《我竟然同左一個陌生男仔去歐遊...》: 《波蘭篇- 克拉科夫 Kraków (2.2)》

Andrew? Anthony? 

我依家已經記唔起佢個名。

不過佢叫咩名都唔重要，暫且叫佢做A君。

可能係因為口音既關係，由佢第一下同我打招呼開始，我已經估到佢係邊度人。

A君係我既「同鄉」，亦係一個ABC，同我喺同一個城市長大，嗰種濃厚既英文口音，我一聽就聽得出，只不過佢完全唔識講廣東話。





不只名字，連佢個樣，我都冇乜特別印象，大概係A&F 或者Hollister都會見到嗰種「典型ABC」男，而嗰晚佢又好似真係著左件印著隻海鷗既白色Tee，定還是係麋鹿？

我唔記得，我對佢既印象好模糊。

確實，從佢開始聊我傾計，我地就有數不盡既共同話題，幾乎一拍即合。 

A君話佢趁著假期自己黎歐洲backpacking一個月，不過佢係名副其實既「背包客」，因為佢住宿多數都係couch surfing，即係寄宿於陌生人既客廳/沙發，連hitchhiking都試過，總之都係我冇做過既事。

所以我從來都唔敢叫自己做一個backpacker。





我地去到第一間酒吧既時候有一個小時既無限Free Flow，入面人潮湧湧，連排隊都用左一半時間。

到我地拎到所謂既「Free Shots」 ，說穿了都係啲比較廉價同摻水既酒，但若果一醉真的能解千愁， 飲緊既係乜都唔仲重要。

我同A君由認識嗰一分鐘開始已經有源源不絕既話題，幾乎冇任何Dead Air，但係我好肯定，完全冇對佢有動過心既一刻。

喺臨離開既一刻，我地咁啱趕得及叫多一round，但即使平酒都有佢既酒精成分，加上我連續飲左幾個Shots都係溝左唔同種類既酒，我開始有微醺既感覺，臉上亦漸漸通紅，但A君望落去仲係清醒得很。

A君喺轉場既時候嘗試主動攙扶我，但我一直婉拒，期間我記得佢一直讚我好靚，加上一大推亂七八糟既調情說話，而我只係敷衍地順著佢既說話走。





其實我都未愚蠢得曬，嗰陣已經知道佢動機不簡單，只不過心裏覺得有啲可惜，難得遇到個咁啱傾既人，原來只不過又係一個玩家。

可能係因為佢同女仔調情既經驗太多，先可以令我有一拍即合既感覺。

男女之間既關係，大概真係冇乜可能由「純友誼」開始，或者我同Nick亦如是。

之後去既第二第三三間酒吧，入場時帶著手帶既每個人都有Free Shots，我不斷灌醉自己之餘，A君亦好努力地灌醉我。

我自以為自己酒量好，所以都冇半點猶豫，反正我決斷參加呢個Pub Crawl既原因就係想放縱自己。

我諗當初我選擇自己去旅行都係想不受任何人同任何事既管制，做自己想做既事。

既然依家再唔洗顧慮有一個對酒精敏感既旅伴，我就諗唔到理由去阻止自己。

雖然，我承認到最後，我始終都係一個唔識諗，衝動行事既細路女，根本就冇成長過。





如果睇到呢度令你好奇既話，冇，我當晚並冇斷到片，大部份既事我都記得清楚，清楚得我寧願記不起。