Rubbishptgf 賤男週記: 內疚
經過一件咁既事之後，我好清楚知道佢憎我只會比以前更加多。不過與其完得咁難睇，不如好好咁講一聲對唔住。
於是，我send左個whatsapp比佢。
「我想同您講聲對唔住。呢一年既所有野。傷害過您同令您唔開心既事。多謝您對我咁好同比過我既開心回憶。好對唔住呢一年比唔到d 咩開心既野您，晒左您最寶貴既18歲。希望您會搵到自己想要既野同幸福。🙏🏼」
果一晚，我全晚就係到睇返我地既對話記錄，由第一日睇到佢del左我既時候。重新倒帶一次，先知道岩岩識佢既時候我對佢好差，反而佢對我好好。見到以前自己犯過既錯，其實好多傷害都係雙向，呢段關係入面，如果我可以做得好d，係咪就唔會搞成今日咁？
於是我又send左個msg比佢。
「😔b, 我知您呢一世都會嬲我。我道幾多次歉都唔會有用。但係有d野我好想講您知。
一直以黎，我一路我都係到怪你同人傾計，怪你變心。但係就從來冇諗過點解您要咁做。我睇返好多以前既history, 我先知道原來以前傷害過您好多次。您呢兩個月對我做既，其實我以前都對您做過。我鬧您，不停叫您走，您求我唔好分手。呢d野唔知點解我完全可以唔記得晒，唔記得自己有做過呢d事。一直以黎我都以為自己對您好好。原來其實唔係。
係我冇好好珍惜過您。。。其實您一直有比機會我，只係我唔知道。
仲記得你偶像鄭中基講過，浪子回頭金不換。我都好想好似佢咁回頭仲未遲。不過今次我自己都原諒唔到我自己。失去左您，已經係我最大既報應。
仲記唔記得愛如潮水呢首歌？呢首歌係您第一首叫我唱既歌😔好對唔住，果日睇左您電話，知道您有諗住去蒲。我知我冇資格去管您d咩。可能您對男人已經好失望，唔再相信人。希望您唔好放縱自己。唔好唔記得當初既自己😔要好好錫自己。
我終於明白點解那些年個主角會祝福沈佳怡，我知道我比唔到幸福您，您值得更加好。如果有平行時空既話，希望果個無賴會識得好好珍惜您。好對唔住🙏🏼我愛您。」
可能因為最後係我自己做錯，所以我一日比一日後悔。每日我都會係到諗，如果當日佢叫我改酒店我即刻改左比佢，如果我信佢多d，就唔會搞成咁？
失戀，係我心目中，從來唔係一件好難過既事。因為我第一次失戀，只係傷心左三日就重新出發。我冇諗過失戀，原來可以咁痛。
咁多年黎，我其實都係單身一個人，有咩事都唔會搵人傾，因為次次我都會自己諗通，唔需要煩人去開解我。不過今次，我真係撐唔住。
仲記得以前我同芷嘈咩交，起身講句早晨就可以重新開始過。每一日起身之後見唔到電話既綠色燈，一個人返工放工，行過以前同佢行過既地方。電話唔再好似以前咁不停咁震。世界好似失去重心一樣。
我唔知道係因為愛情既習慣定係我真係好愛佢。出街我都唔敢聽歌，好怕聽到會忍唔住喊。連食一個早餐我都唔敢再食，因為我日日返工食早餐都有佢陪住。而家返緊份工都係當時佢陪我interview。我唔想再日日返同一份工，但係佢唔係我身邊。最後我都辭左職，想一個人放空一下。
其實朋友既開解，黎黎去去都係果幾句。對於係失戀痛苦之中既人，其實一d幫助都冇。
「Time will heel。」
時間？到底要幾耐？冇人話到你知。可能係幾年，可能係一世。
「搵個新既就會放低到架啦。」
當心入面仲深深愛住一個人既時候，又點會有心情去搵去識下一個？
「你值得更好。」
更好係邊到？從來冇人會話你知。
終於到左七月，我同芷純差唔多識左足足一年。呢幾日我都過得好痛苦，咩都唔想食，咩都唔想做。我好想做d野去補救。呢幾日我都間唔中send左d msg比佢，不過佢睇完都冇回過。
望住個日歷，就黎到3號，亦係我地每個月既紀念日。打開我個櫃，見到一堆戲飛，係我同佢睇過既所有戲，我一路都有keep戲飛既習慣。雖然只係一張張好普通既戲飛，但係每一張都有無數既回憶係入面。於是，我寫左本戲飛既日記諗住送比佢。
「想 從撕開的戲飛 逐分鐘掛念你 是哪一套最回味
從每日然後每星期 你我一起能看多少套戲」
https://www.youtube.com/watch?v=c5FaU_VhgLI
03/09/2016 10:40PM
屍殺列車 The One
我永遠都唔會唔記得第一次拖住您既感覺。仲有果晚攬住您訓既溫暖。好多謝您係我最失落既時候出現係我生命入面。由果日起我先知咩叫幸福。
15/09/2016 09:25PM
S風暴 Time Square
唔知您仲記唔記得呢，果日係我第一次接您放學。感覺真係好青春。多謝您令我人生更加完整。
28/09/2016 22:00PM
球王比利 Isquare
果日係星期三晚，您送左件衫比我，呢份係您送比我既第一份禮物。我竟然一路都冇左件事。果陣我仲話呢件衫我一定要著到80歲。
30/09/2016 09:50PM
深海浩劫 The One
仲記得果晚您話我點解成日都唔打比您，您話您手機永遠都冇我打黎既來電。唔知您仲記唔記得果種感覺呢？套戲真係好悶，睇睇下果時您仲因為個con太乾搞到流晒眼水。
10/10/2016 05:30PM
果個weeknd係您既生日。好多謝您將您既18歲比左我。唔知您仲記唔記得當日既甜蜜同開心呢？當時您仲話以後既生日都想我陪住您過。
11/11/2016 09:50PM
你的名字 The Grand
果日係星期五，您全日都好忙，前一晚仲頭痛。但係我就怪您成日唔應我。不過當時您好鍚我好就好，我係咁話您您都冇嬲。套戲您睇到訓著左，其實諗返我真係好唔識體諒您，咁攰仲叫您陪我睇戲。
16/12/2016 10:15PM
鋼鋸嶺 The One
果晚我地為左d好少既事嘈交。我講晒粗口鬧咁您。真係好對唔住。仲記得您睇完套戲超開心，好似個細路仔咁係咁話好好睇。我仲一路係咁同您講雷霆救兵好睇d，可惜我地一路都冇機會睇。
13/01/2017 09:30PM
太空潛行者 The One
果日您又病左。不過您都撐住咁陪我睇戲。我地都估唔到呢套戲咁好睇。好想好似戲入面既主角咁，以後簡簡單單兩個人係埋一齊。
「願我會揸火箭帶你到 天空去在太空中兩人住」
有您係我身邊，我唔介意失去全世界，因為您就係我既世界。
21/01/2017 05:40PM
3X反恐暴族 APM
前一日我去左接您放學，之後車左您去脫毛。星期六您放左學之後我地就去左附近睇戲。我知道您果時一定好攰，仲要睇d咁悶既戲。
31/01/2017 07:35PM
星聲夢裡人 Cyber Port
前一晚我地又嘈得好勁。因為您發現左我以前d野。您好嬲咁走左。結果比您鬧左成晚。最後凌晨我五點幾我接返您返黎。第二日我地去左數碼港睇呢套野。我地兩個都覺得悶到痴線。
10/02/2017 10:15PM
John Wick 2 MK
等左好耐終於都有得睇。仲記得第一集我同您係屋企到睇。果日放學您去左脫毛，我仲特登走黎接您。結果比您讚我好好。其實您次次讚我我都記得好清楚架。
套戲都幾好睇既，不過都係第一集好睇d。
17/02/2017 09:55PM
NASA 無名英雌 The One
果排岩岩過完情人節，日日都過得好sweet好開心。睇之前又去左食您最鍾意既吉野家。不過您應該返學太攰啦，又訓著左:P
25/02/2017 05:50PM
骨妹 APM
果日係星期六，放學之後就同您去左睇呢套您一直都好想睇既戲。其實我覺得幾好睇，不過您話好悶。前一晚我地又為左d無聊野黎嘈，真係好無聊。
03/03/2017 09:35PM
盧根 The One
記得您前一日比人收左部電話。喊住咁打黎搵我。次次聽到您喊都好想即刻攬實您。第二日放學您先拎得返部電話。一放學我地又去左睇戲。
套戲好睇！90分！
17/03/2017 09:55PM
美女與野獸 The One
其實我覺得呢套戲好好睇，因為我覺得好似我地。我就好似隻野獸咁，又衰，又惡性格脾氣又差。但係偏偏遇到您咁靚咁好心地既女仔鍾我同錫我。
好多謝您為我準備既生日。果個係我呢世人最開心既生日。
13/04/2017 10:05PM
狂野時速8 Times
四月我地日日都過得好sweet。差唔多晚晚都會開住cam傾計傾電話。果日係星期五，您黎左接我放工。真係好開心，返左咁多年工，第一次感覺到有人等我放工係一件幾幸福既事。
21/04/2017 09:40PM
拆彈專家 Times
估唔到呢套戲咁好睇，我同您都睇到好開心。您仲叫我第二日再同您睇多次。當時您話好多謝我陪您咁任性。其實只要您叫到，做咩我都會陪您。
28/04/2017 10:00PM
春嬌救志明 The One
其實我同張志明一樣，都係一個唔肯長大既細路。做既野成日都令另一半傷心同失望。係您令我成長左。係您救返我出黎。
17/05/2017 07:40PM
29+1 影藝
果排我地既關係好差。叫左您好耐您先肯出黎睇戲，成程您都好cool。一路睇，我一路覺得我好似個主角咁，好想知道到底係咩令我地既關係變到咁差。
21/05/2017 05:40PM
毒。誡 The Grand
果個weekend 我地又為左第二個人去嘈交。睇過咁多戲，最悶應該係呢套。
17/06/2017 11:40PM
原諒他77次 The Grand
您成日都話原諒我77次。我而家睇返，我諗一早已經多過77次。果日我病左，好記得您攬住我由發燒變返好既感覺，就好似有個天使救返我咁。果晚咁夜同您出街去睇戲既感覺好甜，好開心，好似全個世界得返我地兩個咁。
19/06/2017 19:25PM
去吧!啦啦兵團 Mega Box
星期一既凌晨，您話想過黎訓。好開心我地變返一開始咁樣，見少陣都會掛住。套戲好好睇，成個戲院得我地兩個，好似包左場咁。之後我地去左ikea食野，d野真係好抵食，咁大個仔都未食過咁抵既野。
「如果只准許記低某幾段 誰要再記住曾經怎中箭。」
https://www.youtube.com/watch?v=7n0BWvfBdzc
只係望住d戲飛已經有無數既回憶。而家睇返好多唔開心既野，其實都係d小事同誤會組成。好對唔住，係我冇好好珍惜。
「只想從前的溫馨 不數從前的罪証。」
雖然您曾經都傷害過我好多次，不過您係我心目中留低既，只會係好既回憶。我唔知您仲記唔記得我地開心既事，或者您仲係好憎我。不過我真係好想同您講聲對唔住。
戲飛會有褪色既一日，不過呢d回憶會永遠留係我心入面。
我愛您
3-7-2017
衰人
一隻一隻字咁寫出黎，回憶當時既開心同唔開心既事，真係好辛苦。我將呢本日記影低左佢send左比芷純。
芷純終於都回左我，不過佢冇講野，只係send左幾張佢跌傷左既相比我睇。
之後既日子我除左不停認錯之外，仲想完成我以前答應左佢又未去做既事。我仲記得我同佢講過，如果有一日我為左寫歌既話，就姐係代表佢對我好重要。於是我果幾日好認真咁作左首歌比佢聽。
奈何換黎既，只係一次又一次既blue tick。
我：「😔您係咪要玩返我夠本傷返我本您先會開心返。」
芷純：「你自己諗下你對我做過d咩？你自己諗下你打左我幾巴？你諗下一個女仔比你搶電話改曬d密碼去到差管都死話唔會轉。一個女仔比你打完3大巴再推我落樓梯。斷左條骨個頭穿左，博頭見曬骨。打完3大巴成塊面麻左。送比我既野收返我從來無見過咁cheap既男人。我永遠唔會原諒你。麻煩你唔好再煩我。識到你係我人生中既黑歷史。」
我：「😔我冇推您喎，係您捉住我唔放咋。」
芷純：「係你推我。」
我：「😔我改pw係因為我見到個男仔d相好嬲。」
芷純：「麻煩你唔好再打擾我生活。」
我：「😞我真係冇推您，我果時跳落樓梯您拉住我跌左係到，sorry。」
芷純：「你唔需要解釋。我相信愛一個人唔會咁。唔好再煩我plz。你同我收皮。」
我：「😔我比你鬧左咁耐，嬲都好正常姐。。。」
芷純：「打我就好正常？總之你係一個pk。永遠都係。希望你下條女慢慢enjoy。」
我：「😔冇，我認左錯好耐。」
芷純：「認錯大撚晒？你on9？真係好撚cheap。我呢世都唔會原諒。有錢仔？天大笑話。你仲有面搵我，好撚野。仲有面叫我原諒你？我唔會再回你，晒我時間。你再煩我我block硬你。你打我咁撚爽。我呢世都唔會原諒你呢個pk。」
我：「😔點解您原諒您ex唔原諒我。」
芷純：「我發現佢原來對我係最好。你同我收撚皮。打我咁撚多次，又搶電話。搶返個爛手機咯😂。唔撚稀罕。」
我：「😔我拎左去幫您整。」
芷純：「唔撚稀罕喎。大撚把人對我好。」
我：「😔我從來都冇諗住搶返您d野。我所有野都比晒您。」
芷純：「你部咁既撚屌iphone7得個32gb仲要爛撚左😅慢慢搶返去咯😂。你係我呢世見過最撚cheap既男人。慢慢睇d相咯。我仲有大撚把cap圖。」
我：「😞當初您岩岩識我果時都講過，鍾意一個人係會想成日霸住佢。其實我只係同您一樣咋。」
芷純：「你收撚皮。你就算買10個chanel比我。我都唔撚會彩你，你真以為我無本事擁有？你真係以為我無錢買iphone？」
我：「😔呢個兩個月既事，係咪大家都有少少責任呢。」
芷純：「搶撚左個電話去到差管仲話要攞返😂d 阿 sir都問我點解揀個咁撚cheap既人。」
我：「d差佬見人講人話見鬼講鬼話，佢地都係咁講您衰架啦。」
芷純：「你唔係以為我會原諒你再同你好似以前咁一齊返？😂我諗你用埋你下世既福氣都唔會。你同人講我係雞 d人緊係覺得我衰啦？好撚好彩個阿 sir話返比我聽。」
我：「佢問我點識我咪照直講lor😑。邊有話您係雞。」
芷純：「話我係雞？覺得自己好撚高級？我誤會你？你食撚屎la。撚樣。我諗呢個世界無人比你更pk。」
我：「對唔住🙏🏼去到呢個地步，我唔需要呃您。我一直以黎都好盡心盡力對您好，但係人係有脾氣，掉過您電話推過您果d好對唔住🙏🏼
直到四月發現您同人傾計先會變成咁。您都應該好清楚您咁做係岩唔岩，直到發現左您同佢傾計之後，您話唔再搵佢，我知您都仲有搵，您同佢講話果日上我到拎野，本身同我散緊。您話您冇偷食，但係您ex搵您，您覺得真係冇唔岩咩。如果佢果日有回您，您應該都上左去啦。我唔明點解當初大家講好左要專一，我諗您都應該唔係指偷食啦，同人傾計，扮單身呢d我諗九月既您都一定唔會認同。
I cloud d相我諗您岩岩都解唔到點解有，我唔知呢一年當我係咩，可能佢係您人生既遺憾所以您咁掛住佢。如果您真係試過鍾意一個人既，您應該知道，當佢個心有第二個人/比人搶走既時候您會有幾唔理智，幾唔理性。傷害到您，我好對唔住。我只可以講，
呢一年黎，我真係出左好多努力去付出，去到最後唔值得比您咁樣去睇我，咁樣去話我。錫您既人唔係事事都會就您，唔理您就叫錫您，錫您既人可能都會傷害過您，好似您老豆咁，我地冇人係完美。
從來冇諗過拍拖會散😔同您一齊，一開始就預左一生一世。😞我地真係好多誤會😞如果您可以睇到我個心諗咩就好，您從來都唔知我有幾鍾意您😞打您係好衰，正如您次次鬧我我都會覺得您愛我就唔會咁。😔但係點解唔選擇去記低d好野呢。
😔點解當初咁堅持，今日又變得咁脆弱。以為兩個人一齊成日痴住就得。以為一齊得就唔會分。好對唔住😔比自己最鍾意既人憎，果種感覺真係好辛苦。。唔明點解我付出左咁多，結果只係睇到我既衰野
東京既機票同酒店我比晒錢架啦，您鍾意就同您d fd/ 屋企人去，張機票仲係您名唔會改🙏🏼冇咩留到比您，只係得呢d。」
芷純：「我無做錯過。你覺得我偷食既慢慢。i dun give a fuck。無野值得我去留戀。我就無咁cheap既。我唔會攞人d野。費事攞返個廢機到時比人殺撚左就唔撚值得。錫我既人就係要全部就我。所以你呢世都唔會岩我。我分手我一定會掉晒d野。唔會留戀任何野。無需要比個電話我la 爛左既野我無興趣。你送既野無興趣。」
我：「我拎左去整呀。」
芷純：「我唔中意用有瑕疵既野。我自問對你好撚好。係你唔識珍惜。我冇錯過。我真係而家先知我ex對我幾撚好。遇到d pk先知。我係完美，我冇錯。」
我：「😔兩個人係好難先識到同一齊到，就算中間幾唔開心，都好好講再見。幾憎都好，時間耐左都會淡忘。」
芷純：「我諗你一撚定唔記得食藥。我好撚記仇。我一撚定搵個好撚錫我，錫撚到我pk。」
我：「錫唔錫睇您點定義😑可能比得多錢您就覺得錫d。」
芷純：「一定。同埋唔會打我。」
我：「當初您話係在乎我有幾多，比幾多您。」
芷純：「你覺得你比4000好撚多？你28歲比4000叫多？我屌，個10000 我ex以前比我一個月都唔止la。」
我：「您成日覺得我同您計住😑去旅行貴咁多我有冇計。」
芷純：「我從來無話去旅行。 無要求過。你係呢個世界最撚cheap既男人。以後唔好係我面前出現。d野我就諗住聽日拎去寄返曬比你。你唔需要寄你本垃圾日記比我。呢幾日寫既比我托柒？我唔鍾意欠人野。」
我：「你欠我既野唔係呢d。」
芷純：「以為扮下死狗我會原諒你？得架la 總之你以後唔好煩我。如果咁撚不幸係街見到我無需要say hi。」
我：「繼續鬧啦。有咩想講隨便講。」
芷純：「我ex對我好好。」
我：「永遠都火星撞地球，小事嘈到變大事。搞成咁，真係好無謂。」
芷純：「係你自己攞黎。我對人不嬲都nice不過只對我好既人。對我衰既人我洗咩比面。旅行我就唔會去架la你搵同你去旅行既人去la。係你屋企我既野好少 如果你仲係人既就比返d野我。雖然我都唔知我有d咩。有d mask同有支cream 其實無咩野。總之你覺得我偷食 貪錢個d.....我無所謂。反正以後同我一世個個唔會係你。你既另一半都唔會係我。有無做過天知地知，你冤枉我既我唔想再解釋。你覺得個個人有咁做過，解釋黎都曬氣。我同你一齊咁耐。我無收穫過d咩。我當我浪費左一年既時間。你要吹花我既隨便。係人條女面前吹花我，係個cid面前吹花我。同埋我唔覺得你有誠意比返部手機我。」
我：「我話比返您。您話唔會要😔。」
芷純：「至今2個星期，我從來唔覺得你有誠意話比返我。呢d垃圾機你慢慢要la。」
我：「我拎左去整，我有講您知😑。」
芷純：「你整完你有比我？你有誠意比我咩，你問心，你呢d人會諗 我都唔會同你一齊 比返我做咩。」
我：「😑我未至於去到一個電話都要同您計掛。」
芷純：「下？我覺得你係wo。分手要返曬d野個d pk咯。cheap撚到。」
我：「我係咁計較我d機票酒店即刻cancel晒佢做咩，點會照比錢又唔改名。」
芷純：「下？你咪cancel咯😂我都唔會去。撚有錢？」
我：「點解您會成日話我同您計住。我出街同您食飯行街買野有邊次我唔係揀最好既比您？咁都比您話我唔肯洗錢係您身上我真係好無奈。我計既話點會唔問您拎返d錢，我講左好多次，拎電話係睇野。」
芷純：「而家部電話係我度？咁既撚屌廢機。你有誠意比返人唔會等到今日。唔會到今日都未比返人。」
我：「我都話拎左去整lor, 您點解係都要去誤解人姐，唔通您嬲成咁我仲拎個電話黎煩您咩。您嬲成咁，我比返您您咪又係話唔要。」
芷純：「你唔撚識寄野？如果你唔計既。你一早會比返我。唔洗等到而家。其實我從來無講過你唔捨得洗錢係我身上。我一直都話你鍾意送左d野比我鍾意拎返。所以我睇唔到你有誠意比返我。」
我：「總之我會比返您，我從來都冇住要keep住個電話。我只係想講，我對您點差都好。我從來唔會同您計住用幾多係您身上，無論係錢，時間，定係我既愛。」
芷純：「我從來唔覺得你唔捨得洗錢係我身上。就算你每個月比錢我你都好準時月頭比我，所以我從來都唔覺得你唔捨得洗錢。但我唔明點解既然你唔係唔捨得但點解會成日叫人比返d野你。」
我：「您補習果到我會一路幫您比。」
芷純：「你唔需要幫我比。雖然我窮，但我好有骨氣，唔鍾意差人野。我媽開門比你，我老豆鬧左佢成晚。我自問我同你一齊我無咩得益。」
我：「兩個人係埋一齊，要得益d咩？」
芷純：「我除左收過你部垃圾廢機同個萬幾蚊加個廢銀包我得到d咩？比你打左幾巴lor。」
我：「得益係講物質？」
芷純：「你送比我既野邊樣我係好鍾意。nothing。」
我：「您站係我角度諗，您會明我點解咁嬲。」
芷純：「總之錯就係錯 唔需要美化自己既錯。」
我：「我唔係剩係講我地兩個，您同您ex, 同任何人都好，您對於您既過去，就好似電腦咁，要del就del, 其實同咩人都可以有得益同值得去記既野。唔係話好似電腦咁，分開，就冇一樣野值得去記。」
芷純：「分開忘記係對下一任既尊重。」
我：「咁您同人傾計，打算去搵您ex, 您有冇尊重現任。」
芷純：「佢唔係我ex喎。」
我：「咁係咩？sp呀？」
芷純：「分手我就唔會記住。你從來無打過我無搶過我d野我一定唔會同你分手。以為自己叫雞寫文好撚威？」
我：「寫文，係您一直叫我去做，我寫都係為左您。我都係因為你係咁叫我先會寫架咋喎。」
芷純：「搞笑。我而家先知原來為左我。我一直叫你寫係因為你自己想寫。我唔想你同我一齊做唔到自己想做既野。既然你覺得我偷食既就用分手黎澄清我既清白。」
我：「當初我話我冇覺得阿lam靚冇鍾意佢，我解釋左無數次，最後您唔信，我都想用分手黎證明我既清白。您之後話我為左其他女同您講分手。 但係您之後又要為其他仔講分手。」
芷純：「whatever雞咪雞講乜撚野阿lam？威d？個條咁既臭hi見仔都可以比人屌架la，咪又係大陸臭西一個 問下佢有無3粒星先la。」
我：「您永遠就逃避自己講過既大話做過既錯事。」
芷純：「我有認同佢做過。但唔係同你一齊既事。從來無對你唔住。我同佢既事係幾年前。」
我：「我真係唔明，您講到自己咁唔鍾意keep contact, 但係您話佢傷完您之後，您都仲可以唔嬲佢繼續同佢contact。果日您話您仲好傷心。」
芷純：「屌，你同隻笑雞既事都唔撚關我事，你而家去屌左佢都唔撚關我事。只可以話你d taste好撚cheap。」
我：「咁約邊個先唔cheap？係咪要約細佬.條女先叫唔cheap?你真係好想做佢咩？連著對襪都要抄佢。」
芷純：「。」
我：「有時都唔明點解您要咁辛苦對住唔同既人講唔同既野。早兩日我同隻狗公傾過計，佢咩都講晒我知啦。你扮單身同佢傾計，人地問左你幾次有冇男朋友你都話冇。」
芷純：「話冇又點？因為果排我真係想散。」
我：「您講到咁想散您道歉做咩姐果時？」
芷純：「無架 有d野好似你咁都解釋唔到架。你d野唔撚關我事。你鍾意屌邊個咪邊個咯。我d事都唔撚洗你操心。總之識著你真係好撚濕9。」
無論我有誠意去講對唔住，結果都係改變唔到芷純既諗法。之後果一日。我拎左佢部電話去佢屋企樓諗住比返佢。行返以前成日行過既喎，去到佢屋企樓下，好掛住以前一齊既日子，每次去佢屋企接佢都好開心，呢一年黎既每一次約會我都好記得。
我知道而家佢唔會想見到，所以我將部電話放左入公文袋，連埋今個月未比佢既果4000蚊放左係佢門口。雖然我知芷純未必會再原諒我，但我好想佢知道我唔係一個同佢計住既人，就算分開左我都唔介意再為佢付出，我好想佢知道，佢唔係我身邊既話，你比再多既錢我都係冇用。我亦唔想佢再為d錢去煩惱，去約人，去做ptgf。
呢兩個星期既日子日日都過得好辛苦，我好想搵一個明我既人傾，但係我同芷純既事真係唔係三言兩語可以講得清楚。我曾經搵過個狗公傾，因為我睇到佢比芷純既msg，我覺得我同佢都係一樣比芷純既大話呃左既人。
同傾完先知道原來佢地已經識左幾年，係以前芷純係街到識。只係近排先傾返計。佢話當初芷純同佢講佢同男朋友已經分左手所以佢先決定去溝佢。直頭我第一次發現佢地msg 果時，我錄音屌佢佢先知芷純有男朋友。
芷純解釋話當日只係我唔想分手，佢上黎我屋企拎返d野所以我先會出現。諗返起當時芷純喊住叫我唔好分手既畫面，只係覺得好嬲，點解直頭果次之後仲可以呃住我同佢傾計？
可能因為冇人同我傾計既關係，我講左好多我同芷純既野比佢知，包括點樣識，平時點樣相處。雖然佢答應左我唔會話比芷純知，不過我都預左佢會講，因為佢係一隻狗公，佢眼中根本冇誠信可言，只要可以討好到條女既，佢就會做。
於是條友cap左成80張對話圖send 晒比芷純睇。
芷純：「你真係好野，又走去同人講晒我d野？」
我：「我同佢講得預左你知架啦。」
芷純：「又同人唱我做雞？」
我：「隨你點講，我只係想搵個人同我傾下。係佢聊我傾。點解直到而家你都要為左呢d人去屌我？」
無論係分手前定係分手後，我既地位總係比任何人低。
冇幾耐芷純就block左我。仲記得以前叫極佢都唔會block任何狗公，佢話佢唔鍾意block人。睇黎，我真係好特別。
因為芷純既一句說話，令我係連登開始寫故。佢曾經講過，如果一個人同佢講玩過咁多女都係覺得佢最正既話，佢會覺得好甜。咁耐以黎，佢一直都覺得我鍾意d雞多d，所以我好想將所有野寫出黎話比佢知佢係我心目中係幾重要。
不過寫呢個故真係好辛苦，因為我要先寫完頭一年約ptgf 既故事先可以寫同佢既經歷。寫落我先知道，原來自己真係一d都唔留戀玩ptgf 既日子，好多野我都已經唔記得。我腦海中，只有佢既影子。
每日係屋企我都訓左係床到，唔敢聽歌，唔敢睇d有愛情成份既戲同劇。失戀，原來真係咁痛。我突然間諗起一套戲，叫無痛失戀。呢套戲我好多年前係外國讀書已經睇過，果時覺得好悶，都唔知套戲做乜春，成日飛黎飛去。直到今日我先知道套戲想講d咩。我睇戲基本上從來都冇喊過，不過今次我喊得好勁。失戀如果真係可以無痛既話，你話幾好呢。
睇完套戲之後，我好想寫一封信比芷純，將心入面所有既野一次過同佢講晒。
芷純：
好對唔住，我知道我再應您，您只會繼續鬧我。我亦都唔想您煩，或者可能我都唔想再聽到d傷人既說話。
可能因為我生命中出現過好多人，全部都係我生命中既過客，好多都冇好好咁講聲再見，包括我ex。我記得您話過好鍾意我夜遊杜拜個故仔，果時您話睇到眼濕濕。因為我好後悔當時冇好好地咁同我ex完。兩個人識到再係埋一齊相愛，係一件好難既事，就算最後幾唔開心都好，我都想好好咁講聲再見，唔想同您係吵鬧聲之中完結。
或者您會覺得email您好冇誠意。我有諗過寄信比您，但我怕會打擾您屋企人。我諗依個係比較適合嘅方法。
依十幾個鐘我不停打字，寫左我地好多遠遠近近既往事。我以為我已經對您好好，但係打打下我先知，原來所有開心既回憶都係您比我，我亦有好多野冇講過，講過同做錯過好多野，如果我講返出黎，可能可以化解返我地少少既誤會。
我終於明白「不捨得開心 留來給您歡喜」既意思。識左您之後我既人生全部都放係您身上。我成日一個人無聊就會係屋企禁下有咩戲好睇，就算幾想睇都好，我都一定要等埋您先睇。前幾日我重新睇左套戲，叫無痛失戀，係我一直好想同您睇既戲。
故事講一對戀人分左手之後，個女仔好絕情咁去左洗腦公司去洗晒佢地之間既記憶，之後去同另一個男仔從新開始過。男主角知道左之後好嬲，去左洗腦公司到要洗返佢地之間既記憶作為報復。不過清洗記憶既過程中佢需要重溫返以往大家既甜密片段。結果佢一路睇返佢一路好後悔，好唔捨得去清洗。
我都好想好似您咁，可以咁決絕咁delete晒以前既所有野。但每當我睇返所有相同紀錄既時候，我就好唔捨得。可能您知道睇返只會掛住，所以您好決絕咁del 晒。
戲入面有句說話：Blessed are the forgetful, for they get the better even of their blunders.
「善忘既人都係幸福，因為忘記錯誤會過得更好。」
可能因為咁，我既每一日都過得好辛苦，一d都唔幸福。
我最後終於明白，果個女主角想洗既，唔係d唔開心既記憶，而係d開心既記憶。因為大家開心過愛過，所以忘記先會咁難，如果全部只係得憎恨既，忘記就會變得好容易。可能因為咁您選擇唔去記我地開心過既回憶，憎我可能比較容易。
係睇返過去既回憶既時候我先知道，過往好多小誤會，講過既說話，答應過對方既事，所有野交織埋一齊，成就左今日既我地。
兩個人經過相處，磨擦，角力令到原本好單純既愛情出現左好多雜質。如果將所有負面，唔開心既記憶都delete晒，到底係咪就可以換返當初大家最純真既愛情呢？當初既大家就係咁義無反悔去愛。如果所有野都返返去最初，我地又會唔會好似一開始咁樣比大家互相吸引住？
戲入面最後兩個主角都清洗d晒記憶。不過就算冇晒所有記憶，佢地都好自然咁重新比大家吸引住。故事最後佢地兩個都知道大家既過去同以前一齊過。個女仔最後同個男仔講，就算再一齊，問題都一樣會繼續，最後可能都一樣唔會work out。不過佢地都選擇一齊返。因為佢地知道愛就係咁。即使可能冇未來，走向同一個結局，都唔重要。
您話過同我一齊咁耐冇咩得著。我諗返起戀情告急入面講過。
「戀愛會結束， 經歷會留低， 同我地一齊繼續戀愛。」
同您一齊咁耐，我相信大家都有溫暖過大家當時寂寞既心。係大家最低潮既時候出現係大家既人生入面，互相取過暖。同您去過既地方，食過既野，睇過既野，講過既說話都會留係我地心入面。仲記得您帶我去您ex樓下既海邊到行，呢d都係以前既人比您既經歷同得著。我帶您去食左kebab，將來，您可能都會帶返您新既男朋友去食。同您一齊學識左點樣同人相處，了解左女仔多好多，學識左點分m巾，點除con，洗con。您同我去過北海道同東京，令您對呢個地方有認識，到您同下一個去果時，您都會記得。即使del晒過去既野，好多回憶同習慣都留左係我地身體入面。可能呢d經歷就係得著。
雖然已經相處過幾長嘅時間，但我覺得我唔了解您。可能因為我地從來冇好好地去傾過計大家既問題。
我知道我係非常奇怪既人。係因為我對依個世界好恐懼，對自己超冇自信。咁多年黎都係一個人去過，一個人去受。我諗，如果我係ig冇咁不堪嘅往事，您可能會冇咁討厭我。當時我只係唔想失去您，唔係有心呃您。
我唔想到依家您都覺得我唔係好鍾意您。的而且確我係有鍾意過其他人。但真正好鍾意您之後我先發現之前既都唔係鍾意。
包括您成日都提既阿lam。冇錯，我岩岩約佢果時係鍾意過佢，不過只係因為佢係我遇過既第一個既學生妹。我一路以黎都鍾意學生妹係因為我鍾意佢地既戀愛觀，佢地都係戀愛大過天。不過約過佢兩次之後我好清楚佢唔係咁既人。即使有男朋友佢都會繼續去約人搵錢，唔會好似您咁，會為左愛情放棄。我好後悔當日係您面前講過佢靚。果時因為您話佢好樣衰，我講佢以前靚d 只係為左想令自己有面d，唔想您覺得我bad taste。我一直以黎都覺得您係最靚，可能您永遠都唔會信，不過去到呢個地步我亦冇必要再講大話，好對唔住，直到而家我都好後悔咁講過。
仲有同我去旅行既shitty妹。佢一直以黎都好鍾意我，我亦一路都拖住佢。用佢黎做飯腳，陪睇戲既人咁。直到識左您之後，我先決定同佢講清楚。佢果時問左我好耐點解會變成咁，點解要咁對佢。佢仲send 左封好長既信比我，講左好多同我開心過既事，但係我果時一d感覺都冇。我而家終於都明，當您對果個人冇感覺既時侯，就算我作幾多首歌，send 幾多個字都好，都係唔會有用。
我從來冇認真講過我既過去比您知，我知而家對您黎講已經唔重要。我中一開始鍾意左個女仔一直暗戀左7年，直到上左f7我先同我ex一齊。其實我ex唔係我鍾意果type女仔黎，我同佢既感情都係慢慢培養出黎。可能因為咁，我放低佢只係用左三日時間。所以我一直都以為失戀，好快就會冇事。但係同您分開左之後先知失戀，有幾痛。
之後係大學果三年我都係一個人過，街都冇出學都冇返。不過係打機果時識左個大陸女仔，佢陪我傾計傾左三年都冇見過面。直到我讀完書返黎就冇再contact。
之後返黎香港做野，我有鍾意過一個同事，不過一路都只係我ff，佢根本對我冇意思。我亦都放低左。之後我好放縱自己，上網亂識人，最後玩埋ig，做左咁多衰野。
遇過咁多人，其實一早已經對愛情冇晒信心，亦覺得唔會有人鍾意我。直到我識到您。其實第一次約您果時真係冇任何期望，可能因為我遇過既人太多。我的確有諗住影您，不過最後比您發現左。我第一次對您有好感，係一路搞緊果時您一路同我傾計。唔知點解覺得好warm好sweet，好似兩公婆咁。第二次再約您都係因為咁解，我亦冇諗住再影您。
仲記得渣緊車去食翠華果時，您係架車到跟住唱落花流水。果時我一路望住您，心入面係到諗，您到底會唔會同其他人一樣都係好似落花同流水咁成為我生命既過客呢。果一刻好怕您會同其他人一樣消失係我生命入面。或者，我只係您生命中既流水。
食飯果時，我地傾左好多野，到左而家我都全部記得。包括您屋企您ex d野。最深刻令我愛上您既，就係王晶姐姐。當時真係覺得同您好夾。之後我係屋企彈愛我別走您聽，果個畫面我一世都會記得。有人望住自己唱歌，係一件幾幸福既事。成晚我地就係到攬住睇奧運，就算咩緊果時都一路傾計一路笑。同您係樓下玩車，果晚既畫面，好靚。
我成日都諗，您咁靚咁多人揀，點解要揀我。不過我好多謝您。。。好多謝您可以鍾意一個咁差既我。您將我係深谷到拉返出黎。同您一齊之後我真係好開心，每一日每分鐘都變得好有意義，行街見到所有野，都會諗起岩唔岩您，上網睇到既新聞，旅行既地方，都會諗您鍾唔鍾意。我知道有個女人等住我去照顧，就算我幾憎返工我都要努力去搵錢黎照顧您。
9 月3號果晚，我第一次感覺到攬住人訓係幾咁溫暖。我仲記得您係架巴士到同我講有首歌好岩我，係三生有幸果一句：貪玩的終會覺悟 無需找尋 新的人。我果刻真係好感動，好感激您咁信我，一個咁衰既人。
同到您一齊，係我三生有幸。
中秋節果晚，我地係架車到傾計睇月亮。果陣我覺得，幸福其實就係咁簡單。我由細到大都好掛住太古城既中秋，不過咁多年黎一直都一個人，冇機會返去太古城過中秋。果晚您陪我一齊係大古城天台到，睇埋d 無聊magic show，坐係公園到睇月亮。呢d 全部都係我呢六年黎幻想既場景黎。
果一個，係我呢世人見過最靚既月亮，因為您係我身邊。
雖然只係短短幾個月，但您已經陪我做左好多我一直以黎好想做既野。您果時成日都會話想黎睇我踢波。男人其實真係好幼稚，成日都會想好似小學雞咁想比自己女朋友睇自己勁既一面。您亦都好識做咁唔怕悶咁黎睇我踢波。我真係好開心好開心。
多謝您將您既18歲生日交託左比我，唔知您果日開唔開心呢。好對唔住，買左份您唔鍾意既禮物比您。一直以黎我都想將最好既比您，但係就從來冇諗過您真正想要d乜。一直以黎我都係用自己果套黎諗。
去赤柱果日真係好好天。好天其實成日都有，重要既係因為您係我身邊。當日寫既願望唔知您仲記唔記得呢。可惜已經冇機會實現。。。多謝你寫比我既願望卡，多謝您曾經愛過我一生一世。
我將我係東京買既果隻熊仔送左比您。呢隻熊仔我一路都收起左，當時我希望將佢交比我下一個女朋友。我亦從來冇諗過將佢送比任何人，直到我識到您。我仲記得我地帶住隻熊仔周圍走，去到山長水遠去搵果個熊仔event。多謝您咁無聊陪我去左咁多地方，去迪士尼，去行山，去海洋公園玩n次過山車。多謝您咁用心畫張畫比我。多謝您陪我去一齊癲過，任性過。係您令到我既人生完整。
您成日都話您係上天派落黎激我，好想可以比您激一世。
同您去北海道真係好難忘。我仲記得果時我第一次一個人去咁遠旅行。一個人走過d 地方，好想有一日帶自己鐘意既人黎呢到。不過我地果排成日嘈交，所以令到您去果時唔係太開心。所以真係好想今年年尾同您再去過。不過而家已經冇機會。。。我諗我呢一世都唔會再敢去北海道。
感激可以拖住您隻手由2016年走到去2017年。唔知邊個會咁好彩拖住您過2018呢。
好多謝您陪住我過情人節。多謝為我整既朱古力，寫既卡。希望果日既您有感覺到幸福。
好怕再渣車，身邊冇左您拖住我，冇左目的地，冇左想去既地方。
其實最幸福，最完美既一日，唔係要做d 咩特別野，咩特別日子。最普通既一日，同您一齊訓下覺煮下野食，睇下戲已經係最完美既一日。如果個天話比我聽我剩返一日命，我會揀同您去過咁既一日。
仲記得您為我煮既雞翼，真係好好味，我都好想做您老公日日食您煮既飯。
多謝您特登去為我學整牛扒。我知道您為我付出左好多。
或者可能因為過得好幸福，所以我地成日都好好胃口食好多野。而家既我，已經食唔落任何野。
最鍾意同您凌晨出去食kebab。唔知點解我覺得好浪漫。可惜已經冇機會再同您食啦。。。
您成日話我唔讚您，其實我成日都影低您咁多相，拍咁多片，成日訓唔著果時都會開黎睇。呢d就係最好證明。我真係好鍾意您。
同您去郊遊真係好開心，南丫島，大埔踩單車，長洲。呢幾日係我最開心最開心既日子。一直都好後悔睇左您電話，我成日都諗，如果個日冇睇到既話，我地係咪會好開心好開心咁落去呢？
病左要記住睇醫生丫，d藥要食晒先會好返架，要記實自己m到既日子。
6月19號果日係我地最後一日出街。多謝您比左個好似岩岩識果時咁sweet 既weekend我。好想返去同自己講，要好好珍惜您。
唔知你同我一齊呢一年有冇開心過呢。定係我只係如您所講，只係一衰人一個仆街，您生命中既黑歷史呢，您可能永遠都會憎我。成日都好後悔hea左咁多年，如果我以前勤力d返工儲多d錢，您果時係北海道間酒店到話想結婚我會即刻娶您。
唔知您知唔知，我一路都好鍾意同您行超市，我覺得咁樣好浪漫，好似兩公婆咁樣。特別係行aeon同sogo。您離開之後，我連街都唔敢出。香港所有既地方，大部份都有同您去過，好怕再去果到，但係身邊果個唔係您。所以我選擇留係屋企。
打左咁耐差唔多喊足咁耐。其實我係一個好難喊既人黎架。識您之前果6年，我都冇喊過。成日係您面前喊真係好柒。。。
唔知您有冇睇晒呢，話唔定您一見到就del左，可能您根本就唔check email，又可能您睇完都係冇咩感覺，仲係好憎我。不過點都好，我唔想有野再屈係心入面唔講。
其實我打咁多野都係想同您講我真係好鍾意您。我從來冇試過咁鍾意一個人，好驚有一日無左您。johnny depp講過：If you love two people at the sametime。Because if you really loved the first one, you wouldn't have fallen for the second. 我唔知道係咪因為我對您唔好，所以您選擇去同人傾計，搵更好既選擇。唔知點解，同您一齊呢一年，我從來冇諗過去認識新人或者約人。可能因為您對我太好，又或者可能當您鍾意一個人果時，係好自然唔會咁做。點都好，我好感激您，感激遇到您。
好多人都同我講，女仔分手係好狠心，叫我型d咁完，話咁樣將來可能您都會有個好印像，死煩住您既話只會憎我一世。其實您將來點諗我我覺得一d都唔重要。對住您，我真係型唔起。如果型d咁完但係換黎既係有好多野講唔到既話，我情願您憎我一世。
您成日話我唔想比錢您，我其實真係從來冇介意過去照顧您既生活。只係當時我又誤會左您唔洗我比錢，您又誤會左我唔想比錢。就係一個咁既誤會就咁令大家嬲左大家。
可以為人鍾意既人付出，係一件好幸福既事。個個星期六車您，等您係我既責任。您之前講過冇人接過您放學，第時大個諗返，中學果時有人接過您放學會好sweet。唔知您仲係咪咁諗呢。
可能係您心目中，我永遠都係個衰人。但係我想講，我其實只係一個心靈好脆弱既男仔。
果時比大開眼戒首歌既歌詞您睇就係想您知道，對住您，我只係一個好冇自信既人。
我唔解意為您去改變，比您分解再重組。傷害過您，好對唔住。
一直諗住寫完呢封信之後要好好放底您，重新做人。但我同無痛失戀既男主角一樣，睇返d回憶之後，我發覺我比想像中愛您好多好多，所有野我都唔想去delete。我唔知道幾耐先可以放低到您。
或者係我未放低您之前，就等我好好沉醉係我地既回憶之中。
您曾經講過，比我鍾意過，好難會覺得有人鍾意您。果一刻我其實真係好感動，我知道而家您已經唔係咁諗，不過好多謝您曾經比我既認同。
好多謝您曾經鍾意聽我唱歌，您講得岩，您已經堅持左好耐，或者，所有野都會有個限期。我諗我呢世都唔會再敢唱比人聽，我好怕失去既感覺。
仲記得第一次約您唱左天梯比您聽。其實我一直都覺得自己同您唔襯，不過果時您用左天梯既歌詞黎答我，我覺得好sweet。或者，鍾意一個人，就唔應該去理咁多野。
個soundcloud 我唔會close，我知您亦都唔會再想聽。不過如果將來您有一日，好失意，好唔開心，覺得呢個世界冇希望既時候，我d歌會一路係到陪住您，希望可以溫暖到您個心。
但願我可以沒成長，完全憑直覺覓對象。
我一直都係一個長唔大既人，我好怕拍拖去要計算好多野。要重新認識一個人真係好攰。我唔想對住身邊既人都要講大話，所以我一直以黎對住您都好自在，因為您知道晒我d野，我唔需要再去扮。我相信我亦唔會搵到下一個人好似您咁接受到我既過去。
我成日都唔讚您靚，係因為我知道外表會變。因為我自己都唔靚仔，所以我好珍惜人既內心。可能好多人都會因為您靚而對您好，我唔知道如果有一日您唔再靚，果d人會唔會都係一樣咁對您好。您成日話我鍾意影低您好樣衰既一面。其實我一d都覺得唔樣衰，我好鍾意您果種真實感，我一直都講，冇化妝既您，係最靚。早排李克勤有首歌叫失魂記，講一對老夫婦，個老婆有腦退化症。我想講既係，我一直以黎鍾意既，唔係您既外表，雖然我係覺得您好靚，但係即使有一日，您唔再靚，我都會一樣咁愛您。您有病，我會照顧您，陪您睇醫生，買kebab比您食。您老左，講既說話有幾慢，我都會聽。您行路幾慢，我都會陪您行。行唔到，我會抱住您行。我從來唔覺得我地係兩個世界既人。
好多謝您一直係我身邊。成日都比信心我。希望您有一日會完成到您既夢想，我知您一定得。我會真心替您開心。您只係得18歲，好多人錫您愛您，未來有無限既可能。多謝您為我做過既所有野，多謝您，可以鍾意一個咁樣既我。可惜既係，我係我自己最差既時候遇到您，冇機會比您睇我最好既一面。
我冇咩可回報到您，好對唔住。如果有平行時空，希望我係6月19號果日，繼續同您好好咁一齊到老。佢地就黎去日本啦，希望佢地玩得開心d。
我愛您
6-7-2017