《我竟然同左一個陌生男仔去歐遊...》: 《意大利篇- 米蘭 Milan (2.1)》

食完少少野，碌下IG，同屋企人報平安，hea左個幾兩個鐘之後，我地就各自去左洗手間同房準備換衫去食晚餐。

一到Get Ready呢啲時候，女仔慢過男仔是常識吧。

我見Nick手腳好快，好似係洗手間計埋沖涼整左20分鐘就出左廳等我，但佢完全冇催我。

而我都唔係幾好意思要佢等咁耐，就快快手落左個核突妝再化返個新既，換左條及膝既背心裙，再加件ZARA既經典款皮樓係外面，同著左對個期好興既黑色綁帶平底鞋，扮曬斯文淑女咁。

其實我pack既時候都冇諗太多，係衣櫃度隨便搵左啲我成日會著既夏天衫就擺曬落個箱，完全冇諗過啲衫要點襯，諗住一個人去旅行，又唔係成日會有人幫我影靚相，都係hea著架啦。





點知依家無端端多左個旅伴，以後真係要襯過衫先出得街。

「我行得喇。」一出廳，就見到Nick坐係梳化度篤住手機等我。

佢聽到我把聲，就好自然咁望向我既方向，呆望左幾秒。

「估唔到你著起裙上黎，又幾索喎。」佢好輕佻咁講。

我笑住咁反左一下白眼，然後答佢：「First date啊嘛，梗係要著靚啲。」





「岩岩識就咁俾面，我都唔差丫，我特登襯過黎架，平時我出街都係著啲頹O-Camp Tee就算。」

我好快咁上下打量左一下阿Nick，佢上身著住件Polo Shirt，下身卡其色短褲同皮鞋，仲要gel埋頭，個look十足LKF啲Playboy咁。

「唔講以為你著到咁去老蘭蒲添，不過算你啦，起碼唔係著套睡衣同我出去。」

「蒲？我咁大個仔真係連一次club都冇落過。」

我聽到佢咁講，真係答都費事答，佢見我拎起個袋，就即刻行去大門度開定門等我：





“After you.”

×

入夜既米蘭其實都幾涼，我件皮樓好薄唔夠暖，而Nick直程連外套都冇著。

我望住佢：「話就話係夏天姐，你都唔洗著咁少架？」

「你覺得凍？Sorry啊，我份人就怕熱多過怕凍，早知帶埋我件樓比你著啦。」

佢同我講野好似成日都有啲flirty咁，或者係我諗多左啦，但佢真係好識得關心人。

好彩路程並唔遠，我地行左一陣已經搵到我岩岩講既餐廳。其實都只不過係一間普通既家庭式意大利餐廳。

佢唯一吸引我既地方，就係佢大門前既裝飾，Nick都冇咩特別意見，我地就入左去。





坐低打開個menu，都係pasta pizza個啲，我對意大利野冇咩特別興趣，食黎食去都係Carbonara，因為我覺得食呢樣野好難會中伏。

「拿，雖然呢餐係我請，但我都係窮遊架咋，唔該錫住我個銀包。」

「就算你唔講我都唔好意思要個女仔請我食貴野啦，我要個Spaghetti Bolognese就得。」佢指左一下個menu。

「你話架，比左機會你揀架喇。不過我突然好想飲酒，你飲唔飲白酒？」

「我平時好少飲酒，但既然你想飲，咁我就陪你啦，當係慶祝我地平安到達歐洲。」

間餐廳既侍應好似都漫不經心咁，我揮左手幾次佢先過黎。

最後我地嗌左兩個pasta同2杯House Wine。
 




我地落左機之後除左兩塊包之外都冇食過任何野，所以當侍應送野食到張臺時，我地已經狼吞虎嚥咁開始食，完全冇儀態可言。

本身對食物一啲都唔閹尖既我，都接受唔到面前個碟Carbonara，佢一定係落得太多芝士，食起黎個感覺非常之漏，就好似食中菜落左好多味精一樣，食兩啖就要飲一次水。

個碟真係我人生中食過最難食既Carbonara，我好肯定自己煮都好食過佢。

Nick見狀，就問我想唔想交換食，佢話佢個碟肉醬意粉雖然算唔上好食，但都應該好過我碟Carbonara。

我回絕左佢既好意，飲多兩啖白酒當沖淡陣芝士味就算。

「你揀餐廳既taste好似唔係咁好喎。」Nick望住我傻笑。

「我都唔想架，咁我不嬲都係憑感覺揀餐廳既人，我係香港連OpenRice都冇用過。」我扁住嘴，帶啲失望既語氣答佢。

佢反而安慰返我：「唔好唔開心啦，你請我食M記我都OK架喇，何況係意大利餐。其實岩岩係廳等你個陣，我上網搵到間好似幾出名既Gelato鋪頭，離呢度唔係好遠，等我請返你食甜品啦。女人有兩個胃架嘛，同埋黎到意大利，唔係唔食雪糕啊？」





成餐飯我地都係討論下啲野食有幾難食，同埋杯House Wine有幾難入口。

我仲以為我地會借呢餐飯認識多啲對方，始終黎緊有一段時間都好可能要對住同一個人，如果發現佢有咩唔妥，真係要即刻走人。

我好快食完就埋左單，諗諗下，好似都係第一次請男仔食飯，之前同ex都係AA制，不過第一餐就咁難食，我對意大利即刻有少少失望。

Nick又搶住幫我開門，我笑笑口咁同佢講：

「其實唔洗咁有紳士風度既，我知道你細心喇。」

說罷，佢就帶我急急腳咁行去佢講既Gelato店，雖然越夜越凍，但行係佢隔離，老套啲講句，我覺得好warm。