自從住咗hall先知，扑野原來可以咁簡單: 《十、兩個女人》10.3
人總係唔願意主動解決一啲自己唔敢面對嘅現實，我都唔例外。
雖然我係一個男人，不過係感情上面我永遠都係婆婆媽媽。
聽完Jacky講之後我曾經諗過同Sammi講清楚，但係我始終無呢個膽量去做呢件事。
可能係我害怕見到佢受傷嘅樣子，又或者係我唔想做衰人，所以我仍然由得呢件事拖得一日得一日。
就好似我唔做呢個決定就可以暪過佢一世咁。
就算知道紙係無可能包住火，我都係好戇鳩咁繼續落去。
Olivia好好，佢從來都唔會迫我做任何抉擇，只係一直默默係我身邊。
咁樣反而令我更加難做決定，我兩邊都唔想傷害。縱使我知道呢句說話由我口中講出嚟實在太諷刺，因為我已經傷害咗兩個女人。
「你想睇咩戲呀。」我同Olivia去咗比較少人流嘅圓方商場戲院睇戲。
「無咩所謂，你揀喇。」Olivia拖起我隻手：「我淨係想食爆谷啫。」
「得喇臭雞，知你睇親戲都要食爆谷喇。」我對佢嘅稱呼都係無變過，不過把口咁臭就係最真實嘅我，對住Olivia就可以完全表露我呢個真面目。
我地去到場之後，我將電話調咗去靜音模式，我地就專心投入係電影到。
套戲睇到一半，我感覺到部電話係到震，我諗應該有人打比我，但係睇緊戲嘅關係我一於唔理咁多，有咩留返拜山先講。
但係部電話隔咗一陣又震過，震到我忍唔住拎部電話出嚟睇下係邊個搵我搵得咁急。
Sammi whatsapp call 7個未接來電。
而家英國時間應該係朝早七點咁上下嘅時間，Sammi點解會打咁多次比我？
然後我就見到佢嘅message： 我發燒呀....好辛苦....好想聽你把聲。
見到Sammi咁樣講，我二話不說就回覆佢：你有無事啊？有無藥？
Sammi：我晏啲會出去買藥....好掛住你呀，如果你係我隔離就好喇。
我：Miss you too，我都想可以係你隔離陪住你。
當時我好專注咁回覆緊Sammi，無留意到原來身邊嘅Olivia已經將一切看在眼內。完場嘅時候，Olivia好冷淡咁同我講話好攰，想返去休息；而我心裡面都想返到去打比Sammi睇下佢咩情況，所以我無理咁多就同Olivia返咗hall。
我地返到hall樓下個時，Olivia同我講：「你之前咪話張願望卷做咩都得嘅？我而家諗到喇。」
「喂，唔好講呢啲住喇，有咩晏啲再同我講好無？」我有啲焦急咁同佢講。
「我講一句，好快架咋。」佢平淡地道：「我嘅願望係你以後好好對Sammi，唔好再搵我喇。」
「乜鳩呀.....唉你係咪睇到我頭先同佢whatsapp？佢病咗，咁我都要睇下佢架嘛。」我嘗試同佢解釋。
「我知，所以我先叫你返去佢身邊。」佢強顏歡笑咁講：「我同你本身都係一件錯事，係時候要將呢件錯事改返啱佢。」
之後Olivia就返咗入hall，留返我一個人企係出面動彈不得。
我唔知道Olivia咁樣講只係因為佢受夠呢種生活，定係佢根本已經唔想再同我一齊；但係我聽到佢話要離開我，我個心就好似被掏空一樣咁難過。嗰次之後，我有嘗試再搵Olivia，但係佢已經唔再聽我電話。
當然，以我一直優柔寡斷嘅性格，我唔敢直接上佢房搵佢，只敢係電話呢個虛擬世界入面對佢噓寒問暖。
最後，我咩回應都得唔到。
我心裡面寄望住有一日Olivia會搵返我，或者回應我嘅短訊；時間一日一日咁過去，一個sem已經完結咗，我等到連Sammi都返埋香港，我都等唔到Olivia搵返我。
「終於可以見到你喇！我好掛住你呀。」當日係機場我企係入境大堂到等Sammi，佢一見到我就好開心咁跑嚟我身邊，就好似係田野上奔跑嘅野兔一樣咁。
「我都好掛住你呀。」我接過佢手上嘅行李箱，另一隻騰空嘅手就用嚟拖Sammi。
「呢個exchange係我人生過得最漫長嘅日子。」
「點解呀？你唔係一直都好想去呢間u exchange架咩？」
「因為無你係身邊，每日都過得好慢好慢。」佢望住我講：「唔知點解會咁鍾意你，哈哈。」
我僅僅以微笑回應，個口本來想出聲講啲嘢：講啲令Sammi開心，又或者佢想聽嘅說話；但係我講唔出口。
之後佢話好耐無食譚仔，我帶咗佢去食。
到埋單比錢個時，我好自然咁拎個銀包出嚟，Sammi好疑惑咁望住我。
「做咩呀？」我係銀包拎出一張一百蚊紙，譚仔姐姐找返十一蚊比我，我又放返佢落銀包到。
「點解你唔用我送比你個銀包嘅？」Sammi扁哂嘴咁問我：「你唔鍾意呀？」
銀包？乜撚嘢銀包呀？我個腦立即回帶，Sammi幾時送過嘢比我。
嘩，估唔到Sammi咁有心思，特登將我影嘅相整成拼圖送返比我。
我即刻whatsapp Sammi：多謝你份禮物！我好鍾意。
Sammi：咁快收到喇？我整咗好耐架喇，你鍾意就好。
整？呢啲唔係應該拎出去比人用電腦整架咩？
不過我都無諗咁多，佢點話點好喇。我連忙將呢個拼圖拎返房，然後將佢掛係牆上面。
屌，仆街喇。當時收到Olivia份禮物後一直無為意Sammi個份禮物幾時寄嚟，時間耐咗就直頭無咗件事，事實上我一直都無收過Sammi份禮物，我諗一定係寄失咗。
「我唔捨得用啊，你整比我架嘛，梗係等你返到香港先用喇，咁樣無咁快變殘嘛。」我講完都覺得好牽強，但係Sammi個樣不虞有詐咁，只係講咗句：「算你喇！靚唔靚啊？整咗成八個鐘架我。」
我連忙點頭，嘗試盡快跳過呢個話題。
送咗Sammi返屋企之後，我買咗一打啤酒返hall。
我打開咗罐啤酒，一次過咕碌咕碌咁清咗大半罐，醉意未有但係心裡面嘅諗法卻更加透徹。
久別重逢原本係一件好值得開心同期待嘅事情，特別係對方喺你望穿秋水、等候已久嘅女朋友。係，我要再三提醒自己，我應該係要望穿秋水地等佢返嚟。
但係我見到Sammi之後一啲開心嘅感覺都無，就連係機場接佢呢個主意都係我個腦話我知：我身為一個男朋友應該要咁樣做，而唔係我由心而發想咁樣做。
睇住無辜嘅Sammi一副毫不知情嘅樣，我好難過，我唔想再咁樣落去。
本來我想嘗試兌現願望卷嘅承諾，聽Olivia講好好地咁對Sammi；但係我根本無辦法若無其事咁落去。
結果我等唔到第二日，我放低手上面嘅啤酒罐就衝咗去Sammi屋企樓下搵佢。
我諗就算我再懦弱都好，都要當面比一個交代Sammi。
就當係我最後可以為佢負嘅責任。
－－－－－－
「做咩咁夜又入嚟搵我呀？聽日咪有得見囉。」Sammi聽到我話係佢樓下之後好快就落咗樓，佢著咗一件白色短袖衫同一條淺藍色嘅工人短褲，同佢係機場套衫唔同；明顯佢換走咗家居服先落嚟見我。
「我地行去一個靜啲地方傾好無？」佢屋苑樓下係呢個鐘數仲有不少人流，係到講分手似乎唔係一個適合嘅地點。
「好呀。」
之後Sammi拉起我隻手，帶我去咗佢屋企附近一個公園仔。
「呢個公園呢，細個嗰時媽咪成日帶我落嚟玩架，好多童年回憶。」佢興致勃勃咁同我講：「果個搖搖板呢，我最鍾意玩架喇。唔知而家仲坐唔坐得落呢，哈哈。」
見到佢呢個樣，我本來想講嘅說話根本講唔出口。
我好怕佢聽到之後會立即跌落絕望嘅深淵到，咁樣同迫我親手殺人無分別。
我凝思緊應該要點做，應該發咗一陣呆；Sammi拍一拍我：「做咩呀你？呆哂咁嘅？」
我深深地吸咗啖氣，係喉嚨深處發出艱難嘅聲線：「Sorry...我地不如做返朋友喇。」
講完之後我不敢直視Sammi，眼睛只能直直地盯實地板上嘅污點。呢啲污點唔係一次半次嘅形成，而係經歷長年累月嘅磨蝕同毀壞先會形成，所以就算而家再努力抹都唔會輕易抹得走。
「點解呀....」我聽到嘅係絕望而沙啞嘅聲線。
「唔係你問題，你好好，係我問題。」我無膽將更加無情嘅真相話比佢聽，我諗佢承受唔起再大嘅打擊。
之後我聽到佢崩潰嘅哭聲，夾雜住好多句「點解」，我個心就好似被揪住一樣咁難受。
「對唔住。」我哽咽地吐出呢句說話。
我諗我會喊唔係因為我痛惜眼前嘅Sammi，而係我為自己傷害咗呢個女仔而內疚。Sammi有幾愛我，佢嘅眼淚就有幾多。
我連伸手觸碰佢嘅勇氣都無，只敢係佢身邊一直坐係到，佢喊咗好耐，我就一直默默地坐係到。
途中有好多人經過，佢地有人向我地投以一個奇怪嘅目光；有人無理我地直行直過，我覺得呢段時間好難捱。
「你係咪有第二個？」Sammi嘅哭聲稍為收細之後，佢冷靜地問我。
「我無呀。」我好細聲咁講。
「咁邊個送禮物比你？你根本收唔到我份禮物。」佢冷冷地道：「當時我都奇怪你同我講話收到份禮物，好有心思好鍾意，我個陣先寄咗無幾耐。後來個郵包彈返轉頭比我，因為我寫錯咗地址。」
佢嘅狀詞直直地打入我腦海之中，使我無言以對。
「到今日我問你個銀包你點解唔用，你仲講到好似真係有呢個銀包咁。」佢忿忿不平地問：「你話我知，你係咪有第二個啊？」講完之後佢又開始喊。
「對唔住。」我又再重複呢句煩厭又於事無補嘅句子。
佢無鬧我，只係愈喊愈使勁，後來索性成個人倒係我懷裡大哭；我摸一摸佢個頭，我諗呢次係我最後一次同Sammi如此靠近親密。
「我係咪做咩都無用，你都唔會同返我一齊？」佢係我懷裡問。
「係。」我狠下心腸地答佢。
或者係我一下又一下嘅衝擊太大，佢之後直程泣不成聲。
我唔打算離開，至少係呢一晚，我諗係屬於我地之間嘅最後一個夜晚。
直到Sammi瞓著咗，我呆望住上空，回想返呢一年以來嘅所有事。
今晚我終於做到個決定。
天色漸亮之際，Sammi雙眼浮腫地醒來，同我講話佢想返屋企。
「比我送埋你呢次。」我同佢講。
之後我地兩個無聲地係稀無人煙嘅街道上行走，呢個早晨嘅涼風特別蕭瑟，係天明之前我地就會正式完結。
「話我知，你地而家係咪一齊緊？」臨入大廈之前，Sammi問我。
「唔係。」我諗呢個係我唯一一句對住佢講嘅真話。
佢聽完之後如釋重負咁點咗下頭，就轉身走入大廈，真正咁消失係我眼前。
再見喇，曾經同我相距八小時嘅前女友。
－－－－－－－－－－
我同Sammi完結咗之後，我就返咗hall搵Olivia。
清晨佢一定係hall，我冒住會比佢roommate問候我祖宗十八代嘅危險，起勢咁拍門。
「臭雞，你同我出嚟呀！」我係門外高聲叫囂。
隔咗無耐之後，睡眼惺忪嘅Olivia開門：「喂，你係咪痴撚線架，而家幾點呀。」
「你同我出嚟。」我拉咗佢去common，閂咗道門，拉起佢隻手：「你可唔可以做我女朋友？」
「痴線架。我咪同你講得好清楚囉，做乜事啫你？」佢不耐煩咁講。
「我同Sammi分咗手。」我認真地道。
「吓...點解啊，點解你唔聽我講好好對佢？」Olivia嘅神色稍為變咗，但係眼神依舊倔強。
「我唔想呀，我唔想對佢好呀。我淨係想對你好咋。」我再次拉起佢雙手：「我後來先發覺自己最鍾意果個係你，你比個機會我好無？」
「對唔住，我做唔到。」佢垂低頭：「我信唔到你。」
「點解.....」
「如果你對Sammi都可以咁樣，可能有一日你都會遇到第二個女仔而咁樣對返我。係呀，我好愛你，但係我你辦法相信你，兩個人無信任係無可能一齊，特別我係知情果個。」佢搖搖頭：「所以我先叫你好好地對Sammi，佢咩都唔知，佢本來應該可以好好享受呢份幸福。無知總好過知得一清二楚。」
「唔會架，我會好好對你架，信我喇。」我力挽狂瀾，希望可以令Olivia回心轉意。
「我信會有因果，我同你種落嘅因，呢個果都要由我地承受返。你覺得我地可以苟且偷生咁享受呢種背叛而得來嘅幸福咩？sorry，我唔得呀。」此際Olivia滿眼都係淚光。
「無架，咩因果啫，我淨係信我愛你呢個事實。你張願望卷我無應承你架，上次果個唔計呀！」我歇斯底里咁講。
「咁好，我而家講多個願望。」
「我希望你以後都唔好再搵我，比個機會我放低你。」佢顫抖地講出呢句說話，之後就奪門而出。
我無力地坐咗係地上，直到窗外嘅光線猛烈得刺入我眼簾之中，我先識得企返起身返去我房。
我從來唔相信咩因果報應呢一回事，我覺得人嘅一切都係自己掌握係自己手上面。
或者我而家得嚟嘅下場唔係我出軌而得來嘅報應，只係我無辦法再令我身邊最愛嘅女人可以重頭地相信我一次。
我瞓醒之後慣性地去check一check信箱，睇下有無咩重要嘅信件寄比我。
我望到入面有張卡，上面寫住「願望換領卷」，正正係我送比Olivia個張。
我拎咗出嚟望咗眼，然後一下將佢掉咗落垃圾桶到。
張卡嘅背面寫住：這恐怕只能成為遺願了。
－完－