痴L線！有條f.1仔同我爭女: 第一章 可愛?邊撚到可愛?
F.1仔，係一間中學入面一直處於受盡人唾駡同無尊嚴既地位，佢地將係小學既所有野都搬到去中學入面，所以係比一班已經覺醒左好耐既高中所鄙視。
少至鍾意食學校飯盒，大至用大聲講野溝女呢啲招數，小學既文化起碼都要用三年初中時間先洗得走，所以上到高中再望番以前既自己，我都有少少唔好意思。
宜家中四既我，對於學校飯盒個香橙汁拌飯同埋用上堂時間大聲講野黎溝女既招數，真係十分厭倦，作為一個高中生，睇黎係要有少少自覺先可以生存。
宜家既我，追求既係行十分鐘，位於大商場既三哥雞肉牛肉清湯加兩蚊杯冰水。
溝女亦都唔會行番從前個套，但係就算行邊套到好，我都係溝唔到女。
不過班中一仔對異性係特別敏感，一搭上左大姐姐，就會對佢地有一種媽媽般既依賴。
講返我，讀左四年書，我就暗戀左佢四年，表白表過三次，一年一次，聖誕聯歡我都會準時同佢表白。
「第三年啦！我鍾意左你第三年啦，你有無咩諗法？」我問
「無……。」佢講完呢句之後，就急急腳走左。
我同佢既關係……我都唔識講，每次表完白佢又問番我可唔可以當無講過做番朋友，然後我又好折墮咁做番佢既「朋友」。
鍾意一個對自己一啲感覺都無既人，真係……好辛苦。
放棄？有人講過時間可以改變好多野，即使係假，即使係呃人，我都要同自己講，朋友呢個位，你坐一世架啦。
因為得番呢個位，我可以坐一世又唔洗比人趕走我。
其實我講咁多F.1仔既衰野，自己何嘗唔係做過中一。
我到宜家都仲好似中一個時，天真到以為比時間佢，佢有一日會接受我。
我淨係我一樣野我上到高中我都係無變過，就係我仲鍾意緊同一個女仔。
佢同我講過：「你唔會鍾意我一世架。」
「咁我等你一百世咪得囉！」我講笑咁講。
「你唔好對我咁好得唔得啊！我自責啊！」佢話。
「你都唔好逼我對你差！得唔得？」我反駁。
所以，我同佢約法三章。
「平日我地只會係朋友，無其他。」
「唔可比人知你鍾意我。」
「我會對你好似……朋友咁好。」
即使萬個不願，我都要妥協。
過兩個禮拜之後，就係我地學校一連兩日既陸運會，所以我地後花園每日放學都會多左一啲此起彼落既打氣練習聲。
佢今年做左啦啦隊隊長，佢平時對社都好落力，今年比佢做隊長佢實好搏命。
啊係！唔記得介紹，佢叫黎諾怡，我叫方文風。一對好平凡既名。
今年我搵左一大班中一仔女黎做啦啦隊，貪佢地易落搭，聽聽話話。
當然，我作為社既總務，又稱打雜，呢啲咁少事我當然要理埋佢。
就係因為咁，惡夢就開始……
「嘩，好可愛啊！」諾怡同另外其他隊長們喧嘩。
他們摸緊一個身高只係得對門既一半再多啲既豆釘，黑粗框眼鏡，典型鏟青頭。
那來的可愛 ?我只係見到幼稚既氣息，同埋鳩毛都未生得齊既節奏。
眼見諾怡都摸得咁高興，雖然我明唔應該怪罪落一個鳩毛得個兩三條既豆釘到，但係都有少少不悅。
我走埋去，賴係幽默咁講：「可愛？邊到可愛啊睇過？邊撚到可愛啊？吓？」
正當我想好似神仙Ｂ咁拍下佢塊既時候，諾怡捉住左我隻手。
「講夠咩啊？好好笑？」佢板起左塊面，好認真咁望住我。
然後成班啦啦隊靜左，隊長們都不肖咁望住我。
「仆街了，玩大左！」我心諗。
「如果你係幫手既話，我無任歡迎，但係你搞事既話，唔該你走。」
識左佢咁多年，第一次咁比佢話法。
「好！咁你地自己搞撚掂曬佢！claim錢自己做番！關我撚事！」我好火咁衝口講左句。
我攞起左之前佢地叫我claim個啲單，一野掉落地，轉身就走左去。
走個時，我眼尾見到諾怡係到喊緊，佢蹲左係地下，其他人係佢側邊安慰佢。
其實我都好肉赤，都心痛，不過佢竟然為左個豆釘話我，幾忍得都唔係路。
同「打在兒身，傷在母心」一樣，我真係好鍾意虐待自己。
佢為左社，真係好認真，就連少少兒戲都容不下。
「啊！！！！我真係好撚蠢啊！」我在街上大喊。
第二日，佢朝早又好早就放低左書包，趕住落去做啦啦隊晨練。
「點樣認衰仔好呢？」我一路搔頭一路諗。
「喂！你又激嬲左黎諾怡啊？」突然有人拍我膊頭。
我側頭一望，原來係我既好鄰坐，楠姐！女人流流叫阿楠！
「一定又係佢同你講左啦。」佢係我旁邊坐低左。
「你條友仔，又話鍾意人四年，對住自己既女神都咁惡架咩？」楠姐道。
「你見到咩？」我道。
「我都係我個社既啦啦隊長，尋日後花園啲野我望到曬啦！成疊單掉落地下咁絕！」楠姐不肖咁講。
「哈！你男人老狗做啦啦隊長！哈哈哈！」我恥笑說道：「做咩啊？表演比阿……」楠姐突然一手掩住左我個嘴，外加一拳打落雞心。
「屌！！」我掩住雞心位講：「得得得，少俠！」
「你試下再講個隻字！！下次就唔係一拳！」佢怒睥我。
「得！大俠！不如你教左點樣哄番你個朋友先啦。」我求道。
「見唔見到佢檯面個疊單，」佢指住諾怡張枱：「claim左佢，然後自己哄番佢！」
「點哄啊咁？」我問。
「新婚個時洗唔洗我教你點入新娘子個窿啊？」女人之家成日講埋啲咁既野。
放飯個時，我趕頭趕命食完碟銀咖哩，拿拿聲攞左佢檯面疊單走去校務處，因為單既野要上午搞掂曬，下午不受理。加上諾怡唔係社幹，無得自己一個簽單同上報，所以一定要社幹claim。我一路搞，一路就諗點哄番佢。
「claim單啊文風？」有人從後搭住我。
「社長你又咁快食完飯？claim單？」我問
我地既社長，中五楊志恆，係我地學校每一個人既男神同榜樣，靚仔，型，親和力強不在話下，最重要係我地班仔都對佢有一份尊重，以德服人，呢個男人，世界級。加上Ａ0，女人們都不禁對呢個男人奉上佢地既高潮。女老師們都成日抽佢水，萬千寵愛在一身。
「嗯，我係claim單，不過係陸軍會啲裝飾錢。你呢？」親力親為！好！
「我都claim啦啦隊啲單。」
「果然都係食飯先黎搞！」我地異口同聲咁講。
「有你幫我睇住啦啦隊，我就煩少樣，好在有你啊文風。」屌，濕濕地添……
「我地社有你咪仲好彩！」我講，佢用力搭一搭左我。
「今年啦啦隊點啊？順利嗎？我都無點探過班。」
呢一刻，我只係諗到尋日個個豆釘。
「順利！班細既好聽話啊！」扮住先都要架啦。
我點會搵個咁既豆釘咁樣激自己架。
「嗯，咁就好啦！走先！」佢將手上既筆放低。
我右手放係心口，左手放係背後，向佢做左一個敬禮既手勢。
為左唔好撞口撞面，我急急腳上番班房，親佢地個個都未食完飯，放番啲claim左既單係佢枱面，然後我去左轉廁所。
一番到去，成個班房又多左好多人，大家食完飯都瞓左係枱，我都唔執輸，黎番個晏教，咁等陣上堂就無咁辛苦。
「我啲單啊！claim曬既！」班房傳來一陣喧嘩。
隨即，諾怡發出好急既腳步聲，越黎越大。
瞓左係到既我，一直期待佢多謝我既一刻，我已經準備好台詞，黎個耍帥。
「社長！唔該曬你啊！幫我claim曬啲單！」吓！！！！！！！！
「我？」社長答。
我抬頭，見到社長係我地門口經過。
「係啊！原來你岩岩咁急行去校務處係為左幫我claim單啊！」佢兩眼發光咁望社長。
反應好先再寫