痴L線！有條f.1仔同我爭女: 第四章 我好小氣好煩咩?

陸運會D-1
 
大部分會場布置既工作都做到咁上下，宜家就等PACK上車運去會場。
 
為左趕工，呢幾日咩功課都無做，得罪唔少老師，睇黎又要陪罪。
 
大家都開始休息落黎，只係淨番搬搬抬搭既工作。
 
不過唔是講笑，係五樓社櫃搬落去地下再係停車場上車，真係攰過碼頭咕喱。
 




唯一仲係熱烘烘既地方仍然係後花園，四色四社日日都練到好夜，一個社十幾個口號，十幾個動作，真係好難記得晒既，雖然係我眼中，啦啦隊既作用在於係嗌下加油同揸啦啦球。
 
搬完野，阿恆社長帶晒班社幹出去士多請野飲，我接過佢用親切笑容遞比我既藍力，我跟手就伸隻手入褲浪……
 
社長仲突登攞左張紅衫魚出黎買左箱可樂諗住比啦啦隊，佢話：「阿風，幫我攞番去比佢地，同佢地講係你買。」
 
「哦，好啊。」我突然驚訝：「咪住？係我買？」
 
「係啊，我知你同諾怡有啲衝突，但係佢又以為我幫佢CLAIM單，搶左你功勞，今次送番個功勞比你啦。」
 




「唔好啦掛，呢到都唔少錢，不如我夾番一半啦。」我唔好意思咁講。
 
「傻啦，我做社長，呢啲錢係需要洗，得啦，交比你啦阿風。」佢拍一拍我膊頭。
 
「係囉……最緊要啲關係好。」有一把氣若游絲既聲係社長旁邊發出，一個帶住圓碌碌粗框眼鏡，眼大大，齊陰既女仔突左個頭出黎。
 
佢就係我地社既副社，芷然姐，又叫龍婆然，因為佢個把死唔斷氣既聲就好似羅蘭姐係電視chok出黎個把聲，不過唔係衰人，只係一個一直愛慕阿恆社長既小女人。
 
佢算係咁多傾慕者之中最成功既一個，又係阿恆社長既鄰座，又係副社，日日都會跟出跟入，直頭好似真係女朋友咁。
 




「係囉，就咁話啦。」說罷，社長就同芷然姐一齊走左。
 
究竟佢地係咩關係？
 
我雙手托住三盒既可樂，一路流住汗咁行番去，托到手都有啲酸。
 
當我差唔多行到埋去個時，大家都注意到我。
 
有啲妹妹仔跳下跳下咁拍手，諾怡一見到我就行埋黎。
 
「呢啲可樂要搬去大球場啊？」佢問。
 
「唔係。」我卡左一卡：「係我買既！我買比大家既！」然後理直氣壯咁講。
 
後面無論其他隊長同隊員都熱烈歡呼，淨係得諾怡一個比左個質疑既眼神我。




 
「一個因為落佢面而講粗口鬧我既小氣鬼，竟然咁大方？」
 
「係我……」我未講完既時候佢就講。
 
「係阿恆社長買既？」佢烘到個頭好埋，細細聲咁講。
 
「係……究竟有咩瞞到你。」
 
佢得戚咁笑，然後擘大佢隻大眼望住我，真係好水汪汪，好可愛。
 
「做咩要呃我？」
 
「唔好呃呃聲，只係想……」我轉細聲咁講：「氹番你。」
 




「咩啊？」
 
「無啊！見你個喊晒口咁廢，驚你渴親你個嘴！」我怒羞咁答。
 
「妖！」佢作勢一拳打落我到：「唔理你啊，去死啦，淨係識激我！」
 
「你夠激左我四年啦。」我衝口而出咁講。
 
「咩啵……」佢低頭暗語，一臉楚楚可憐，成個面珠仔突左出黎，好想搣。
 
「你隻死人可愛鬼！」佢奮力搣左佢面珠，頂，我真係好撚大膽。
 
「喂啊！」佢掙扎：「痛啊賤人。」
 
「過左界啦方文風！」佢道。




 
「我知！但係好抵好值！終於搣到你啦！」我一面喜悅。
 
「你宜家係咪想我嬲你啊？係咪想朋友都無得做啊！」朋友？
 
係，我地只係朋友，我差啲唔記得……
 
點解我會咁大膽架？我岩岩做左啲咩黎？
 
「唔係咁架，我無心架。」我低頭認錯。
 
「你真係越黎越大膽！傻仔！賤人！」成個細路女咁對住我大叫。
 
「繼續鬧啦，咁樣我會清醒啲。」
 




「真係唔理你啦！好彩今日進度快左，心情好左，唔係我一定殺左你！」佢轉身嗌：「希仔，過黎飲可樂！」
 
做咩又要提起個青頭仔姐！妖！你要忍住啊方文風！
 
個希仔一聽到就成隻兔仔咁彈過黎，你中一架啦，好心你唔好扮可愛啦！
 
「嘩！有可樂添啊，多謝。」
 
「喂，」我瞪住佢講：「同。我。講。多。謝。啦！」
 
心入面不斷咁咒罵緊佢。
 
「好心你啦，」諾怡拍一拍我：「小氣到你同個細路仔計較，唔準嚇佢！」
 
青頭希仔突然又向我報以一個天真無邪既笑容，但係真係唔知呢副嘴瞼下，賣咩狗肉。
 
一個中一生無可能咁天真，佢一定有啲野！我估。
 
我深深咁吸左一口氣：「哦！」
 
「好啦希仔，番埋去啦。」
 
「怡姐姐，咁你係咪會幫我架？」幫？幫咩啊？？
 
「得啦，完左陸運會就幫你！」佢摸左一摸青頭希仔個頭。
 
「幫咩啊？！」我驚訝道。
 
「唔關你事啊。」講完佢又攞起啦啦球行番埋去。
 
又係咁，唔通真係我咁小氣？唔係啊，好正常。
 
我就係咁坐左係到望住佢，望住左三個鐘，佢做野認真又笑得天真，對其他隊長又好又溫柔，嗚嗚嗚，真係好正。
 
好彩我係總務，坐係到又唔會阻碇，攞正牌。
 
「嘻嘻嘻……」我一直傻笑。
 
正當我笑得興起之際，突然有人用手彈我額頭：「屌那星，邊個彈我？」
 
「係我啊，淫賊！」楠姐又再次出現了。
 
我？！淫賊？！點解啊，我都無動手。
 
「咩淫賊啊？」我驚訝問。
 
「我地成班藍社啦啦隊望左你三個鐘，係度望住啲妹妹仔傻笑，信唔信我叫FBI拉鳩你啊啦？」
 
「咁係好正啊嘛。」我既視線又落番諾怡身上。
 
「你唔顧下自己都顧下阿怡啊，你做到咁明顯，唔係唔比得人知架咩？」
 
死啦！好明顯咩？
 
「唔係掛，唔比人知得架。」
 
「所以你楠姐我就同佢地講，話你睇中左個中三既妹妹仔，」佢指向人群中既一個女仔：「嗱，就係呢個啦。」
 
個個女仔，正常高度，高馬尾，瘦削，平既，眼大大咁。
 
「你唔係啊嘛，你唔幫我兜不突止，仲要害我？」我無奈。
 
「點兜姐，你笑到成隻閪咁，人人都望住，幫你兜咪比人話我同你好熟，你咁醜，不了。」
 
「同埋呢個妹妹仔都唔差啊，我無抵毀你既眼光架，高高瘦瘦，最緊要拍得上我嘛，佢都多人追架大佬，你估少野架？」佢接道。
 
「吓？你宜家做媒啊？」我問。
 
「差唔多啦，又廢時你煩住阿怡啊嘛。」佢笑住咁講。
 
「乜我好煩咩……」
 
呢四年黎我都保持距離，都係做社既時候有啲交流，有時又發下佢脾氣咁姐，都……唔算好煩啊。
 
係咪？
 
「講下笑咋傻仔，」佢摸下我個頭：「咁容易唔開心咩？」
 
我撥開佢隻手：「妖！摸都唔係你摸啦。」
 
完左訓練之後，都已經差唔多7點幾，涼風開始吹起，當堂為啦啦隊們消暑，聽日就係正日，我心入面祈求聽日一切順順利利。
 
人開始散，突然楠姐個社啲啦啦隊走左去岩岩個女仔隔離，又係到竊竊私語，烘到勁埋咁講野，又周不時望下我又指下我。
 
頂，唔會係講緊我睇上佢個單野啊？唔好當真啊大佬。
 
佢聽完之後竟然甜笑左，然後又低頭走左。
 
SHIT！
 
唔好啊，我心入面得諾怡架咋，唔好爆出去啊！
 
到時呢啲八婆野又傳到周圍到係，傳到諾怡耳邊，佢又有藉口唔理我啦，我唔想啊！！！
 
正當我苦惱緊既時間，我眼尾望到諾怡攞起左個袋，準備走。
 
「不如，」我唔知點開口：「我送……」
 
「怡姐姐，走咯。」希仔開聲。
 
「嗯，等我一陣啊。」諾怡好溫柔咁應。
 
做乜撚野啊？！咩事啊？！吓！一齊返？？？
 
「吓！你地一齊返？點解要一齊返啊？」我一輪嘴咁問。
 
「咁希仔住我樓下嘛，咁咪送埋佢返去囉，咁夜啦。」
 
「咁唔見你送我返去，我都夜架，我都危險架。」
 
「方文風！」佢睥實咁講。
 
「係……」我自動行開讓路。
 
「不如哥哥你一齊行啦。」希仔講。
 
嗯？啊小朋友你咁識做？
 
「唔得啊！呢個人心胸狹窄，成日蝦我，黑人憎！」佢叉住手咁講。
 
「我邊有蝦你姐！我淨係對住你小氣咋！」
 
「你對住希仔夠小氣咯！」
 
「點解你成日都要同我嘈姐！」
 
「因為你小氣囉！」
 
我同諾怡你一言我一語，大家係到鬧氣。
 
「哥哥都係關心你姐。」希仔突然又整個助攻出黎。
 
「係咁樣關心人架咩？」佢答。
 
「係你唔比我關心你咋！」我大喝。
 
突然空氣好似靜左咁，氣氛都冷淡落黎，佢眼慢慢浮紅，帶哽咽講：「咁惡做咩啵。」
 
「唔係啊，我一時心急……」我開始後悔自己講錯野。
 
「哼！」佢拉住希仔隻手：「憎死你啊！」然後就走左。
 
岩岩先話氹番佢，宜家又激走左佢，有時係咪真係我太小氣呢？咁我又真係唔係佢邊個，無權管佢咁多野。
 
我朋友黎架嘛。

追稿加留言 PLZ