《我竟然同左一個陌生男仔去歐遊...》: 《意大利篇- 米蘭 Milan (2.2)》
間鋪頭原來就係大教堂附近，夜媽媽仲好多人排緊隊。
「聽講呢度既朱古力味最出名，有好多唔同既濃度。你想唔想試下？」
「好啊，咁你呢？想Share食定係點？」
「不了，我好專一，食Gelato永遠都淨係食雲尼拿味，不過係意大利’Vanilla’味反而唔係咁常見。我今次都係試下 Fior di Latte，flower of milk，雖然同雲尼拿唔似，但起碼個樣好似，哈哈。」
「你份人都幾簡單架喎，食意粉又係食最basic既肉醬意粉，連雪糕都鐘意食雲尼拿味。」
佢懶係有深度咁講：「係啊，簡單對我黎講就係最好既野。」
今次食雪糕終於冇令我失望，但我食得好論盡， 加上Gelato溶得特別快，好快我就成隻手汚糟曬，成個細路仔咁。
Nick好自然咁拎起紙巾幫我抹走嘴邊既雪糕漬，對於咁親密既舉動，我差啲紅都面埋，反而佢一啲尷尬既感覺都冇。
唔通我中左一個Playboy既伏？
*
間鋪頭唔大，我地搵左個位坐，一坐就坐左成個幾兩個鐘，到人地差唔多關門我地先肯走。
期間我地冇停過咁傾計，交換WhatsApp，互相瞭解左對方多啲。
原來我同Nick讀同一間U，大家都係今年Grad，只不過佢讀engine，而我讀BBA。
呢兩個系既人本身都冇咩交集，而且大家都係比較摺個堆，所以冇任何共同朋友。
不過講真個句，當佢話我知佢係讀N展既時候，我真係估佢唔到，個樣同啲行為成個花花公子咁款，根本唔似我平時係U見到個啲N展毒男。
我地兩個都係諗住投身社會前逃避下現實，先隻身黎歐洲流浪。
「係喎！你頭先話有個方法可以避開啲人群影大教堂，依家講得比我知未啊？」
「我冇唔記得架，我帶你黎呢間Gelato都係有原因，夠就腳，依家就行過去啦。」
我地跟住我個日自己行過既路去大教堂，行經廣場時，突然有個中東面孔既男人向住我地既方向走過黎。
佢手拎住一紮玫瑰花，然後用英文問阿Nick要唔要買（比我）。
個陣都淩晨12點，周圍冇乜人，我驚佢有咩企圖，就即刻禮貌回絕左個男人，然後拉住Nick走。
「洗唔洗咁驚啊？佢又唔會食左我地既。」Nick一臉疑惑。
「點知喎，我份人好大戒心，尤其依家歐洲咁亂，都係萬事小心好。」
「你肯定你戒心大？你依家同緊一個識左一兩日既陌生人旅行喎，點計先？」
佢又講得岩，點解我對佢會咁放心？我唔知點答佢，所以就求其講啲野敷衍下。
“Let me present you, Duomo di Milano without tourists!”
當我地行到去大教堂時，佢張開手臂面對住我。
「車……仲以為你有咩特別的攝影技巧，原來係等到淩晨冇人先帶我黎，咁暗，點影啊？」我既語氣充滿住無奈。
「唔好咁高要求啦，做人係要取捨架喇，較高啲個ISO，再後期Photoshop下，一定好過你影到前面一堆路人掛。」
我都冇諗住同佢繼續拗落去，就係袋入面拎部單反出黎，搵個靚角度之後慢慢影，咪當影緊米蘭的日與夜囉。
附上深夜的米蘭大教堂一張
「專程黎到，你睇住我影相就夠喇？」我問佢。
「其實我唔係咁鐘意影相架咋，平時用部IPhone5影已經夠做。同埋你冇聽過用眼睛去旅行咩？我用個腦記住啲景，已經好足夠。」
我若有所思：「可能我記性冇你咁好啦，我要睇返相先回憶起影相時個刻既經歷同感受。」
「咁如果你之後睇返岩岩啲相，你會唔會記起我？」
Nick突然用好認真既口吻問我。
面對呢啲突如其來既問題，我個心都有啲亂。
「實會啦，應該得你先咁on9帶人夜媽媽黎影景，點會唔記得。」
佢冇應返我，我見佢拎起部IPhone5對住個教堂自拍左幾張，就話夜喇，要返去訓教，同我一齊行返Airbnb。
行到去廣場入口個陣，我地又見返岩岩個個賣花既男人，佢再次approach我地。
正當我準備急急腳走既時候，阿Nick行埋個男人度，同佢講左幾句，再比左張紙幣個男人，就拎住成紮玫瑰花行黎我身邊。
「拿，送比你既，不過唔好諗多左啊，我見佢夜媽媽咁凍仲企係度賣花咁慘，先買曬幫佢早啲收工咋。」
我望住紮花，心跳開始不斷加速，我當時諗，小鹿亂撞應該就係呢種感覺。
我嘴角不自覺地上揚起黎，我好想表達我既興奮，但又想扮下矜持，女人就係咁矛盾。
「邊有人送花送得咁冇誠意架？不過見你咁好心幫人，我就勉為其難收你紮花啦，哈哈。」
其實我心裏面一直暗爽緊，呢啲咁老套既言情小說情節都會發生係我身上。
×
返到去間Airbnb之後，我地開始認真傾行程。
Nick話佢當初米蘭只係plan左留兩日， 後日就會去佛羅倫斯，大概留3-4日，因為中間想拎一兩日去五漁村。
佢一輪嘴咁講，而我淨係聽到佛羅倫斯已經手舞足蹈咁款：
「我地真係好夾啊！成個意大利我最想去就係Florence，咁我跟住你架喇！」
我嗱嗱聲上網買火車飛，亦都好好彩book到佢間hostel女仔房既最後一個床位。
「點解你一時住Airbnb，一時又住hostel既？」我突然之間好好奇。
「有咩出奇？好多人都係咁架啦，時不時轉下環境，Airbnb有自己一間房係正，但去hostel度識多啲人都幾好玩丫。」
「識人？識女仔咋掛。」我忍唔住要串下佢。
「唔洗啦，已經識到你。」Nick好平淡咁講。
雖然唔知佢咁講有冇咩其他意思，但我都冇諗住繼續答佢，淨係發出左一下不屑既聲音。
我地book好曬車飛同hostel，處理左啲錢銀問題之後，就梳洗休息。
個晚佢真係好乖咁打地鋪，而我都唔記得左朝早佢涼都冇沖就訓左係張床上面，冇特登訓另一邊。
平時除非好攰，唔係既話我訓覺多數都會失眠，而個晚亦都唔例外，雖然我全日不斷咁行黎行去，但我始終訓唔著。
呢個時候，我開始有意無意地，訓近Nick打地鋪個邊。
佢好似好快就訓得好lum，因為五分鐘之後就聽到佢微弱既鼻鼾聲。
其實我真係好憎人打鼻鼾，就算好細聲我都會訓唔到。
好彩佢持續左一陣就冇繼續嘈落去，我偷偷地望住佢訓教個樣，好似個大細路咁，個嘴半張開，似係一起身嘴邊會有好多口水漬個種人。
我越望越覺得自己有啲變態，係度咁樣偷望一個男仔既睡相。
「Jess啊Jess，你之前已經奶過野架喇，千奇唔好再咁快就fall for someone啊。」
呢句係我對自己，最真誠既勸告，我真係希望當時既自己默念呢句一萬次。