自從住咗hall先知，扑野原來可以咁簡單: 《十、兩個女人》10.2
由於我咩都無準備到，係我靈機一觸之下，我都總算諗到可以送咩比Olivia頂住先。
「我地今日去邊呀？」Olivia同我一齊係hall出發，我地未入地鐵站已經見到街裡愛人一對對。
好多女仔手上面都捧住一束束鮮花，唔講仲以為我身處係旺角花墟，望住啲人辦完年貨咁成街都係花海一樣。
「一陣你咪知囉。」我故弄玄虛咁講。
其實無預早安排之下，我都唔能夠帶佢去咩特別嘅地方，所以我決定同佢去個好玩嘅地方。
而咁樣就可以佔足一日時間，唔洗諗咁多節目。
「唓，懶神秘咁，原來帶我嚟AIA咋。」我諗因為情人節嘅關係，人龍同上次hall鬼屋簡直係差天共地，今次條龍打蛇餅打到出摩天輪，我諗單單係入場都有排等。
「咩呀，AIA正呀，啲機動遊戲點都好玩過海記同迪迪尼喇！」我理所當然咁講：「知你鍾意玩先同你嚟，係咪好有心思先。」
講完都覺得自己好無說服力，但係見Olivia都笑得幾開心，我就知無帶錯佢嚟。
「你係咪咩都玩架。」排緊隊個時，Olivia向園內張望：「我見到啲機動遊戲好似好正，好想玩哂佢！」
「你唔驚咩？」我循例地講句：「都幾大離心力架喎，你會唔會好似上之鬼屋咁喊哂口架。」
佢打咗我一下：「個啲點同呀！真係恐怖呀嘛。機動遊戲我又真係唔驚喎，我好enjoy離心力架！」
見佢一臉興奮嘅樣子，我就同佢講：「咁一陣我就同你玩哂最刺激個啲，唔好嗌救命呀你！」
「怕你呀！」
雖然條蛇餅好長，不過只係入場嘅關係，我地排咗十幾分鐘就入得場。
AIA呢啲短期嘉年華食水係就係深咗啲，不過每次我都會戇鳩鳩咁課金入嚟玩。除咗因為呢到啲機動遊戲比較吸引我之外，啲五光十色嘅場內燈飾都令我覺得好開心。大概係小學嘅時候，我老竇都帶過我去AIA玩，個時我只可以玩啲小朋友遊戲，例如係碰碰車咁樣。不過每次諗返當時嘅情境我都會不禁地會心微笑，所以呢到都算係我一部份嘅童年回憶嚟。
「我地玩咩呀？」Olivia指住全場最高果個機動遊戲：「一係玩呢個呀！好似好正咁！」
於是我地一開波就玩咗呢個叫「G Force」嘅機動遊戲。其實佢個原理就係好似鐘入面嘅秒針咁，當升到最高點就會旋轉式咁向下轉，不斷咁擺動。
「喂，你而家笠水仲嚟得切架喎。」臨排到我地嘅時候，我向Olivia講：「我唔想見到你一陣又喊苦喊忽咁落返嚟呀大佬。」
「得喇，我真係唔驚呀，海洋公園個啲我全部都玩哂架喇。所以唔洗擔心我！」佢拍哂心口咁講：「你擔心下你一陣會唔會嘔住咁落嚟好過喇。」
我地坐上咗呢舊秒針形物體之外，佢開始就緩緩向上升起。因為我地坐咗面向維港個邊，所以上升期間可以高處飽覽哂維港嘅景色，其實香港嘅夜景真係幾優美。
「喂，你望下，好靚啊。」我指住維港對岸，之後望一望佢：「平時都唔覺呢個海咁靚。」
「梗係喇，你平時邊會咁高咁睇呢個景呀。」佢講完之後學我一樣眺望遠方。
「睇住呢個景心情都靚啲。」
「咁都要睇下你身邊係邊個陪你嘅，哈哈。」佢向我拋媚露眼：「有靚女係你隔離，執到喇。」
講完之後我地已經開始向下墜，所以我地都再無講落去。
無可否認嘅，同Olivia一齊嘅時候真係特別開心。
我諗我同Olivia可以咁熟，除咗因為佢同我同hall之外，另一樣地方就係我同佢都係好鍾意玩嘅人。
如果同Sammi嚟，我諗都應該係掟下公仔咁樣。因為Sammi好怕玩機動遊戲，之前同佢去過一次迪士尼，佢都只係敢玩旋轉木馬個啲濕鳩嘢，連飛越太空車呢啲咁雞嘅過山車都係我自己一個人玩，可想言之係AIA佢應該唔會玩到啲咩。
而Olivia就連呢個咁高咁刺激嘅機動遊戲都唔怕，同佢玩就唔洗就住就住。
於是我地玩完一個又接一個，雖然真係好撚貴，不過難得嚟到都唔會諗價錢，最緊要係盡興。
玩咗幾個遊戲之後，我地都有啲攰，所以就行下啲攤位遊戲睇下有咩公仔好掟咁。
「喂，你有無咩公仔想要呀，我幫你掉個返嚟呀。」我地行咗幾檔之後，見Olivia都無咩意慾停嚟，於是我就咁樣問佢。
「吓？唔洗喇。」本來我以為佢就怕哂錢先話唔洗，正當我想開口個時佢就繼續講：「我都唔鍾意公仔嘅。」
「屌，真架？乜有女人唔鍾意公仔架咩？我見啲女成床都係架喎！」我難以置信咁講。
「我又唔係細路女，攬住隻公仔做乜鳩啫。」佢不可置否咁講：「又唔會話好抗拒嘅，但一定唔會想哂呢啲錢掉個公仔返去囉，無咩興趣，有錢我拎嚟食好過。」
Sammi就係好鍾意毛公仔個種女仔，所以情人節我係就寄咗好大嘅Minion公仔比佢。
「睇你唔出喎，以為你係個啲贏到公仔然後要攬住佢影相，再post上ig呃like個啲港女添。」
「收皮喇，我純粹對公仔無咩情意結啫。」佢咁講。
「咁如果我想送個比你，唔知你會唔會要呢？」我指住一檔有黃色雞仔嘅檔口：「我成日叫你臭雞，我掟隻雞比你呀！」
「食屎喇，我唔要呀！」佢笑住咁打我，但係又鬧得好開心咁。
然後我真係比咗四十蚊出嚟掉。
雖然佢話唔鐘意公仔，不過唔知點解都係好想送隻雞仔比佢。
果個檔口係放咗好多樽仔係中央嘅位置，然後廿蚊會有五個膠圈，只要成功將膠圈套係樽身就會中獎。
呢個係個好簡單嘅遊戲，不過要成功就真係唔係咁容易。
眼見好多人掉極都係套唔中個樽身，我都係抱住個試下嘅心態玩。
有八個機會，如果咁樣都唔中就算喇，再課多幾廿蚊落去就真係戇鳩架喇，玩多個機動遊戲好過喇。
「唔好玩住，你望下隔離啲人點玩先喇。」Olivia拍一拍我，然後指住隔離個對情侶：「你望下個男仔，佢手上面有十幾個膠圈，頭先都揈咗幾個出去喇，見佢都飛哂落側邊，你睇準啲先好掉。」
我點點頭，然後就瞄準目標，「三，二，一，飛呀！」我大嗌出嚟，然後一嘢將個膠圈拋向比較接近我地嘅樽身。
當然，第一次通常都係失敗嘅。
然後我又重重複複咁試，到手上面得返三個膠圈嘅時候，Olivia同我講：「得返三個咋，你慳啲用呀。」
試咗幾次之後，我大概已經掌握到個力度同技巧，所以用第六個膠圈嘅時候，差少少就套到落去，不過因為拋得唔夠入，所以都係差少少先套得穩，好快個膠圈就跌返落去。
「仆街，差少少。」我對住Olivia講：「呢個一定得。」
然後我同返相若嘅力度，個膠圈又係好似上一次咁係樽頂搖搖欲墜。
「唉，應該又會跌落去。」Olivia好失望咁講。
唔知行咩狗屎運，今次個膠圈居然停咗係上面，無再跌落去。
檔口職員即刻搖響個鈴鈴：「中獎喇終於！恭喜哂。」
Olivia係職員手上接過個雞仔個時又頓時笑容綻開。
「又話唔鐘意公仔，笑得咁開心。」我揶揄佢。
「你理得我呀，我係鍾意雞仔呀。」佢攬住隻雞仔：「不如幫佢改個名喇，我人生第一隻公仔。」
「屌，改乜鬼，你係臭雞，佢咪臭雞仔囉。」我係佢手上搶過隻雞仔：「喂臭雞仔，呢個係你阿媽臭雞呀，認住佢呀。」
「你咪咁大聲喇，比人聽到實比人笑我地囉！」佢笑到面都紅哂：「唔準你叫佢臭雞仔呀。」
「我掉架喎，我話呢個名就呢個名喇！」
我地打打鬧鬧咁過咗呢晚，話咁快就十點幾。
「屌，差啲唔記得。」我地離場嘅時候，行到去出面嘅摩天輪嘅位置，我拎咗一張卡出嚟：「送比你架。」
「咩嚟架。」Olivia接過張卡：「願望換領卷？」
「係呀。」我覺得自己真係世界上最有急才嘅人，咁嘅禮物都比我諗到：「鮮花會凋謝、會過保鮮期，但係呢張卷唔會。你想要咩願望就話我聽，永久有效，我可以幫你實現」
「真係咩願望都得？」
「你要我帶你上月球就梗係唔得喇。」
Olivia諗咗一陣就話：「我都係諗唔到要咩願望住，咁我留住先喇！諗到再同你講。」
「好呀，無問題。」
然後Olivia係摩天輪下面錫咗我一啖：「多謝你呀，Sean。我今日玩得好開心，好耐無試過咁開心。」
「你覺得開心就得喇，哈哈。」
其實我今日又何嘗唔係同Olivia一樣咁開心。
只係當我一諗到我地係名不正言不順嘅關係，我又會再猶豫到底應該點樣做。
我好似開始對Sammi當初嘅承諾有少少動搖。
－－－－－－
日子耐咗，或者係我面對Olivia嘅時間太多，我發現係兩個女仔之間週旋其實都唔係真係咁爽快嘅事，有時反而將我嘅心拉扯得更加辛苦。
當我對咗Olivia成日，再夜晚返到去要同Sammi傾skype，我根本都唔想理佢；但係我表面上又要做到若無其事咁，仲要扮到好掛住佢咁。事實上我唇上仲有Olivia嘅餘溫，咁耐落去真係會精神分裂。
「喂，你好攰呀？」Sammi同我傾咗無耐就問我。
「唔係呀，做咩咁講。」我擠出一個看似好開心嘅笑容。
「無呀，呢排同你傾計你都好似唔想傾咁，所以先問你係咪攰咋嘛。」佢個樣依然好和平，咁樣再次令我嘅內疚感重新湧現。
「你唔好亂諗咁多喇，可能我呢排多midterm所以有啲煩啫。」我對住Sammi講：「你唔洗擔心我喎，真架。」
佢聽完我講先放心咁點頭微笑，重新展現果個露出虎牙嘅笑容。
我鬆一口氣，然後到Sammi要上堂，又可以結束今日嘅任務。
唔知幾時開始我覺得同Sammi傾計已經係一種任務，就好似我要當值咁，係我每日都要做嘅事。
我同佢傾嘅嘢都係大家個日有咩做啊、上堂上成點之類，其實好無聊，我已經傾到無興趣再同佢傾落去。
不過基於自己良心作祟嘅關係，我依然會堅持做呢樣嘢。
一日拖一日落去嘅日子唔容易過，除咗心理質素要好好之外，仲要提心吊膽驚比Sammi嘅朋友撞到我同Olivia一齊。
不過要撞到嘅始終都會撞到，而撞到我地嘅人唔只識得Sammi，仲識得Olivia。
「喂，個日見到你同Olivia拖手嘅，你同Sammi散咗咩？」Jacky個日係學校canteen撞到我，我同佢大家都係一支公食飯，咁耐無見都順理成章一齊坐低。
「吓......你幾時撞到我地架？」比佢殺我一個措手不及，我頓時啞口無言。
「前幾日係hall area囉，我個日搵個friend所以上咗去，遠處就見到你地喇，不過我趕時間無叫你地咋嘛。」佢好感興趣咁講：「你兩個都通殺喎，靚仔真係唔同啲。頂唔順long D所以同Sammi散？」
「唔係呀。唉屌唔好問喇。」對住Jacky我好難開口講而家個實況，畢竟佢兩個女仔都識，都唔知佢聽完會有咩反應。
不過佢唔係蠢嘅人，好快就get到我講嘅意思：「哦，明喇。屌，你真係識玩。」佢同Danny講嘅嘢一模一樣。
「Olivia明知你同Sammi一齊都肯同你一齊啊？」Jacky追問落去。
「其實本身我都唔係想同佢一齊嘅....其實成件事好複雜，我都唔知點樣講好。」我只好咁樣回應，因為要講真係一匹布咁長。
「咁一句講哂，你鍾意Olivia多啲定係Sammi先？」佢單刀直入咁問我，呢個問題相當一針見血，但係我唔識答。
「我唔知呀。」
我真係唔知呀。
「點會唔知？其實我都奇怪你之前點解會同Sammi一齊，明明一開頭見到你同Olivia鬼死咁好傾，突然間你又走咗去溝Sammi。」Jacky咁樣講。
「屌你唔好成日女人咁係到問咁多喇，我真係唔知呀。」
「如果你真係因為寂寞先搵Olivia，我都唔會多講啲咩嘅。但我由之前上堂都覺得性格上你同Olivia係幾合拍呀，點都夾過同Sammi掛？」
係，佢講得無錯，我同Olivia真係夾好多。
「唔係嘅，我同Sammi都好多嘢講架。」
「講咩呀？讀書定GPA呀？你咁鍾意玩，Sammi呢啲學霸你同佢傾計可以傾啲咩先，你同Olivia傾計又傾啲咩？你自己諗下。」
我又再次比佢講到駁唔到。
「但係我應承過Sammi好多嘢，我話過會等佢返香港。」我嘆咗一口氣：「我唔忍心同佢講分手。」
「你咁樣講，Sammi只係一個承諾，你真正鍾意果個應該係Olivia喇。」
我無出聲。
「承諾呢啲嘢就好易就可以許下，因為無人會怕守唔到承諾而唔作出承諾；承諾許下就一世，但係違反承諾就只係一秒鐘嘅事，好簡單架咋。我寧願你悔疚一陣，都好過因為錯過咗一個人而後悔一世呀。」佢好認真咁同我講。
「唉，咁好難做喎。」
「人生點都要有啲取捨架喇。為咗個承諾放棄真愛，唔值。」佢斬釘截鐵咁講。
「睇嚟你好似有啲經歷咁喎Ching。」我突然覺得眼前嘅Jacky唔似我之前上堂識落果個戇鳩鳩嘅Jacky，而係一個感情大師。
「屌你喇，當你係friend先同你講咁多咋，講撚完架喇。」佢回復返平時嘅樣：「點都好，盡快搞清楚喇。無謂害咗兩個女仔，你都會害埋你自己。」
聽完Jacky講嘅嘢，就好似上咗一課咁。
呢課係喺大學永遠都唔會揀到嘅科，但係絕對畢生受用。