《我竟然同左一個陌生男仔去歐遊...》: 《波蘭篇- 克拉科夫 Kraków (2.1)》

當我真正走出呢個曾經既人間煉獄後，我好像無法再提起勁，內心感覺被某些東西抑壓著，很難被釋放。

喺等待回程巴士既時候，夜晚既涼風冷得刺入骨，顯得呢個地方特別悲涼，就如逝去既亡魂不能安息一般。

縱然殘酷，但我永遠都唔會忘記我嗰日喺集中營走過既每一步，同令人髮指既所見所聞，因為歷史教會我不要遺忘。

越殘忍既事實，我地越要銘記於心。

***





巴士到達市中心時，已是晚上七時多，中午時分我只係喺進入集中營前去嗰度既餐廳食左少少野充饑，到左夜晚已經饑腸轆轆。

幸好波蘭物價與中國二三線城市無異，隨便去一間當地既中高級餐廳，埋單都應該不過港幣一百，同之前喺西歐既洗費完全係差天共地，所以東歐地區必定係窮遊首選。

不過我已經唔記得，我對上一次自己食飯係幾時。喺香港既時候，我好怕自己一個去餐廳食嘢，每一次都有種渾身不自在既感覺。

大概又係我極之矛盾既一面，因為我享受孤獨，同時又害怕孤獨。

琴日去辛德勒工廠前，就已經把Krakow Old Town逛了一遍，唔知道係咪審美疲勞，無論周圍既建築物有幾華麗同精緻，喺我眼中已經變成一片平凡不過既風景。





喺Main Market Square，見到有一大堆年輕人聚集喺Adam’s Statue（即係Krakow最有名既地標之一）前，全部人年紀相若，而且集齊各國面孔，一開始以為又係一個Walking Tour，但明明未見過夜晚出發既Tour。

好奇心催使下走近，細看一位年輕男性舉起既一個小牌，先發現呢個係一個Pub Crawl團。

如果對此名詞唔太熟悉既話，我簡單介紹下。

Pub Crawl呢種活動，其實又係世界各地都有，參加者會獲派一個手帶，然後導遊就會帶大家去附近唔同既酒吧，通常展示手帶就會有Free Shot(s)。

喺每間酒吧停留大概半小時後，又會起程去另一個酒吧，諸如此類。





基本上都係適合啲外向貪玩，或者想識（媾）朋友既年輕遊客體驗異國既夜生活。

記得喺慕尼黑時，我地都遇到過一個Pub Crawl團，但Nick以唔飲得為理由，寧回Hostel訓教都唔願意去放縱自己一晚。

一諗到呢度，我發覺已經一整天冇同Nick聯絡過，而我諗我地的確係無緣無份，冇喺任何地方撞到大家。

趁著附近好似有Wi-Fi，我打開WhatsApp對他「Hey」了一聲，估唔到到最後都係由我做返主動。

等左一段時間，螢幕仲係顯示一個灰剔，我亦放棄等佢既回覆。

而我最後，都係貪玩地加入左呢個Pub Crawl，我當晚只想拋開一切煩惱，乜都唔諗，只暢飲就好。

由於參加人數眾多，我地要分開兩批人，喺唔同既酒吧出發。

或者你地未必覺得，但其實我都係一個頗為被動既人，我冇乜膽量去同陌生人打開話題，不過只要遇到啱傾既人，我就會百分百投入。





因為我差唔多係最遲比錢參加既一個，所以同行既人，早就已經三五成群，我無法加入佢地既圈子，或者早有「目標」，令我變左嗰個「那年十八，母校舞會」既小嘍囉……

直到有一個人主動走過黎同我傾計。