《我竟然同左一個陌生男仔去歐遊...》: 《意大利篇- 佛羅倫斯 Firenze (1)》
雖然有多一日係米蘭，但我地似乎都對呢個城市唔感興趣，所以第二日我地都係周圍亂咁行，佢又會幫我影下啲偽女神相咁，乜行程都冇。
係米蘭既第二晚我地真係好早訓，而我都逼到自己訓著，因為第二朝早五點就要起身準備搭火車去佛羅倫斯。
臨走前，我突然醒起前晚Nick送比我個紮玫瑰花，因為唔想浪費佢，但我又帶唔走，我就插左係屋主個花瓶度，希望佢唔介意。
米蘭去佛羅倫斯既火車飛大概二十幾三十歐羅，Nick話提早book會平好多。但其實仲有更平既Option，就係搭Flixbus，先十蚊歐羅，不過慢火車差唔多成三個鐘。
雖然我多數都慳得就慳，但去過歐遊既巴絲都知，坐得多長途巴士其實真係好辛苦，有時真係寧願比貴啲都唔想作踐自己，唔係之後玩都玩得唔開心。
一個幾鐘之後到左佛羅倫斯既中央火車站（Santa Maria Novella Railway Station），亦棕色調為主，襯托得起呢個古城既感覺。呢個火車站係以佢對面既Santa Maria Novella教堂命名。
個陣先朝早８點度，車站入面既人步伐都好快，估唔到黎到歐洲都會有種好似係香港返工時間逼港鐵既感覺。
「前晚唔記得同你講，呢次我book既hostel有少少遠，唔係太近市中心，出入一係行一係搭車，你o唔ok？」
我心諗，都黎到啦，你叫我行兩個鐘我都冇辦法。
「冇所謂啊，其實我幾中意行路，不過唔係拎住咁多行李個陣囉。」我望住我堆野，真係頭都痛埋。
「放心，我梗係唔會要你拖住呢堆野行成粒鐘啦，我地可以搭Train，一個站就到，不過落車之後都要行多五分鐘，最多我幫你拎個袋喇。」
Nick又嘗試展現佢Gentleman既一面。
「唔洗勞煩你喇，區區五分鐘姐，我平時都有做開運動，唔好睇我細細粒就以為我好弱雞，我分分鐘大力過你，遲啲同你玩拗手瓜都仲得。」
言語間我暗示自己並唔係一個普通既港女。
「你話點就點啦，到時唔好求我幫你拎啊。」佢竟然帶住恥笑既口氣講。
×
我地好順利就到達左目的地。到呢刻我都記得好清楚，一入間hostel我就聞到一陣強烈既紅酒味，仲要係好cheap個隻。
係個度住左幾多晚，我就聞足幾多晚，好彩陣味只係徘徊於大堂同common area，我地之後分別check-in入自己間房既時候就呼吸返正常既空氣。
「其實今次係我第一次住hostel，除左陣紅酒味之外，比我想像中乾淨好多。」
「乜你以前去旅行次次都係住酒店架？有錢女喎。我之前去美國都係住hostel。」
原來Nick今次唔係第一次自己去旅行，怪唔知得比我有條理得多。
「唔係啦，只不過之前去旅行都係同屋企人或者或者跟團去，未試過自己去旅行，我都想試下住hostel好耐，今次歐遊終於可以瘋狂住。」
「咁你都幾大膽吖，一個女仔第一次自己去旅行就去咁遠，仲要咩準備都冇，好彩你遇到一個正人君子。」
我心諗，邊有人會咁樣讚自己，賊都會話自己骨子裏係一個好人。
「你對我既大恩大德，小女子無以為報，不過唔好諗住我會以身相許。」
我講野成日都唔經大腦，一下唔小心開左個基於我地既熟稔程度並唔適合既玩笑。
好彩佢都係一個幾玩得既人：「係歐洲咁多索女，我對你先冇興趣。」
佢漫不經心咁講，我沒好氣咁推左一下佢。
因為間民宿係男女分開房既關係，我感覺上都放心好多。
我唔係介意同男仔一間房，反正都試過同Nick同房，只係第一次住hostel，想熟悉下個環境先。
我間房都叫做乾淨整齊，裝修頗為簡陋，只有六張bunk beds，但空間感足夠，我check-in個陣得兩個女仔係度，就同佢地打左聲招呼。
Cara問我想唔想等陣一齊出去行，因為佢都係今朝先到。
但我諗起Nick，覺得冇理由無啦啦自己走左去，三人行又好似有啲奇怪，所以都係禮貌咁話我同左個朋友一齊黎。
呢個時候，有人敲一敲我地既房門，因為我張床比較近，所以我去左開門，一打開，原來係Nick過黎搵我。
Cara見到Nick，就即刻露出四萬咁口既笑容問：
“Hey there, are you Jess' boyfriend?”
我即刻好緊張咁話唔係，而Nick就乜都冇答，淨係企左係度，對住我笑。
“Aw, what a shame, you two make a cute couple!”
以我同西人相處左咁多年既經驗，佢地對呢啲野真係唔會避忌，因為只是一個善意的玩笑。
雖然我覺得冇所謂，我係驚搞到Nick尷尬姐。
「乜你好驚人地以為我地係情侶咩？」Nick反而若無其事咁問。
「呃…唔係，都係實話實說姐。」唔知點解我仲尷尬過佢。
「知喇傻妹，快啲準備好，我地就出去行下啦。」
佢好快咁摸左一下我個頭，我彎起嘴角微微一笑。
摸頭對於男仔黎講究竟係一個點樣既概念？一種征服感？
我就話有時會摸下一啲好可愛既小朋友，覺得咁樣係表示對佢地既喜愛，唔通男仔摸女仔頭係出於同一個原因？
依家諗返起，我個刻心入面應該真係偷偷地當左我地係情侶，即將要係呢座古城展開我地既浪漫之旅。