《我竟然同左一個陌生男仔去歐遊...》: 《比利時篇- 布魯塞爾 Brussels (1.2)》

同我地以往既流程一樣，第一日去到一個新城市，都係會行去市中心，然後冇目的咁周圍遊覽。

我地去嗰陣，正好離Brussels發生過既一場自殺式恐怖襲擊冇耐，所以街上都多左好多警察巡邏。

唔知係咪受恐襲影響，呢度既氣氛好沉重。

可能係我心多啦，但我覺得途人都向我地投以不友善既目光。

比利時，朱古力同窩夫既聖地，兩樣都係可以甜都漏，好多人都中意既食物。





呢個國家理應都係充滿歡樂，但我連一個笑容都睇唔到。

雖然只係五點幾六點，但市中心入面既商店大部分都已經關左門，街上都冇乜人行緊，好少見一個首都城市會咁僻靜。


「原來唔只間Hostel係咁…根本係呢個城市既問題。」我不禁暗暗打起冷震。


「可能因為之前恐襲，所以少左遊客姐，唔好諗咁多啦。」






「我琴日同朋友講我要去Brussels，佢即刻好激動咁叫我唔好黎，要三思喎。」


「要三思咁嚴重？不過你依家咪又係黎左。」


「係啊，因為我覺得呢啲野冇得計算，touchwood講句，如果我註定左今日要死，無論我喺地球既邊一個角落都好，我都係會死，根本唔關我去左邊度事。」






「咁我諗你朋友都係覺得關心你，覺得依家比利時好危險姐。」


我聽到後只覺得感概：「根本成個地球都好危險。」


Nick大概係唔想我地既話題越黎越沉重，就提議道：


「幾危險既地方都有令人開心既事既，我地去食Waffles啦！」


聽到食，仲要係甜品，我又點會Say No。
 
比利時既Waffle店真係開到周圍都係，就算附近既零售店鋪關曬，仍然有佢地既蹤影。





當我見到被擺放於玻璃櫥窗後，色彩繽紛既水果配料，同濃濃既窩夫味，我就即刻拋開啱啱嗰股不安感。


每一次Nick見到我成個細路仔咁望住啲甜品，佢都會喺我旁邊，陪埋我一齊興奮。


「揀咩野落個Waffle好呢？好難揀啊…　」


嗰刻我最大既難題，就係選擇Ｗaffle既配料，如果人生入面所有選擇題，都係咁輕鬆，就好。


「你鐘意啦，我食原味就得，連要加乜都唔洗諗。」






「你份人好悶啊！食咩都食原味！唔得，今次我幫你揀。」


Nick見我咁執意要幫佢揀，都無奈地順我意。


我自己揀左Oreo，士多啤梨同（好多）Whipped Cream，而我幫Nick揀既就係香蕉同朱古力醬，佢話食士多啤梨好女仔，唔啱佢。



「快啲試快啲試！」我都未開始食第一啖，就先興奮地叫佢食先。


佢冇切開個Ｗaffle，而係用匙羹筆起一羹沾滿朱古力醬既奶油。






「好甜……」佢拎出紙巾抹一抹自己嘴角。


「你講廢話咩…甜品梗係甜架啦。」我都諗唔到可以點答佢。


「講個秘密比你知。」


我即刻俯身傾前。


「其實我除左雲尼拿雪糕之外，唔係幾鐘意食甜品。」






我聽到後百思不得其解：


「下？明明係你提議先架喎……」


「因為我知你鐘意食甜野，你食完次次都會好開心，我見到都會開心。」


佢依然係用平淡既語氣講出一堆會令正常女仔心花怒放既說話。


我都係正常女仔，我聽到難免會心動，尤其是係由我鐘意既男仔講出黎。


鐘意…我都唔知我幾時開始鐘意佢，係從Coffee Sop嗰晚開始？


如果係既話，由佢之後叫錯左我開始，我就應該即刻死心。


奈何喜歡定討厭唔係一條選擇題，而係一種無法控制既感覺。


如果感覺可以好似電腦資料一樣按下delete制，我可能就唔會有咁多不必要既煩惱。