《我竟然同左一個陌生男仔去歐遊...》: 《比利時篇- 布魯塞爾 Brussels (2.2)》

當日，我地做左一樣從來冇做過既事，就係喺Tour中途離隊。

無他，因為個導遊實在太唔掂。佢講野既方式好似high school啲歷史老師一樣，照住課本讀，唔講我仲以為佢背緊書。

雖然中途離場並唔係啲咩罕見既事，我周不時都會見到有人會咁做，但令人討厭既係佢地多數喺Tour準備完結既時候先走，意圖好明顯就係唔想比tips，其實慳埋呢啲錢又何必呢。

當然我地並唔係為左想逃避比tips而走，但都充滿內疚感，怕比其他人見到會唔好意思。

不過無謂勉強自己去旅行時搞到好似上緊history堂咁，所以中場休息時，就趁機扮去洗手間走左。





好彩做左個正確決定，唔係就悶足兩個鐘。

隨便買左個Waffle醫肚後（唔覺意原來已經連續食左兩餐），喺開滿店鋪既大街漫無目的咁行，日頭既布魯塞爾確實係比琴日傍晚我地黎既時候多人，有返大城市既模樣。

可惜呢啲商業區，對我地黎講同行緊中環或者銅鑼灣冇太大分別。特別之處，就係布魯塞爾有一條頗有名氣既購物長廊——聖于貝爾長廊（Galeries Saint-Hubert ），其實都係貪佢夠靚先被吸引入去行，裏面不外乎名店之類既鋪頭，仲有裝修精緻既咖啡店同書店等等。而喺比利時，就當然唔少得朱古力。

本身諗過可以買黎當手信，但擺入行李箱帶著一包包朱古力飛黎飛去，始終唔係幾放心，覺得會比壓碎，諸如此類。所以最後只變成我地唔要面咁周圍試食。

我同Nick講，我最討厭既就係白/牛奶朱古力；朱古力同咖啡一樣，越苦我越鐘意。





佢笑我口味奇怪，平時咁鐘意食甜品，但居然會食70％純度或以上既朱古力。

「點解人天生就鐘意甜咸味而抗拒苦味？甜味就一定代表快樂？苦味就一定代表悲傷？」我反問佢。

佢嘗試由人體生理結構既方向解釋比我聽，甚至連進化論都提起。

其實我唔需要任何科學既解釋，我只係覺得，人生入面既甜酸苦辣都需要取得平衡，太多苦澀，亦能苦中作樂，但過多既甜份，最後可能只係糖衣毒藥。

×





喺差唔多既既地方兜兜轉轉，最後都係行到返去大廣場一帶，沿途經過左一棟建築物，我地都被眼前既景象所震撼。

之前都提過下，喺我地黎既前一段時間，比利時發生左一次恐襲，死傷眾多，民眾為表示哀悼，都送上鮮花同其他物品紀念死傷者，仲有好多發人深省既標語。

有人靜默企喺度，亦有人放聲嚎哭，令我無可能再對呢座城市存有厭惡感，只有一股心酸感湧上心頭。


Nick同我一齊企喺梯間旁，用平靜既語調問我：「你有冇諗過，你會突然出左咩意外，然後就消失喺呢個世界？」

我諗起喺阿姆斯特丹，最接近「死亡」既一晚。

「消失本身並唔可怕，可怕既係消失之前嗰一刻同之後發生既事。」

唔洗覺得困惑，因為我都唔知我當時講緊乜。





「咩意思？你無端端講野咁玄既？」

「你唔需要明，我好怕解釋。」其實我只係有心隱瞞住我既經歷。

「你嚴肅起黎個樣都幾吸引。」佢揚起嘴角輕輕一笑。

「或者呢個先係真正既我呢。」

「我覺得唔會，你仲係嗰個食野唔識抹嘴既妹妹仔。」

「我都想，人越長大諗野就越複雜，做一個不知人情世故既小朋友咪幾好。」

對於此話題，無論係生活裏邊一方面，我都可以有數不盡既論點，但我好驚，好驚自己會忍唔住喊。

望著面前因為失去家人或摯友而痛哭既人，起碼喺嗰刻，我認為我連唔開心既資格都冇。