《我竟然同左一個陌生男仔去歐遊...》: 《比利時篇- 布魯塞爾 Brussels (1.3)》

正常黎講，Ｗaffles應該係飯後甜品，但嗰晚成為左我地既正餐，因為超標既糖分已經填飽個肚。

我地去左一間就黎關門既超市，買左少少零食同礦泉水就返左去Hostel。

由於分開房既關係，我地都唔可以入對方既房間，如果想一齊傾計既話，可能就要去返common area，例如嗰嗰陰森既廚房同水吧。

所以都係決定各自返房，不過我地一直用WhatsApp溝通。

我留意到佢WhatsApp張Profile Pic轉左，係一張我喺佛羅倫斯既米開朗基羅廣場睇夜景時幫佢影既一張相。





Me：「張Pro Pic好靚喎！邊個幫你影架？」

Nick：「你話個景定係個人先？」

Me：「梗係講緊張相既構圖啦，角度拿捏得咁好，幫你影嗰嗰一定係大師級人馬！」

Nick：「個人靚仔，點影都靚架啦。」

Me：「你自戀少陣唔洗死既！可唔可以讚下我先？」

Nick：「你係最好既攝影師，不過我覺得我地張合照仲靚。」

Me：「咁係因為人靚，定景靚啊？」

Nick：「因為企喺我隔離嗰個女仔好靚。」

Me：　(smile emoji) x 3

我嗰一刻差啲想同佢講，如果唔鐘意我，就唔好成日講埋啲容易令人誤會既野…….唔係，係已經令人誤會左。





當然，我無辦法直接將我既感受講比佢知， 只能欲言又止。

幸好有emoji既存在。

單純既一個笑臉可以表達開心，感激，無奈，甚至諷刺，任人詮釋。

傾下傾下，都開始由講第二日既行程，去到星座生肖呢啲無意義既話題。

我係白羊座，佢係獅子座。

Me：「啱啱Google左，你估下白羊座同邊個星座最襯？」

Nick：「你地女仔真係好鐘意睇呢啲野。」

Me：「我係受朋輩影響咋！我best friend開口埋口就講星座，搞到我都睇埋一份。」

Nick：「好啦，其實我有時無聊都會睇下啲星座運程既…咁你開得估未？」

Me：「係獅子座啊！仲話100%添哈哈」

Me：「Wait…我記得你好似話過你係獅子座？LOL」

Nick：「我的確係。」

我冇再輸入中。

係，我知道星座呢啲野都係當睇完笑下就算，但又會咁啱，天意弄人。

如果話我地個配對度係0％，或者我覺得會更加make sense。





Me：「咁我地又真係幾襯既，起碼你仲未激到我要執包袱走。」

Nick：「因為我係一個好人。」

印象中佢好似之前都講過一句差唔多既野，不斷強調自己係好人，意義何在？

我發現自己開始過分詮釋佢講既每一句說話，即使只係一句簡單既句子，我諗，我只係想知佢心入面真正諗緊既係咩。

我最矛盾既一面，大概係太想知道對方既想法，但又害怕會傷害到自己。