痴L線！有條f.1仔同我爭女: 第三章 喊係提醒人安慰自己
我望向發出喊聲既地方，一個蹲低左既黑影若隱若現咁係枱與枱之間出現。
「無事既，女人喊聲，就算係女鬼，我都上啊。」我咁安慰自己。
我慢慢行埋去，突然黑現閃出一對眼睛既反光，清楚見到佢既眼白位。
對望既一刻，我就知佢係邊個，係諾怡。
佢著住一身深紅色既啦啦隊衫，個眼袋腫曬，眼白既微絲血管係近距離下，顯得份外紅。
「嘩，搞咩啊？」我蹲低身講。
「我好驚啊！」話語中帶少少咽哽。
「壓力太大？」我亦刻意咁降低聲線。
「仲有三日咋！我又唔逼得佢地，咁我咪逼自己囉！」佢再一次大喊。
霎時間，我有少少不知所措，平佢係我面前係一個好堅強既女仔，幼氣再加倔強，就係黎諾怡。
不過宜加係我面前既佢，係我見過最軟弱既佢，比一大堆壓力打擊既佢。
我就係咁同佢蹲左五分鐘，我望住佢喊足五分鐘，我全程都無出聲，因為喊到連我都覺得好心痛。
呢一刻好想同佢分擔佢面對既野，但係我只係佢既「朋友」，好似無咩身份。
我真係好廢，自己最鍾意既女人遇到壓力，但我又唔敢同佢分擔。
隨住呢五分鐘過去，啜泣聲都開始收細，本來縮埋一舊佢再次抬起頭。
一同我對望就問：「有無汽水糖？」
我係書包個細袋到攞左粒食剩既最後一粒既提子味波子汽水糖，今次放左係書包，打撚死都唔會溶。
佢會心一笑：「白痴仔，學精咗啵。」
佢既笑容劃破左面上既灰暗，就算無光無燈，笑容都好突出。
「其實……」我對住佢問左個想問好耐既問題。
「唔好講。」佢打斷左我。
「我係想問我地可以起番身未，我蹲到隻腳好攰啊。」我道。
「車，仲以為你想講咩添。」佢再一次低頭道。
佢真係好驚我提起我地之間既禁忌，其實我仲驚過佢。
條線就係我腳底，我再行前一步就……
「放心，講左唔提就唔提。」唔提一世……
「多謝你。」佢走到枱邊攞起自己個書包：「我走先。」
一提到或者掂到呢條底線，佢都特別逃避我，然後又係粒聲唔出咁走到我掂唔到見唔到既地方。
唔知點解，我有少少變左做水泡既感覺。
其實我想對住佢既笑容對一世，就算無得齊，你都比我望到你開心你笑，而唔係行開避開我。
第二朝，佢連朝早早會前既時間都唔放過，又係放低左個書包就跑出班房。
我一番到黎就好呆咁坐左幾個字，一直係到重複諗番尋日既事，諗諗下我就訓著左。
直到我醒左，我依稀聽到有人係我身邊經過，抬頭一望，原來係楠姐。
佢咬住半舊餐蛋治，手上攞住盒朱奶，大模斯樣咁行入黎。
「大佬，番黎啦？」我向佢打個招呼。
「日日都差唔多呢個時候番黎架啦。」佢不肖咁望左我一眼。
「喂，」我睜大岩岩訓醒既眼問：「唔洗一黎用個咁既眼神睥實曬啊。」
「唉，原來你真係個啲埋到洞口都仲要人教你帶套個啲垃圾。」
「咩啊？」我完全唔知佢呢個黃色笑話既用意。
「你知唔知人類最軟弱，最需要其他人安慰係咩時候？」
「有野就講啦。」其實我都知佢想講咩。
「係喊既時候，係人類宣洩極限負面情緒既行為，呢個行為除左攞黎宣洩，其實仲係提醒人叫人安慰自己既行為。」
「吓……」我被突如其來既理論擊倒左。
「點解你尋日唔試下比個攬攬佢呢？」
「你又唔係唔知我地之間係幾老尷架啦……」我低聲道。
「屌，包皮燈籠，點唔撚著。」佢不肖咁望多眼就又行開左。
好啦好啦，終於可以好好靜下啦，朝頭早真係唔慣咁用腦。
「南有喬木，不可休思，漢有遊女，不可求思。」有把熟悉既讀書聲擦過耳邊。
「嗱！」我抬頭望住佢：「言仔！你唔好再逼我用腦啊！」
言仔係一個班房典型既書蟲，亦都係我吐苦水既老友，成日都覺得佢好似丸尾同學。
「無咩既，都係講下南方有舊木，你唔可以去休息，因為舊木唔係你既，漢江邊有條女，你唔可以去溝佢，因為你配唔起條女。」
「點啊，你又睇緊咩書啊？」比佢咁潤一潤又亂左。
「詩經。」佢冷淡答。
「聖經個個？你幾時做左耶撚架？」佢從來都係無神論者，仲要好撚憎耶撚。
「詩經啊！四書五經個個啊！耶撚經個個叫詩篇啊！」佢睜大隻死人眼講。
「咪差唔多，咪又係詩。」我無氣無力咁講。
「你係咪坐得係靚女隔黎多個腦廢左啊？」佢摸我個頭。
我撥開佢隻手：「我隔黎個靚女？楠姐？唔撚係啊？」
「全校都知架啦。」
「哈哈哈哈哈！！！！！！！！」真係笑撚死我。
岩岩佢先用埋佢啲死人黃色笑話潤我，點撚都撚唔到佢會係言仔口中個個靚女。
「笑咩姐你，佢有朵架。」
「咩朵啊？」我止住左我一陣笑聲。
「女神。」三，二，一。
「哈哈哈哈哈！！！！！！！！」我直頭成個人反左係地下笑。
平時佢素顏個樣，係正我隔黎，嘩啲膚質差到啊，掂一掂都會好似石屎咁剝落。
女神？真係可以笑一個禮拜。
「屌你唔好阻住條路啦！」呢個時候楠姐行番黎。
一見到佢就諗起女神兩隻字刻左係佢個頭既畫面。
「女神啊！」我爬番起身：「哈哈哈哈哈哈！！！！！！！！！！！！！！」
「咩料啊你？」佢再一次不肖咁望住我。
「有人……哈哈哈……話你係女神啊，哈哈哈哈哈。」我完全控制唔到我陣笑聲。
「我？」佢指住自己再撥撥自己啲頭髮道：「都真係幾OK架。」
就係因為佢呢句，我笑左成左朝都未停過，笑到橫隔膜痛。
冷靜左一陣。
上堂個時我問楠姐：「你咁靚女呢，點解阿恆社長又……」
唔好問佢有無答我，我就係咁比佢打到我暈左兩堂。