我晏晝五點先起身架咋。」
我：「我換左機票啦岩岩。一陣晏晝四點。」
芷純：「咁好啦。你pack 下野訓陣先啦。我睇下你個po 消磨下時間啦haha。」
我：「好啦。咁我pack 下野先，你攰就訓陣啦。」
芷純：「好啦，咁你得閒覆下我msg 啦。」
我：「拜拜。」
雖然一路傾電話我都扮到好cool好似好唔care咁。不過收左線之後我開心到好似個細路咁係間屋周圍走周圍跳。
一路執野一路開大個喇叭聽下d呢幾個星期我唔敢聽既情歌。好開心咁係間房又唱又跳。
成晚我就係到ff我要帶芷純去邊到玩食d咩。估唔到個天真係比多次機會我。我同自己講，以後一定要做個100分既男朋友，唔會再犯以前既錯，好好咁同芷純相處。
因為心情太興奮，搞下搞下，搞到天光先訓得著。起身已經12 點幾。沖個靚涼就飛的去左機場。
坐係的士聽住歌，睇住沿路既風景。今日既天真係好藍好靚。我知道呢個一定會係我地兩個既新開始。
芷純：「哈佬。」
我：「HI。」
可能因為已經兩個星期冇見過面冇講過野，大家都變得好似有d陌生咁。
不過成個trip有成十日，我相信應該可以同佢慢慢修補返d關係。
上機之前我地去左間餐廳坐低左。
芷純：「你屋企人有冇問你點解咁急黎丫？」
我：「有丫。」
芷純：「咁你點答佢地丫。」
我：「我話同你去，我阿媽仲問我點解咁耐唔見你黎。我咪話你之前考試唔得閒。你有冇同你屋企人講？」
芷純：「我同我媽講左咋，我話同朋友去，不過佢應該都估到。」
我：「你做咩冇啦啦想黎既。」
芷純：「冇丫，因為我發覺放假日日係屋企真係好悶囉，咁不如去下旅行。」
因為last min先買機票既關係，我同佢最後都要分開坐。
落左機之後我地就飛的去左酒店。去到酒店大堂
check in果時，芷純冇啦啦同我講
「可唔可以問下佢有冇得分床？」
聽到佢咁講我冇出聲。心入面其實有d嬲。雖然而家分左手，但係而家再一齊去旅行，係咪唔應該
分得咁開呢？感覺好似同我訓會搞佢咁。到底佢當我咩？
我：「上得去啦。」
芷純：「你冇問丫？」
我：「問咩姐，間房一早book左係雙人床架啦，邊有得改。」
芷純：「咁我訓sofa啦。」
我：「唔洗啦，等我訓sofa啦，你訓床。」
芷純：「唔洗喇，我鍾意訓sofa。」
雖然係同一間房入面，不過大家都冇咩野講，佢有佢玩電話，我有我繼續寫我既故。
芷純：「快d出文啦，d人又吹你啦。」
我：「你有睇咩。」
芷純：「本身都有既，不過後尾見到d人係咁亂鬧就冇睇。成班毒撚係到圍爐取暖，on9。」
我：「你覺得人地鬧你d野唔岩咩。」
芷純：「唔係岩唔岩，係你剩係寫我d衰野，好既野又唔見你寫下。」
我：「我冇寫你d好野咩，我寫左好多你既好野架喎。你睇到我寫d對話全部都係100％真架喎。」
芷純：「係全部真呀，不過剩係得我d衰野囉。寫我d好野咪頭幾個月囉。之後咪一路寫衰我囉。」
我：「咁我想問你有d咩好野可以比我寫。」
芷純：「我明明接左你兩次放工，你就剩係寫一次。仲有好多，廢事講喇。」
我：「你覺得寫你接多我一次放工會有咩分別呢。唔通我次次接你都寫咩。」
芷純：「跟住你自己d衰野又唔寫。掉電話果d呀。」
我：「我咪寫左囉。」
芷純：「係呀，幾句丫麻。輕輕帶過囉。」
我：「你覺得掉電話可以寫幾多句。」
芷純：「總之你班友就係到圍爐打飛機啦，我冇興趣睇。d銀包電話明明係你自己買比我，我都冇出過聲叫你買，班友就係到屌鳩我。」
我：「係有d人係亂屌，不過有d人都有心講架。d人屌我我都有接受丫。」
芷純：「總之女人就係原罪啦。」
果晚芷純訓左係sofa，不過可能因為凍氣太凍，
佢訓左無耐就走返上床。雖然同一張床，不過張床太大，我地一人訓一邊，中間好似隔左好遠咁。
第二日我地訓醒就去左秋葉原同涉谷，搵佢人生
最重要既con。沿路係街行我地就好似兩個唔識既人咁，隔開好遠咁行，各有各玩電話。我開始有少少後悔黎左。
終於去到涉谷109先搵到佢d con，我就企左係出面行行企企，等幫佢埋單。離開果時，行行下望轉頭已經唔見左佢。
我冇理到繼續係條街到行。行行下，行左去109附近間貓店，亦姐係之前我地講好左要一齊黎睇貓
果間。雖然只係一個好普通既地方，但係呢個係
我同佢之間既約定，不過而家只有我一個人黎左，我相信佢亦都冇興趣黎。
行係人來人往既涉谷，從未試過咁孤獨既感覺。
諗返起幾年前我自己一個人黎東京玩十日，一d孤獨既感覺都冇。相反今日同自己鍾意既人黎會有呢種感覺。黎左咁多次日本，從未試過有一次係咁唔開心。
芷純：「我係地下，我離開左109我出去行下。」
見到電話既whatsapp msg我冇開黎睇。只係繼續
一個人係條街漫無目的咁行。
無幾耐佢又msg我。
芷純：「我係109對面間藥房，come。」
我行左過去，見到芷純等緊我幫佢比錢。
芷純：「你唔買野呀？」
我：「唔啦，我冇野想買。」
芷純：「呢d野我幫d同學買架。」
我：「哦。」
買完之後行左出藥房。
芷純：「點丫，去邊丫？」
我：「唔知丫，你想去邊丫。」
芷純：「我冇丫，我要買既野都買得七七八八，你有咩地方想去就去啦。」
我：「我冇丫。」
芷純：「咁丫，咁返酒店囉。」
就係咁，4點幾我地已經返左酒店。hea左兩三個鐘之後，我地就出左去附近食野。大家都好似冇咩意欲去任何景點咁。
我：「不如改機票早d走好冇。」
芷純：「好呀，反正我都買晒我d野，早d走最好，聽日走。反正你都玩得唔開心。」
我：「而家係邊個唔開心丫。」
芷純：「我冇唔開心喎，我本身expect係大家好開心咁去旅行架喎，我諗住係咁架。」
我：「你一黎就話分床訓，點開心？」
芷純：「喂，咁我覺得分左手唔應該同床訓有咩問題？你唔係以為我搵你去旅行係想同你復合掛？」
我：「冇咁諗過，你黎都係為左幫朋友買野姐。」
芷純：「你都痴線，你係咁睇我既你咪拎返晒d野佢，我真係一d都唔care。我唔係因為答應左幫同學買野先黎架囉。」
當時我好想問佢，既然佢覺得分左手唔應該同床訓，咁d機票酒店同買既野係咪應該佢自己比返？係佢自己講過分左手就唔會同ex有contact，而家又同我去旅行，咁我姐係咩？不過我冇講出口，因為我知道講出黎，佢又會話我同佢計住晒。
芷純：「係啦，今晚睇下有咩機票早走啦。」
其實怪就只怪自己on9。仲記得佢搵返我果晚，我開心到係咁同d朋友講。不過我d朋友仲屌鳩我叫我唔好去，不過我冇聽過佢地講野。
我出發去機場之前將我連登個故send左比jenny，我話左比佢知呢個先係真實既我，之前呃左佢好對唔住，之後我就block左佢。雖然我知jenny對我有好感覺，不過佢鍾意既，只係一個假既我。如果佢知我係rubbish之後，我相信佢一定接受唔到。
芷純：「點丫，係咪買姐。」
我：「你理得我姐，你要走咪自己買囉，我想走我自己會買機票走。」
果陣嬲起上黎，真係有諗過自己走左去留佢係到。不過真係做唔出。芷純身上面又冇乜錢，人生路又不熟，就算幾嬲我都做唔出。
果晚我訓左係床到諗左好耐，既然都已經黎左，就玩埋呢幾日啦，當係為自己又好，為芷純又好，留個好既回憶。
之後果日起身之後我帶左佢去東京站到行街。東京站就係我之前一個人黎買熊仔既地方，同埋有好多大型超市。
芷純：「熊仔喎。」
我：「係丫，之前我就係係到買架啦。」
芷純：「而家都搵唔返你買果隻lu。」
我：「係丫，所以好珍貴架，絕版架啦。」
芷純：「所以咪話比返你囉，你又唔要。」
無論行過d咩景點，大家都好似冇心情去睇咁，兩個人相對無言。真係唔明原來好開心既東京之旅點解會搞成咁。
果晚返到酒店之後，我地坐左係床到睇電視。
芷純：「真係陰公，係咁比人鬧貪錢臭雞Z_Z。」
我：「你根本都唔明個問題係邊，而家d人話你唔係因為你問我拎錢，係話你冇錢就要去做ptgf呀。」
芷純：「我講左好多次係試你架咋喎。」
我：「我都講過啦，唔係試唔試既問題，係當你咁樣講，人地本身想幫都幫唔落啦:o) 。」
芷純：「所以話，你成日話我搵過個好易，邊有咁易丫，又要搵到個你鍾意，佢又鍾意你，又肯比錢你既，唔係咁易架。」
我：「乜你對自己咁無自信架咩，唔似你喎[369] 。」
芷純：「唔係對自己無自信，係我唔想丫。」
我：「咁咪係囉，又幾難？」
芷純：「比人話臭雞，何必呢Z_Z 。」
我：「唔係個個都咁諗既，起碼你ex同我都唔係。」
芷純：「咁你地唔care姐，可能第三個係咁諗呢。」
我：「講真，一個人有能力，佢唔會連幾千蚊都唔比自己條女架喎。」
芷純：「就算我下一次拍拖我都唔會同tag入面既人拍拖架啦，所以我成日都諗，如果我同下一個一齊同唔同佢講我做過ptgf好。」
我：「拿，呢個就係你自己既問題啦。我自己就鍾意講晒d野比另一半知既。」
芷純：「唔係坦唔坦白既問題，係我驚佢介意。」
我：「喂，但係如果人地有一日知道左咪仲嬲，好似你同細佬d野咁，個落差好大架。」
芷純：「我其實唔係唔想講我同佢d野你知，係我唔知點講，我都唔知同你講我同過佢一齊定冇一齊好。」
我：「冇關係架喎，好似我同shitty妹d野，我同去旅行姐，都唔算同過佢一齊，咪一樣同你講晒。你身邊個伴侶係你要對一世架，平時做人已經成日要帶假面具做人架啦，對住身邊果個係咪應該坦白d呢？」
芷純：「都岩既，我都覺得一個人可以接受到你過去仲同你一齊真係好難。」
我：「冇人話易架，就係難先值得去搵囉。」
芷純：「所以我真係好撚難得架啦[369] ，接受到你係rubbish。」
我：「都係架，其實你一早講晒我知我根本一d都唔會介意。」
芷純：「所以下一個我會識做架啦。我冇諗住呃我下一個男朋友任何野。」
當時聽到佢咁講我真係覺得好無奈。既然知道自己錯係邊，點解唔係對現任去改，而係選擇對下一個好d。我地每一個人係咪只係大家練習拍拖既對象？學黎點對下一個好d？
我：「咁點解你一開始要選擇去呃我呢。」
芷純：「我冇諗住呃你，我只係諗住唔提。同埋之後我比你屈我偷食。」
我：「你明唔明，一路既問題都唔係偷唔偷食，係你同我一齊果時仲有諗住上人屋企，我唔理你最終有冇上到，呢個唔係重點黎。」
芷純：「咁最終結果就係冇丫麻，如果我同你一齊仲要偷食既話我都好撚唔得閒。」
芷純：「你個故最後會寫返我同個狗公冇野架何#oh# ？」
我：「會Z_Z 。」
芷純：「d人真係好笑，話我落左樓下果廿分鐘係等緊隻狗公黎車我[369] 。」
我：「事實上你問返我，我真係唔明點解果晚叫極你都唔返黎喎。」
芷純：「攰囉，訓左覺囉。隻狗公根本同我冇可能架。不過我知佢好撚鍾意我。我之前叫佢block左你，點知佢過左一日就解返，仲要同你講咁多野。Z_Z 」
我：「咪同你一樣囉，當初你都有block左佢，之後你咪又係自己解返。」
芷純：「解返又點姐，總之我對佢無興趣啦，呢d咁既人。」
我：「因為你覺得佢知道晒你d野姐。」
芷純：「唔係喎，佢而家仲鍾意我架喎，知道晒仲鍾意我咪難得囉。」
我：「咁佢都幾岩你喎聽落。」
芷純：「係幾岩架，不過因為一d野令我唔鍾意佢。你覺得我鍾意佢咩？」
我：「係架，其實我係篇文都寫左五個point出黎啦。」
芷純：「邊五個point#oh# ？」
我：「拿，第一，你話你冇男朋友，第二你叫佢聽為你失眠，第三佢黎接你放學，第四你話佢電到你，第五你係咁自拍佢睇，仲有好多啦。」
芷純：「咁到到而家呢個moment你覺得我仲有冇鍾意佢？」
我：「而家可能冇掛，不過我都係覺得當時係有架喎。」
芷純：「冇。」
我：「你明唔明姐，你好地地係唔會搵人傾計架。我同你嘈親交我都有試過想搵人傾，但係仲鍾意緊一個人係唔會傾得落囉，我隨便都搵到人傾架，但係我唔想囉。」
芷純：「但係我真係冇鍾意佢。我鍾意佢我去搵佢佢即刻同我一齊啦。but whatever 啦。仲有細佬.，你話我仲鍾意佢，其實我唔係囉，我save 佢d 相唔係因為我鍾意而save囉。」
我：「咁點解要save#oh# ？」
芷純：「冇架，純粹save架咋，覺得幾好睇喎。而家冇左啦，而家del 晒。」
我：「其實我好耐之前我已經見到你save低架啦。」
芷純：「但係我唔係鍾意囉，如果我係鍾意既話你覺得我當時會唔會唔搞散佢地？其實你細心睇佢同佢條女d愛情，你認真睇佢地d po 你就明。」
我：「我點q知，我由頭到尾都冇理過佢地，得鬼閒細心睇佢ig[sosad] ？」
芷純：「佢條女係好撚鍾意佢架，但係佢唔鍾意條女。因為佢唔鍾意條女d 性格。果時廢事拆散人，係因為我知道佢有條女之後搞咁多做咩姐。條友同我做得呢d野，同我一齊都可以偷食架啦。廢事步人後塵啦。」
我：「哦。」
芷純：「所以何必貪人靚仔呢係咪呢。」
我：「靚野就個個都貪架啦。」
芷純：「靚仔有咩用姐，賤丫麻。」
我：「你地d人就係鍾意d賤人架啦。」
芷純：「而家唔知佢地點喎，可能散左掛，不過睇條女都唔捨得散架啦，條女都on9。」
我：「所以話，根本係你對人念念不忘姐。」
芷純：「念念不忘我而家沖個頭埋去啦，洗咩咁on9同你黎旅行姐？」
我：「其實好多野你口話唔係，不過你做出黎既野係丫麻，好似你同個狗公msg咁，你平時咩msg都會del，但同佢d msg就冇del。」
芷純：「所以你就覺得我鍾意佢拿？其實都合理既你咁諗。」
我：「屌，一路以黎我話你既野有邊樣唔合理？」
芷純：「你係好合理，不過最尾冇鍾意就係冇鍾意，誤會就係誤會架啦。同埋我想講，如果我而家返去搵細佬.佢實係會ok架喎。我知道佢仲鍾意我架。」
我：「點解你覺得人地仲鍾意你呢？」
芷純：「第一，因為佢親口講過，第二，因為佢msg講過，佢一路都仲鍾意我。」
我：「所以你好快會搵到下一件架啦，你同你ex散左冇耐就搵左細佬.之後又搵左我，都冇停過。」
芷純：「睇下點囉。反正我都知你有用分身follow我ig[369] 。講開又講，果次報左警之後，有個pc仔上左黎我屋企問話，之後冇幾耐佢就search左我facebook同我傾計#hehe# 。」
我：「真係會咁架咩#oh# 。」
芷純：「咪又係msg我講埋d鳩野囉，叫我帶眼識人果d廢話。我見到佢fb有條拍左六年拖既女朋友既[sosad] 。最搞笑係你寫左個故之後，佢有日msg我，問我係咪芷純[369] 。」
我：「唔係掛，咁都認得你[sosad] 。」
黎左東京幾日，第一次同芷純傾左咁多野。其實眼前呢個人已經變左，或者佢根本從來都係咁。
芷純：「丫係，有段片想比你睇好耐，一路都唔記得。」
https://m.facebook.com/story.php?story_fbid=651378641712950&id=372341526283331
條片係套mk戲紀念日既最後一幕。大約係講女人同男人發脾氣，係因為好鍾意對方先會咁做，兩個人應該包容同忍讓，因為就算搵過一個新既人都唔一定比以前好。
睇完之後其實我係好認同，亦係我呢個幾月黎一直同佢講緊既野。但係點解佢最後要選擇放棄？而家又send呢條片比我姐係點解？我真係諗極都諗唔明佢諗咩。
我：「喂你比人起左底喎。」
芷純：「認真@_@ ？」
我：「係丫:-( 。最衰都係我。」
芷純：「傻啦，唔洗自責。我都知係邊個放我上去，應係一個我學校鍾意左我好耐既一個男仔。」
我：「算啦，我唔再寫啦，廢事搞落去。」
芷純：「唔關你事既，唔洗咁內疚。」
的確我真係好內疚，不過佢好似一d都唔在意咁。
芷純：「多左幾百人follow咁少既[sosad] 。我仲以為會好多tim。」
我：「過幾日應該冇人記得架啦:-( 。」
芷純：「#fuck# d連登仔都唔讚我靚既，有冇搞錯，有d仲話我肥。」
聽到佢咁講我真係唔知講咩去，去到呢個時候佢仲可以介意人地讚唔讚佢靚。
之後果兩日我地都係無無聊聊咁周街行，所以最後我地都係決定左提早返香港。回程既香港上面，我地坐埋一齊，佢成程都訓左覺。間唔中佢都會不自覺就挨落我到。我好珍惜呢份最後既溫暖，因為我知道呢次可能係我地最後一次見面。
望住佢，唔知點解覺得好對佢唔住。兩次旅行都冇留低一d咩開心既回憶比佢。無錯，佢有對我好差既時候，同樣我都係。但係作為一個18歲既女仔又可以有幾成熟。腦海中不停諗返佢比我睇果條片，點解唔可以接受左過去唔好既野，改變大家去繼續行前，而要選擇放棄。如果可以既，我都想繼續去忍佢。我好後悔成程旅行都冇好好講我想講既野。
直到落機去到的士站，望住佢上的士，心入好想講既果一句對唔住都冇講到出口。
返到屋企之後佢send左個msg比我。
芷純：「thanks for everything, including this trip:) 」
我：「對唔住，兩次旅行都冇令你開心過:-( 」
芷純：「開心架，邊有唔開心。 」
我：「真係唔可以好好地重新黎過咩？ 」
芷純：「可唔可以唔好再煩我 我只想好好過我自己既生活:)。如果再咁 我會block。 」
今次我好肯定同我自己講，我呢一世都唔會再搵佢。我決定比自己一個月時間，比自己好好放底呢個人。