《我竟然同左一個陌生男仔去歐遊...》: 《意大利篇- 米蘭 Milan (1.2) 》
我求其補左個頹妝之後就出左門口，間民宿其實就係市中心入面，行去米蘭大教堂只不過係15-20分鐘既事。
好彩上機前係Google 下載左米蘭個Offline Map可以照住行，因為我呢啲窮能絕對唔會捨得買Pocket Wifi用，所以萬能既Google係我成個旅程中都幫左我好多。
果然不出我所料，米蘭市中心真係港女既購物天堂，周圍都係佈置得好華麗既名牌店鋪。
除左名牌，我見得最多既就係大陸人同佢地既行李箱。米蘭個道路設計有少少偏斜，好似係特登方便啲人可以拖住個gip周圍shopping咁，當然好可能完全唔關事。
不過不得不讚，呢度每棟建築物都靚到我目不轉睛咁望住，我唔係攝影發燒友，只係出發前幾日買左部入門級單反配18-55mm既天涯鏡，同睇左幾段YouTube Video，對於影相我仲係摸索既階段。
我每行幾步，就忍唔住拎部相機出黎亂咁影，頭幾張都係用Auto Mode影，但我鐘意挑戰自己，所以影影下就轉左做Manual，作為新手既我，當然唔知影左啲咩出黎。
人生路不熟，雖然望住個Google Map，但我方向感一般，本來20分鐘既路程我兜左成大個圈。
我穿過左Galleria Vittorio Emanuele II，即係米蘭最多人聚集既名牌廣場（其實個度已經好靚）
示意圖：(P.S. 唔見左米蘭啲相，拎住Google黎頂住先，唔好介意，之後個啲會真係我影既相。 )
Galleria Vittorio Emanuele II
(Source: Google)
就見到Duomo di Milano個真身喇！除左名牌之外，佢係我對米蘭既唯一認識，我對Archi都係一知半解，但我知道呢座教堂就係經典既哥德式建築之一，自己親眼睇到，又真係幾壯觀。
正值中午，烈日當空，歐洲既夏天比起香港舒服得多，一啲都唔局促，加埋有少少涼風，真係冇得彈。
作為最出名既景點，教堂前面當然擠滿左一堆堆既遊客，十個有九個都係拎住個自拍神棍係咁喪影，好似未係個景點前自拍過就等於冇去過個度咁。（其實依家諗，有邊個景點唔係 ）
Duomo di Milano－遊客，全部都係遊客。
一支公既我，除左影相都真係冇咩好做，所以我又拎起部相機，左度右度，都搵唔到一個好既角度。
我份人有少少強逼症，張相有小小歪左或者唔夠對稱我都唔會滿意，加上個度People Mountain People Sea，就更加冇可能影到一張岩我心水既相，掙扎左一輪之後，好快就放棄左。
唔知點解，我連入去教堂參觀既意欲都冇，之後既幾個鐘，我都係插住個耳機係米蘭度周圍行黎行去，見到我鐘意既野就亂影一通。
唔記得同大家講，我有一個習慣，就係無論返學返工搭車定係去旅行，都鐘意聽住歌，對我黎講，耳機某程度上重要過我既銀包，出街冇帶既話會周身唔自在，已經持續左好多年，唔會戒到。
係歐洲既第一個朝早同晏晝，就係咁平淡就過左去，我行返去Airbnb個時，已經係四五點左右，估唔到我周圍行但竟然都冇蕩失路，順利返到去。
因為得一間客房既關係，屋主只係留左一條匙比我地，我拎左唯一個條出去，咁Nick就一定要留係間屋到。
我心諗，可能佢仲訓緊呢。
點知一打開門，就見到佢係廚房整緊野食。
「咦，乜你起左身喇？以為你會訓到今晚添。」佢頭髮好亂，一睇就知佢岩岩起身冇耐。
「唔會啦，對我黎講，訓教呢家野，訓5,6個鐘已經好足夠。岩岩Josephine（我地個host）出門之前，叫我肚餓既話就toast啲麵包黎食。」佢一邊講一邊搽牛油。
果然黎到歐洲，就係要不停地食麵包，我對toast左既包完全冇興趣，因為我唔中意個種咬落去好硬既口感，但我係外面行左幾個鐘，途中都冇食過野，所以我都拎起左一塊白麵包，求其搽下jam and butter就食。
「點啊？岩岩出去有冇發現新大陸啊？」佢咬住塊toast問我。
「米蘭同我想像中差唔多啦，行幾步就見到Prada啊，Valentino啊，同埋去左個Milan Cathedral，係幾靚既，不過我cheap得濟，冇比錢入去參觀。」
「係咁架啦，我聽人講話Milan一日遊都夠曬，當初如果唔係班機多位我都唔諗住黎。我見你拎住部單反喎，你好中意影相？」佢眼尾鞘一鞘我部相機。
「鐘意啊，不過唔勁囉，仲係新手。一講起影相就嬲，啲人全部逼曬係同一個位自拍，我冇一張相係影得靚既，不過都預左歐遊係咁架喇，我諗我慢慢會慣。」我長歎左口氣。
「哈，我有一個一定唔會影到人既方法，你咪話請我食飯既，等陣食個陣話比你知。」
佢唔提起我都真係唔記得我應承過佢好多次。
「第一餐就要我請喇？咁唔gentleman架？」我扮曬不屑咁講。
「好啦，講笑咋，其實我岩岩係市中心行個陣，見到有間餐廳好似唔錯，你沖個涼換返套靚啲既衫我就同你去啦，話曬大家依家都係歐洲，你都唔可以丟我架既。」
我望住佢件頹到爆既淨色Tee同褲笑左出黎。
「冇問題，我驚我打扮起上黎靚仔到你唔信咋。」
雖然個刻佢頭又亂，衫又頹，但佢好有自信咁講，我腦海中亦都係度ff緊佢打扮到靚靚仔仔既樣。