Rubbishptgf 賤男週記: 失戀自救日記
因為呢次旅行，令本身已經放底左既我又再沉返落去。又或者可能係我從來都冇真正放底過。其實要放底一個曾經咁愛既人，又邊會咁易。我知道往後既日子都會好難過，我亦清楚，一個月既時間未必可以令我放底芷純，但至少我都應該好好整理下自己既思緒。
好多人失戀都會搵唔同既人去傾訴，但係其實無論你同幾多人傾，對方講左幾多安慰你既說話都好，最後都係要靠你自己去睇通。諗返起我第一次失戀既時候都係靠自己一個人去捱過。以前我可以一個人係外國住，一個人去旅行，我相信我而家一樣可以。
諗返起芷純去完東京返黎就叫我唔好再煩佢，心入面越諗越嬲。我真係唔明點解我之前問佢又唔去，到到過左機票既日期先黎搵返我話去。ok fine，佢想去我即刻同佢去，但係換黎就咁既結果？
忽然間我覺得我好對唔住曾經勸過我既朋友，特別係比我block左既jenny。雖然我覺得send完個故比佢睇，佢一定會好憎我，不過我諗我都應該同佢講聲對唔住。
我：「我返左香港啦。」
Jenny：「你做咩block左我丫。。。」
我：「Sorry丫，果時我諗住試多次，點知原來結果唔係咁。」
我將我係東京既經歷講晒比佢知。
Jenny：「唉，其實我一早已經叫你唔好去架啦，你又唔聽。」
我：「唔試過我點會死心，而家諗返當然會覺得on9，不過比我揀多次我都係會去。」
Jenny：「唔好咁傻啦你。」
我：「你睇完個故而家應該好憎我啦。」
Jenny：「冇憎你喎，點解要憎你。」
我：「我叫過咁多雞仲同你講話冇叫過雞，仲有段咁柒既往事。」
Jenny：「呢d都係你既過去，你唔講總有你既原因，我真係冇嬲你。要嬲都係嬲你block我多d囉。」
我：「sorry丫，以後唔會架啦。」
Jenny：「咁你請返我睇戲啦。」
我：「好丫。」
諗返起芷純係東京果時同我講過，佢同佢ex差唔多兩年都冇鬧過交。佢話雖然相處得好舒服，不過佢話同一個唔會同你鬧交既人就好似同一個無感情既人一齊咁。其實好多鬧交，都係因為著緊。見到jenny既成熟，唔知點解覺得有種距離感，反而令我好掛住芷純果種唔成熟。
「我懷念的是爭吵以後 還是想要愛你的衝動」
https://www.youtube.com/watch?v=3Xj6QoLmoF0
自從同芷純散左之後，一直都唔敢再去戲院。呢日我約左jenny去左數碼港睇蜘蛛俠。其實我對Jenny一d感覺都冇，因為我仲未放底到芷純，同佢出街我總會諗起以前既點滴，又或者佢根本唔係我鍾意果種女仔。今次出黎，只係內心覺得欠左佢，想請佢食個飯補賞返我對佢既大話。
唔知係咪因為坐係身邊既人唔同左，我成程都睇得唔係好投入，好想快d走。其實套戲本身就悶悶地，不過戲入面Ironman同蜘蛛俠既一句對白就令我好深刻。
「If you're nothing without this suit, then you shouldn't have it.」
我曾經同芷純講過，冇左佢我咩都唔係。如果我冇左佢就咩都唔係既話，我諗我根唔值得佢或者任何人鍾意。係識佢之前我本身就冇佢係我身邊。或者係因為同佢一齊之後，為左就佢，我慢慢冇左自己當初令芷純鍾意我既野。雖然好老土，但係要人地愛你，你先要學識愛自己。
我好清楚，同一個我唔鍾意既人出街或者傾計，只會令我更加掛住芷純。所以我情願自己一個人去過。我嘗試去搵唔同既方法去令自己好過d，甚至無聊到係google search下失戀療傷既方法。
於是，我搵左好多關於失戀既戲黎睇。我睇左一套叫左「超市夜未眠」既戲。大概係講一個男仔比女仔飛左之後，晚晚都失眠既故事。可能因為套戲既故事背景都係係英國，所以令我諗返起以前自己一個係英國住既時候既生活。套戲雖然冇咩特別既message帶出，但係就講出左一個失戀既人失眠時候既心情。
夜晚既時候。一個人，將手機既相一張一張咁開黎睇，聽住我同佢傾電話既錄音，諗起佢而家可能已經同第二男仔傾緊計去緊街，果種感覺真係好難受。離開左佢令我第一次體會到失眠既感覺係點。諗返起岩岩識佢果時唱比佢聽既全世界失眠，不過呢種失眠已經唔再幸福。
「在凌晨二點十分慌張想你
吸著無法入眠的空氣
如果是夢境 也許是幻影
我想沉醉在這裡」
https://www.youtube.com/watch?v=ZPIfEUSz-fc
每日最痛苦就係訓醒既時候，因為我每晚都會夢到芷純返返我身邊。一訓醒先發覺全部野都係夢，果種失落感真係難以形容。以前好大食既我，而家一早只係食得落少少野，短短一個月已經瘦左10kg。其實都係好事黎既。
望望手機，收到個ig dm：「做咩唔寫埋個故丫😂我有追架。」
原來係city妹（唔係shitty妹）。姐係當年第一個知我身份既ptgf。其實一直以黎佢都係我係個tag到最好既朋友，直到同芷純一齊之前我先冇再搵佢。
我：「冇丫，廢事再寫落去啦，佢都比人起左底，廢事搞到佢。」
city妹：「你地而家點？」
於是我將我同芷純既事講晒比佢知。原來佢而家已經冇再做ptgf，仲同一個男仔拍緊拖。
city妹：「屌你係咪on9架。」
我：「但我仲好掛住佢🤕。」
city妹：「你未睇清嘅話，旁人點講你都聽唔入耳。過啲時日，你就覺得自己幾on9。」
我：「佢係對我衰，但佢都有對我好既時候，我好鍾意佢成日痴住我，又秒回我🤕。」
city妹：「你都on99。鍾意你既人一定會秒回到你同痴住你。你講果d野大部份女仔都做得到啦，我都做到。」
我：「咁你樣衰丫麻，樣衰梗係痴身架啦🤔，靚女好少咁痴身架。」
city妹：「你仆街啦😂，我係大學不知幾多人溝，係得你先會話我柒。同埋唔關靚唔靚事，係鍾意就自然會咁做。信我啦，佢真係唔係咁好架咋。」
我：「😞我晚晚都喊唔停，有d想寫信比佢。」
city妹：「咪on9啦，你試過架啦。你寫過咁撚多野比佢，有邊次佢會認真睇你d野？你咪撚煩住人tim呀。點解冇見你成年你on9成咁，以前你好撚型架喎。」
諗返起年幾前玩ptgf既時候，city妹仲係on99咁，我成日都會教訓佢，教佢點做ptgf安全d，點樣先唔好咁on9比人搵笨。估唔到今日要輪到佢教返我轉頭。
我：「鍾意人係咁on9架啦😞。」
city妹：「總之你就係on9。我係芷純見到你實笑柒你。心諗好彩飛左你條廢柴。你試下冇錢冇車睇下佢一開始會唔會show你？我相信佢係有鍾意你既，不過好少囉。時間過耐啲，你揾到個你真心中意嘅就會無事，你睇清左就會笑番自己on9。」
我：「過幾日係8月9號，我想去我同佢第一次見既地方撞下佢😞。」
city妹：「屌你仆街啦。冇你咁好氣。」
雖然話就話最後都要自己睇通，但有city妹係到得閒陪我傾下鬧下我都會令我過得舒服少少。
有一日，我又收到個ig dm，係君怡send黎。但係我心諗，君怡唔知我係rubbish黎架喎，心諗仆街啦，唔通佢睇完個故發現左係我？
君怡：「點丫你，死得未丫。」
我：「🤔。」
君怡：「🤔咩姐，一早知係你啦。」
我：「你點知🤔。」
君怡：「一聽你唱d歌都認得係你啦。」
我：「咁你都記得？🤔」
君怡：「你有咩我係唔記得架？你所有野我都記得好清楚，你幾號生日你全名係咩全部我都記得好清楚。我鍾意過你架麻。」
我：「真係估唔到我係你心目中咁有地位🙊。點丫你近排。」
君怡：「我過得好好丫，我考完dse，考得好好，入到hku，而家又搵到份好高人工既office part time，同個好似你咁既男仔拍緊拖😂。過得前所未有咁好。」
我：「真架？見到你到咁真係好，可惜我而家真係前所未有咁差😞。」
君怡：「梗係啦，我答應過你架麻，我答應過你唔會再做ptgf，要考入一間好既大學，我記得架，我同自己講一定唔會令你失望。」
聽到君怡過得咁好，內心真係好安慰。其實大大話約過咁多個ptgf，差唔多每一個我都會勸佢地唔好再做，奈何真係會聽你講既真係只係得一兩個。
我：「傻架咩你，對住我呢d仆街講既野唔洗咁認真掛。」
君怡：「你係我心目中係一個好人黎，你當時比我d 錢我到而家仲keep住，我一直都想比返你架。」
我：「咁你而家見到我咁樣係咪有d失望😞。」
君怡：「傻啦，點會失望，我完全明你感受囉，你做過d野我之前都對一個賤男做過。之前我又係好鍾意一個男仔，我為左佢又係放到自己勁低，做到好cheap，又喊又求人地都唔理我。所以我好明你感受架。」
我：「你唔明架啦，你地唔係我，你地冇經歷過我既事，你地冇約過咁多ptgf，唔明白呢個世界殘忍，想搵一個鍾意既人有幾難😞。」
君怡：「你信我啦，鍾意你既人唔會咁樣對你架，鍾意你既人唔會成日同你講分手，更加唔會轉個頭去偷食。」
我：「我諗佢應該冇偷食既😞。」
君怡：「你咪傻啦，佢所講既冇偷食咪就係可能未扑過野囉。好地地一男一女唔會就咁單獨約出街架，傾咁耐whatsapp架，你唔好咁天真啦。」
我：「可能因為我都有對佢唔好所以佢先會😞。」
君怡：「喂，拿一單還一單，就當你對佢衰，就代表佢可以去搵第二個架咩？咁點解佢對你咁衰你仲咁鍾意佢唔出去搵第二個？當你好愛一個人既時候就算點衰你都唔會做呢d野架。講到尾，咪就係佢唔夠愛你囉。」
從來冇諗過當日得16歲既君怡過左兩年之後會變到咁成熟。令我呢個28歲既人更加無地自容。同佢傾左成兩個鐘，感覺好似睇開左少少。不過要放低，又邊有咁易。之後既日子，每當我好唔開心既時候，我都會搵city 妹同君怡傾下，比佢地鬧下。
睇睇日曆，已經係8月9號。一年前既今日，就係我同佢相遇既日子。唔知佢仲記唔記得。雖然我心入面都好清楚，佢一d都唔在care，不過我都好想去證實一下。
同一個時間，凌晨1點，我渣左去同一個地方。我泊左架車係淘大出面。我落車行返去當日我去禁錢既atm，記返起當日既情況。行過淘大附近同佢食過既m記，甜品鋪，睇過既戲院，呢一區就好似自己第二個家咁。我企左係條街到，心入面好想好似戲入面既男女主角咁，係相遇既地方重遇，然後重新開始。
不過我唔係拍緊戲，又或者芷純根本唔係我生命中既女主角。直到一點半佢都冇出現過。雖然好想等落去，但我知道我應該要走。於是我渣左車返屋企，同一年唔同既係，今次佢唔係我身邊，果一年，十七歲既佢。
「她是個十七歲的小女孩 她不知道自己有多可愛
她眼中只有相信和依賴 好像未來就該那麼好
讓我的心也跟著搖擺
我是個廿七歲的小男孩 我不怕面對世界變多快
做過自己覺得好傻的事
那是多麼純真的年代 那是多麼純潔的相愛
不知我怎麼變了 不知她怎麼變了 我慢慢知道什麼叫做忘記
是一種成長也好 是一種悲哀也好
不管我多想留住回憶 它依然隨著時光淡去 MY LOVE
不再是十七歲的我和你 最好還是想念別再相見
我將永遠記得那一段情 就算有一天我們變老
想起彼此還有著微笑
因為我早已變了 因為你早已變了 我也許不會愛上現在的你
是沒有緣份也好 是沒有感覺也好 不管我多麼想念著你
卻知道再也無法回到那年紀
因為我早已變了 因為你早已變了 有一天我偶而再說起了你
是一段往事也好 是一段感情也好 永遠將它寶貝在心底
記憶著那時候的我和你 MY LOVE OUR LOVE
那一段十七歲的愛情」
https://www.youtube.com/watch?v=3o9mhBQDc8o
寫左呢個故之後，好多朋友都有走黎安慰我，當中有上網識既人，ptgf tag識既人，甚至一d真實既朋友。包括我一個十幾年既好朋友偉哥。偉哥同我一樣咁大，都係有錢仔黎。識左佢咁多年間唔時都會叫佢去叫雞，不過佢就從來都唔會去，上年仲結埋婚生埋仔，有個幸福家庭。
偉哥：「個故好好睇👍🏻。」
我：「😂屌你又知係我黎？我好多野都寫假架喎，咁都認得？」
偉哥：「😂仆街，你地點明星名咩都無改，一睇就知係你啦。你地最後點散？」
我：「🤔都係嘈交，跟住我車巴佢咁。」
偉哥：「不過18歲係唔定性架啦，加上生活環境完全唔同，好難解決，就好似我ex咁，又係d mk妹黎。」
我：「人非草木，邊有咁易放得低丫。」
偉哥：「😂講真我地同佢地d mk妹生活太唔一樣 。佢地自卑鍾意引人注意，所以好鍾意名牌野，又鍾意收下兵同唔同男仔傾計。我地咩都有，所以好難理解佢地諗乜😂」
我：「😞不過應該要傷心一排。以後唔撚拍拖，屌拿聲。」
偉哥：「過一排就唔會咁諗既 世上總有好既女仔你未遇到。」
我：「其實早排朋友都介紹左幾好既女仔我識，不過我唔鍾意佢地一黎到就好似預左搵男朋友咁。件事好機械化，都唔係自然形成既。」
偉哥：「我明既，靚妹係愛情就係單純愛情 ，出黎社會後愛情就多左好多雜質。不過你條仆街都要收下火😂😂」
我：「😂我比佢指住屌我兩個鐘都唔發火已經好勁架啦，你識我咁耐邊有見我咁忍得。」
偉哥：「可能你初期太大男人鬧佢，搞到佢忍住忍住先慢慢關係變到咁。不過佢都好有問題，去得太盡😂所以我都好同意個post有條友講唔怪得咁多人打佢。
總之let it go啦。因為你同佢性格就唔夾 就算起番埋一齊都係會散，唔會維持到耐。慢慢傷心過後就識下一個啦😏總有個岩既。個時我散左後都唔想拍拖 以為忘記唔到個ex，其實只係忘記唔到段刻骨銘心既回憶姐。佢既出現係會令你更加好同更加知自己要咩女仔。」
我：「😔只覺得好sad姐，睇住d人離離合合，好似我地d fd咁拍咁多年都散。到最後搵個第二個結婚，都唔知果個係咪最鍾意，定係只係因為timing到先揀果個人。」
偉哥：「其實timing真係好緊要，太細個拍拖，拍得太耐又會悶，所以我覺得岩timing既話，拍2年就足夠睇清楚夾唔夾，拍太耐都冇意思。出黎踢多d波啦搵多d野做下令自己開心d啦。快d 寫埋個故佢，我同我老婆都有追😂。」
我：「叫雞故都岩你地睇😂。」
偉哥：「不過講真，我睇完個故都令我反省過自己，係咪同我老婆耐左就冇對佢好似以前咁好，好似所有野都take it for granted咁。」
諗返起寫左個故咁耐以黎，有好多人都同我講過佢地自己睇完既感受，對自己同伴侶相處既反思。其實如果我打呢個故可以幫人好好修補或者救返一段關係既話，咁我覺得所有野都變得值得，因為一段感情係無價，我覺得無論係咩情況之下都唔應該輕易咁放棄佢。
係一段感情之中，好多時我地都會怪對方做得唔夠好，但係就好少會反思自己做得唔好既地方。我覺得我都係時候要反省下自己既問題。
我睇左套戲叫客制化女神。故事講一個作家發現左自己有能力用自己既文字將佢幻想中既女神寫出黎。佢可以靠佢既文字去改變女主角既性格，甚至有幾愛佢。不過久而久之，佢發覺即使比佢改變到對方，佢都係唔會開心。因為佢鍾意既人，已經唔再係佢地自己。
我諗我地每個人心目中都會有一個完美情人既形象，無論係樣，性格都係附合晒自己既所有既要求。但係好多戀人係熱戀期過後，新鮮感可能就會冇左，唔同既問題就會慢慢出現，而情侶係不斷爭吵之下，可能就會唔記得左當初相愛既理由，最後分手甚至反目成仇。一直以黎我都只係用我既方法去對芷純好，心入面總係想改變佢，令佢變成我心目中既芷純。
或者一直以黎都係我太自私，我唔應該去期望改變對方，因為就算比我改變到，芷純都唔再係芷純。真心鍾意一個人，就應該鍾意佢既全部。一段感情，珍惜先係最重要。
「I couldn't see you when you were here ,and now that you're gone, I see you everywhere.」
要放底一個人，從來都唔係一件容易既事。唔經唔覺已經做左廢青半個月。呢半個月黎聽過無數既安慰既說話，睇過唔少既書同戲，學左唔少大道理。雖然心情好似好返小小，不過心情始終都好唔反覆。我決定自己去一次旅行，搵返果一個唔怕自己一個人既我。
其實係英國讀完書咁耐，一直都冇返過去。曾經好想帶芷純去呢個我成長既地方。以前係英國讀完既時候，會覺得英國好悶，好掛住香港。但係而家人大左，反以掛住果到既平靜。
其實人一出世，本身就係一無所有。而家從新一個人過一生活，又點解唔得呢。一個人拉住行李，坐十幾個鐘飛機返黎英國，原來冇想像中咁孤獨。
雖然我同我第一個女朋友係英國同居左三年，但係即使今日再返返黎舊地，已經記唔返以前既事。其實對一個人既愛，係咪只係因為習慣？時間或者真係可以沖淡所有既愛。諗下諗下就覺得好無奈，到底呢個世界有冇可以抵得住時間既愛情。其實呢個半個幾月黎，我發覺自己已經開始慢慢習慣冇左芷純既日子，始終我地只係一齊短短十個月。連我都開始習慣，我諗芷純應該一早已經唔記得左我。
我知道再過一排，我對芷純，都會好似對我ex咁，慢慢就唔記得晒同佢既回憶。我地只係係大家幾十年既生中短短十個月既過客，淡淡交會過。
「現在身旁只有被子一張 已經慢慢習慣」
https://www.youtube.com/watch?v=RhcPlsbNoyw
我決定再開始寫埋個故佢，當係為我自己既感情劃上一個完整既句號。睇住一句又一句比佢鬧既句子，覺得當時既自己好傻，何解唔簡單d轉身就離開呢。不過有早知就無乞兒。如果佢冇離開到我既話，我都唔知道失戀可以咁痛。我亦明白到一個人既世界唔可以只係有對方既存在。
睇返一開始我地相識既甜言蜜語再睇到最後佢所鬧我既每一句，破壞過既每一個承諾，睇返真係覺得好傻，亦都唔明點解自己仲咁愛佢。不過有時鍾意一個人就係冇得解。
「And you have cursed me
When there's no one left to blame
And I have loved you just the same」
https://www.youtube.com/watch?v=xk5GvfIZG-g
今時今日再睇返高登仔神戲500 days of summer，終於明白點解咁多人會鍾意睇呢套戲。可能因為呢套係講出左一個對愛情有幻想同一個現實既女仔既故事。女人有時真係咁善變。今日佢同你我愛你，聽日可能佢已經變左心。不過愛情係冇分對錯。就好似故事最後女主角同男主角既一段對話，大概講出左一齊都只係timing唔岩。
jenny曾經同我講過，佢18歲果時其實都係同芷純一樣對人咁差。只係經過時間同經歷先令佢成長。佢話佢曾經對佢以前既男朋友好衰，不過而家諗返起，只係覺得有少少對佢唔住，都已經改變唔到d咩。
人生係唔同階段都會有唔同既價值觀。無人天生一出世就識得去學好。就好似我咁，如果我冇玩過咁多ptgf，我都唔知道呢樣野係咁錯。其實可能有一日芷純既價值都會改變，但係果時我已經唔再係到。或者最後同我地一齊果個，只係係岩既時間，遇到價值觀相同既人，而呢個人，唔一定會係我地最愛果一個。
今日返到香港，收到之前岩岩分手果時買既兩張台灣鄭中基演唱會既飛，係今年既12月23號，唔知到時邊個會同佢去呢。
「如此多演唱會 坐過你兩邊像很配
曾經多熱情 散過的心也別要灰
學到今天應該會 多麼欣賞喜愛 完場便離開
我願鳴謝你不想說後悔」
https://www.youtube.com/watch?v=qZJgQT10Sms
今日再睇返ptgf 呢個tag，見到一個又一個搵女搵客既post，望到既，就好似兩年前既自己。奈何，呢到亦都再冇我想要既野係到，感情，唔係你比幾百蚊，幾千蚊就可以買到。
由岩岩分手之後，想寫呢個故話比芷純知佢對我有幾重要，到到後尾寫呢個故，只係想令自己放低呢個人。唔經唔覺寫左已經有二十萬字。
呢個故事叫賤男週記本身係想講我係ptgf tag既賤格，不過後半段所講既賤，係低賤既賤，因為就算你有幾愛果個人，都唔應該改變自己令到自己咁低賤。希望港男們可以引以為戒，唔好做呢兩種賤男。
Rubbishptgf 賤男週記
完
3-9-2017
一週年快樂:)