痴L線！有條f.1仔同我爭女: 第二章 提子味波子汽水糖
「唔係啊，係文……」
諾怡打斷：「多謝你啊！唔似得啲人咁小氣！」喂！有骨既！明明我claim架啵！
「唔係呢……係阿……」社長都未講完，佢就轉身走番埋位。
當社長想上前講清楚時，我起身攔住左佢。
「算啦社長！當係你啦！宜家同佢講佢都唔信架啦。」我講。
社長一面無奈，只係拍拍我膊頭，然後轉身就走。
「你係咪傻架？」我上堂個時同番楠姐講。
「咁唔係點姐？講佢都唔信架啦。的確，社長係似啲咁既人黎既，呢個角色岩佢多啲。」我歎道。
「車……」楠姐一面沉默，無再出聲。
當我再側面一望，佢滿面通紅，低頭又唔講野。
「哦！傻女黎既！」我講笑咁拍下佢個頭。
「啊！」又食多下……我屌。
疼痛散後，我再望一下楠姐，佢兩手作枕，將個頭埋在落去。
「喂！唔係啊你。」我細細聲講，因為上緊堂我唔可以咁大聲。
平時霸氣而嘈雜既楠姐，一聽到社長就黯然失色，背後緊係有啲野啦，容我遲下再講。
就係咁，佢頹左一堂，搬都搬唔郁佢。
放學鐘響，諾怡又趕頭趕命咁衝左去後花園，仲快過阿SIR出門口。
「大獲啦！唯一機會都無左，點搞啊！」我心諗
不過點都好，都跟左落去先，話曬我都叫總務，在場再諗下有咩計。
一落到去，淨係見到諾怡一個係後花園自己執緊野，其他社既人都仲未落黎。
有人曾經講過，一個寧靜既環境，一個夕陽，二個人既獨處，對於請求人地既做野機率會大大提升。
可能呢個就係一個道歉既好時機。
我一直係轉角位思考，準備踏制出發個時，有一個矮小人影係我身邊擦過，仲要行到去諾怡既背面。
個種感覺就好似你玩孖寶賽車轉綠燈踏煞車掣加速個時踏錯時機，遲左起步。
「怡姐姐，你洗唔洗幫手啊？」佢用住一把好嬌滴滴既聲問。
我肯定佢一定係聲帶未發育好，我邊有可能遲過一個喉核都無既靚仔起步。
「咦，希仔你黎左啦，多謝你咁落力。」諾怡轉頭答。
哦，希仔，本名可能係姓堅系同醉愛，字希少咁上下。
「仲有個哥哥都好落力啊，不過佢可能怕羞，匿埋左。」佢指向我呢個方向。
嘩你呢個靚仔靠害啊！講到我好似為左避開佢咁！
「哦，有人做錯左野，得罪左姐姐，所以無面見我囉。」諾怡用氹細路既語氣講。
「佢做錯左咩啊？」喂，靚仔唔好扮天真啵！你尋日係到架啵！
「佢掉低曬所有野比姐姐自己一力承擔，仲要用粗口鬧我添，好巴閉架，希仔你唔好學佢啊。」佢真係好毒舌，句句都有骨。
「嗯！」希仔點頭。
「乖啦！」諾怡又摸摸佢頭頂。
屌！遲黎先上岸！我鍾意左佢四年啦！佢都未摸我個頭啊！幾時到你啊！
但係再唔氹番佢，就無機會架啦，我唔可以失去埋「朋友」呢個位……
「車，我見你一枝箭咁出左黎，我睇下你死得未咋！」又口不對心，我屌。
「唔洗對我咁好……」佢低頭小聲講。
「唉！」我大聲咁唉左聲壯膽：「我錯啦！我唔著啦！」
「哦！對唔住大曬啊！你知唔知我尋日幾傷心啊！你知唔知我claim唔到單架！」佢怒道。
「咁係啊！你為左個靚仔係咁多人面前落我面！我都自尊架！」其實你就知我嬲咩……根本唔係咩自尊問題。
「死人小氣鬼！」諾怡用細路女既聲線叉著手講。
死啦！佢突然間咁可愛，呢波攻勢我頂唔住！
我突然間接唔到話，因為佢既可愛已經令我心軟。
我係褲袋入面攞左粒今日手痕買落既提子味波子氣水糖出黎陪罪。
你問我做咩會買提子味波子汽水糖？因為佢同我講佢鍾意食囉！
我初初都對粒糖無咩興趣，又甜又藥水味，但係因為食呢粒糖就會諗起佢，我每次食佢都有種思春既效果。
「妖！溶既！你玩我啊！」oh！shit！
「你個變態佬！都唔知係咪係下體做過咩黎，搞到個大肶位咁熱！」佢接道。
「恰姐姐！你食呢粒啦！」個希仔又係褲袋攞左粒原味既波子汽水糖出黎。
乘虛而入！又比佢入到位！爭氣啦文風！！！！！！
「你睇下！希仔個粒無溶架！」佢低頭向希仔說：「多謝曬！你又鍾意食波子汽水糖啊？」
「因為你鍾意食啊！」我屌！！！！！！！！！！！！！！！！
我都未講出口，你個鳩毛未齊既豆釘竟然……
「你睇下人地啊！我唔理啊！你每日放完飯都要放粒提子味波子汽水糖係我枱面。」
「食肥你，等你無人要！」我戲道。
「我寧願無人要。」佢呢句仲唔係特登講比我聽既。
佢每講一次呢啲野，我個心就好似比人重拳打埋黎咁。
但係我仲未想放棄……我唔甘心。
如是者，我每日放飯之後就多左個飯後活動，就係係間元朗十幾年既老士多買糖，一蚊一粒，我有時會買兩粒，同佢一人一粒，唉，小毒撚心態。
「平日我地只會係朋友，無其他。」
「唔可比人知你鍾意我。」
就係呢兩條約，我就要偷偷地咁放粒糖係佢櫃桶，唔可以比其他人知，要以朋友既心態去奉獻真心。
我一直確信呢一條道路，呢一條所謂「愛不一定要擁有」既信條。
追女追到我咁撚廢，可能大家都會予以鄙視既眼神，但……我真係無得簡。
我唔係一個浪子，我鍾意左佢四年啦，我點會甘心我奉獻左真心既呢四年就咁白白浪費。
所以只要佢眼中有個既立足地位，我拼死都要企硬。
萬一失去呢一個位置，我就玩完。
我只係怕，當佢發現呢一粒糖，再唔係以朋友既身份送出，而係一顆一心傾向既真心，佢唔會再接受呢一粒糖……
距離陸運會仲有一個禮拜，平時淡定既社長都顯得有啲急躁。
我地社既美術都開始趕頭趕命咁設計繪圖同落手做，我身為其中一員，我就緊係走唔到，日日做到七點幾鐘先走。
諾怡佢都唔敢放鬆手腳，更加要啦啦隊練到七點先走，但我地啦啦隊有太多中一生，個個都唔想放太夜，始終真係仲係班媽寶，所以點都要放佢地走先。
我聽其他個幾個隊長講，進度好慢，一個禮拜時間先練到六成半，再唔加強練習就趕唔切，出到場就要出醜。
本來啦啦隊係一個陸運會既陪襯，但唔知幾時開始就有比賽制，因為有社分加，所以呢個「啦啦隊全場總軍」就變得好重要。
距離陸運會三日，個晚我做到八點鐘，其他社員執埋啲野就走左，我就要去埋啦啦隊個到善後，確保啦啦隊無咩事發生。
我從學校後門走到後花園，個度係八點之後就無燈火，我行過下後花園，咩都見唔到，淨係見到好多啦啦隊既啦啦球放左係到。
我突然聽到有陣喊聲，仲要好淒厲……
大家留言比啲動力我，好睇就追下稿啦，感激不盡！！！