《我竟然同左一個陌生男仔去歐遊...》: 《比利時篇- 布魯塞爾 Brussels (2.1)》

Brussels既第二日，亦係我地喺嗰度既最後一日，不過都有成個full day用。

本身對呢個城市都冇太大興趣，所以只當佢為我地遲啲去東歐既中轉站。

當親身黎到呢度時，就明白點解每個人都叫我唔好黎。

我覺得無關恐襲事，只係佢無法比到一個好既印象遊客，我甚至覺得，住喺度既人，其實都不怎麼快樂。

我地或多或少都做緊重複既野，同之前嗰幾個國家一樣，去市中心最多人聚集既地方，搵Walking Tours，因為連上網睇啲攻略乜乜乜既意欲都冇，有個熟路既人帶你周圍走，可能仲好。





一路由Hostel走到布魯塞爾大廣場（Grand Place），途人不多，街景都好平凡，但當走近廣場時，即刻好似去左第二個世界。

呢度被譽為係「歐洲最美麗的廣場」，亦早早被列入世界文化遺產之一，大文豪雨果都讚美過呢個地方。

整個廣場都極致華麗，即使遠看都可以感受到嗰股堂皇既氣派，連地面都係全部用花崗岩鋪砌而成。

大部分建築物都以巴洛克風格為主，周邊應該有多達三四十棟工會建築，係布魯塞爾最主要既商業區。

廣場既正中央有好多以五顏六色既雨傘黎吸引人既Free Tours，我地求其搵左個比較多人聚集既，因為越多人就越快成團。





喺呢度招攬遊客果然係一個明智既選擇，因為連行都唔洗行就黎到第一站，即係我地身處緊既大廣場。

導遊簡單咁將廣場既歷史講左一次，大概就係呢度十二世紀已經建成，中間經過法國既炮攻，而幾乎全部建築物被炸毀。

但當時既比利時商人大概係資金過分充裕，用最短既時間重建曬所有公會建築，不過絕對唔係粗製濫造，每一個位都做得好精細，而且外牆都被鑲上黃金，令到整個廣場都散發著金碧輝煌既光芒。


 






客觀角度黎講，我不得不承認呢度真係好靚，但只係一種用金錢堆砌出黎既靚，即使有見到幾多刺眼既黃金都好，我都係無法因為呢個廣場而愛上呢個城市，幾華麗幾精緻既建築物，都會有令人審美疲勞既一日。

正正係因為每座建築物都太相似（起碼對我黎講），我望返啲相，已經分唔清邊度打邊度，我諗最有印象既應該係市政廳。



突然見到所有人群都望向同一個方向，原來喺其中一棟建築，有一對新婚夫婦同佢地既屋企人走出黎同下面既人打招呼，氣勢之強令我差啲以為佢地係皇室貴族。但就算唔係，我相信地面上既觀眾，都當左佢地係，因為周邊既環境，只更加襯托到佢地既「高尚地位」。



果然有錢就有資格從高處俯瞰我地呢班平民，過著平凡人無法想像既生活，仁憑我地如何抬頭，都唔會達到同佢地一樣既位置。

跟住既行程，都係圍繞返大廣場附近，雖然身為比利時首都同歐盟總部既所在地，但布魯塞爾可遊覽之處，離離去去都只得嗰幾個。

從廣場走出，不消數分鐘，就經過左一幅頗為有名既壁畫牆《Tintin Mural Painting》。






對於Tintin（丁丁歷險記），我諗香港人都未必會好熟悉，始終大家可能都係睇開多啦A夢同美少女戰士大，至少Nick係咁同我講。

對於比利時卡通/漫畫，最街知巷聞既應該係藍精靈，但Tintin係陪住好多歐洲人人成長既一套卡通片，呢幅壁畫應該勾起左好多人既童年回憶。

除左大廣場外，喺布魯塞爾最多人聚集既地方，一定一定一定係嗰個撒尿小童雕像（Manneken Pis）。



然而親眼睇到，我真係唔覺得佢有乜特別，如果佢唔係一個旅遊景點，被一大群遊客包圍著既話，佢細到我應該會唔覺意行過左都唔知。

據非正式統計，十個黎過既人，有九個見到真身後都會表示失望，此雕像只淪為被眾人視姦後再打卡既一個「景點」。

雖然，佢背後既故事比佢個雕像有意義得多，聽導遊講係據說當時布魯塞爾被侵略期間，外國軍隊準備炸毀整個城市，有一個小童急中生智，用一泡小便澆滅左火種，從此成為國民英雄。





雕像本身確實好普通，毫不起眼，但佢不定期會換上唔同既衫，聽聞每國元首一到訪布魯塞爾，都會為撒尿小童送上新衣以示敬意，佢有差唔多八百套衫，都被收藏於大廣場入面既國王之家（Maison du Roi）。

原來皇親國戚，達官貴人，喺比利時都唔算得上啲咩大人物，區區一個撒尿小童，就已經成功贏得世界各地人民既喜愛。

我想象唔到有幾多人係專程黎到望佢一眼，同時亦有幾多人係失望而回。

好彩我地兩個本身對佢都冇任何期望，自然就唔會失望。

係啊，如果我都唔對太多事情有期望，我諗我就唔會有咁多複雜既想法。