自從住咗hall先知，扑野原來可以咁簡單: 《八、旅途愉快》8.2
呢日之後，我同Jerry係Matt面前依舊若無其事，佢都唔察覺我地之間有咩異樣。
後來佢地比我早起行返香港，所以我地就係河內道別咗。
臨分開之前，我都同佢地交換咗電話。
「返香港再搵你食飯喇，你自己一個女仔小心啲。」Matt不忘同我講。
「得架喇，我個樣好安全，放心。」我故作輕鬆咁講，心裡面有絲絲嘅不捨。
「你返香港搵我地喇，睇住自己。」Jerry望住我講。
我點點頭，就咁樣同佢地道別。
本來我以為我同Jerry就係一段旅行中遇到嘅霧水情緣，返到香港都唔會再聯絡；不過學校實在太細，我地撞到真係一件一啲都唔偶然嘅事。
「梓桐，好耐無見。」開學無耐，我就係教學大樓出面見到Jerry。教學大樓出面有條小馬路，對面就係學生宿舍；有唔少係到上堂嘅學生都會係馬路旁邊嘅垃圾筒食煙，Jerry亦唔例外。
「喂，你又食煙呀？」上完早堂嘅我早已精力盡耗，正準備返Hall補眠。
「基本啦，都話做完一件事就要食。」佢對住馬路呼咗一口煙：「去邊？」
「無呀，我返Hall咋嘛，返去瞓，好攰。」
「咁呀，下次約你食飯，唔阻你休息。」佢揮揮手。
Jerry：00:37 Free tmr? Lunch tgt ?
我以為佢只係寒暄客套嘅約定，居然係兩日後成真咗。
我地相約係校園內一間西式餐廳到食飯，個到主要係賣下意粉、薄餅諸如似類嘅菜式，係三間學生飯堂入面呢間嘅性價比同味道都算係幾好。
「你食咩呀？」坐咗之後，Jerry禮貌地問我。
「肉醬意粉呀，跟雙蛋，熱檸水。」我諗咗諗就答佢。
「飲熱野咁健康？」
「嚟M，暖肚呀。」
佢自己就叫咗個咖哩雞飯，呢兩樣嘢係呢個canteen嚟講都係比較受歡迎嘅食物。
佢出去買完之後好快就拎住一個托盤返嚟，將我份意粉餐放係我面前；然後佢又出去將另一個托盤拎返嚟，上面係佢嘅咖哩雞飯。
「唔該哂。」我笑顏逐開咁講。
「唔洗，基本嘢啫。」佢附和笑一笑：「係呢，咁你之後一個人係河內點呀？」
「無呀，你地都帶哂我去啲景點喇，連粉紅教堂都同你地去埋。我自己就純粹拎住部相機周圍影下啲人同事，好似睇住啲人係街到買賣，用頭頂住一籃籃貨咁，呢啲景象係香港見唔到架嘛。」一講起個旅行我又興奮起嚟，我諗近年最難忘嘅行程都非呢次莫屬。
「哈哈，讀你個科真係唔同啲，影啲嘢都特別有意思，唔似啲港女淨係影啲打卡位。」
「無咩嘅，都係想記錄下自己睇到嘅一景一物啫。」
我同Jerry成餐飯嘅對話交流都非常正常，正常到我差啲遺忘咗自己同佢共渡過一夜。
或者我心裡面覺得佢既然都可以若無其事，所以我都要配合地裝作沒事，咁樣先會避免到不必要嘅尷尬。
「喂，我好似未有你instagram。」佢突然咁講。
「哦，好啊，比你囉。」之後我就係佢電話入咗自己個ig username。
結果當晚，唔單只係Jerry，連Matt都follow咗我。
－－－－－－－－－
自從係香港相遇之後，大家上堂地方一樣嘅關係，Jerry周不時都會搵我一齊食下飯，逢星期一嘅早堂仲會約早半個鐘食早餐。
「今日準時喎。」因為我有住hall，我落嚟返學比起住係觀塘嘅Jerry近好多。
「梗係喇，約咗你幾可會遲。」佢向我單一單眼，然後話：「照舊？」
我點點頭。經過幾次一齊食早餐嘅經驗後，佢知我一定係食全日早餐加熱檸水，所以佢都自動波地幫我買。
「唔該哂喎！」我向住佢都已經少咗份禮貌同拘謹，取而代之係言下嘅不客氣。
「嚟緊方大同個音樂會，有無興趣先？」我食緊塊多士個時，佢問我。
「吓？你抽到飛呀？我用兩個account都抽唔中呀屌。」我激動地講，因為我同過Jerry講我好鍾意方大同，但係就連佢一次演唱會都無睇過。
「總之我而家有兩張飛，咁你睇唔睇呀？」佢好得意洋洋咁望住我。
「睇，梗係睇喇！」我眉飛色舞地道。
而呢場音樂會就造就咗我同Jerry係學校以外嘅第一次約會。
－－－－－－－－－「喂，行快啲喇。」我興奮地拉住Jerry向旺角麥花臣方向行，佢笑道：「咁心急做咩，個位唔會因為你遲無咗架。」
「我好開心啊！我終於有得睇佢個concert喇！」我嘅興奮從未間斷：「你唔明架喇，我之前一直都有聽佢嘅歌，但係我無入個啲咩歌迷會，所以一知道佢有演唱會已經過咗買飛個時段，所以好多場我都無睇到，呢次我知道又抽唔到飛，我好失落咗好耐架講真。」
「而家有得睇Live，終於得償所願喇。」我再次露出一個好燦爛嘅笑容。
「好喇好喇，知你開心喇忠實Fans。我地而家入去喇好無？」佢搖搖上面嘅門票，我就拉住佢入咗去。
由於呢個音樂會係方大同嘅新碟發布會，自自然然唱嘅歌都係佢大碟嘅新歌，好多仲係鮮為人知嘅曲目。
「喂，會唔會悶呀你？」我靜靜係佢耳邊講，當時台上面唱緊首好靜好慢嘅新歌，太大聲講嘢一定會騷擾到其他觀眾。呢啲歌畢竟唔係佢嘅主打熱門歌，如果唔係佢Fans一定會覺得好悶。所以台下面嘅氣氛都比較安靜，呢個好似係方大同演唱會嘅固有風格。
「唔會呀，我閒時都有聽下佢啲歌，幾好J。」佢微微將身體斜向我呢邊講，然後又向返正面。
成晚嘅曲目一直都係以新碟為主，所以都無咩高潮位，直到後半部分先開始唱返啲熱門歌。
「Love Song啊！」一聽到個前奏，全場氣氛都馬上高漲起來，唔少人一度咁尖叫起哄，直到入歌詞第一句嘅個刻。
我寫了這首歌 是一首簡單的
不複雜也不難唱的那一種歌
這不是那種 只剩下那鋼琴的歌
也不是那種 不能只是朋友的歌
這不是那種 兩個人的故事寫在一本小說
那小說裏有誰會在花田裏犯了錯
這就是一首寫給你聽的一個
呢個時候全場好多人都企咗起身，我都唔例外，Jerry見狀都跟住我一齊企起身。呢個畫面好壯觀、好靚，因為全場觀眾都輕輕地左右搖擺自己嘅身體，沉醉係方大同獨特嘅聲線，同埋呢首首本名曲之中。
Love Song 一直想寫一首
Love Song 你給了我一首
Love Song 那DJ會播放
這也許會上榜
不過我只想寫出一首
呢個時候已經變咗全場大合唱位，雖然我本來唔係咁鍾意咁樣破壞一個歌手嘅表演，認為觀眾嘅聲音會蓋過一切；但係原來你係當下嘅氛圍同環境驅使下，呢個合唱位就好似歌手同觀眾嘅互動咁，我竟然覺得好感動，感動到我有少少想流眼淚。
我偷偷望一望Jerry，我見到佢原來都望住我，然後佢微微一笑，將手臂搭係我嘅膊頭上，繼續同我跟住音樂嘅節奏輕輕擺動。
Love Song 一直想寫一首
Love Song 你給了我一首
你就像那夏天的涼風
吹過我的面孔 情翔飛
在我心底 你就是我第一 想說愛你
「真係好好聽，好正。」我忍唔住係佢耳邊講。
「嗯，我都覺。」
之後陸續都係佢嘅舊歌，因為歌曲都係為人熟悉嘅關係，全場嘅尖叫聲連綿不斷，呢晚就係一片歡樂之下完結咗。
「點呀，滿足到你呢個歌迷未？」離開場館之後，我地打算食啲嘢先返去，所以向返西洋菜街個邊方向行。
「好滿足，佢唱Live真係無得頂，聽出耳油，好想再聽呀。」我個腦不停回味頭先嘅歌聲同情境。
「哈哈，你開心就好喇。」佢摸一摸我嘅瀏海。
「今晚多謝你呀。」我真心真意地講出呢句說話，然後向佢露出一個好滿足嘅笑容：「多謝你張飛，仲有多謝你陪我睇。」
「咁有無獎勵先？」佢將塊面哄到好近，然後笑意盈盈咁凝望住我。
我飛快地係佢面上錫咗一下，儼如蜻蜒點水般嘅吻，佢就滿意地向我微笑點頭。
呢晚係我喺河內睇星之外，覺得最浪漫難忘嘅一晚。
－－－－－－－－
音樂會之後，我同Jerry每個星期都會定期咁出街，我地會去睇戲啊、食飯啊、入下長洲大澳啊咁。我地嘅關係就同之前無咩分別，稱唔上係拍緊拖，我諗連曖昧都似是而非咁。我地出街唔會特別親密，不過呢種如幻似霧嘅關係可能就係一段關係最美好嘅時刻，因為大家都無義務同責任去為對方做任何事，自然對大家都無要求；然而對方只要一做啲稍為越界嘅行為，就足以令自己心動一整天。
「喂，我有啲嘢想比你。」個日我地出咗去旺角食黑夜壽司，坐咗之後佢神神秘秘咁同我講。
「吓？無啦啦比咩我呀。」我先係愕然咗一下，再好奇地問。
佢係袋到拎咗個布袋出嚟，上面有好大個M字，然後有少許潑墨做點綴。
「嘩，幾靚喎，邊到買架？」我係佢手上接過個布袋，前後左右咁觀察個袋。
「我自己整架。」佢興高采烈咁同我講：「由揀布料、設計到上色嘅步驟，全部都係我一手一腳整架，勁呀呢。」
「無啦啦去整呢啲嘢，撞邪呀？」我笑住咁講。
「我閒人無聊無事可幹得唔得呀？」佢得戚咁講：「嗱，呢個袋送比你喇。」
「真係送比我架？」我笑得好甜，估唔到佢會自己親手做啲手工嘢比我。
「梗係喇，呃你做咩。」佢笑意愜意咁講。
「好喇，多謝你個袋。」
抱住一個人地送嘢比自己一定要回禮嘅心態，對方仲要係你有好感甚至係鍾意嘅人，所以嚟緊嘅聖誕節，我都決定親手整啲嘢比Jerry。
雖然我地都出咗街一段時間，不過始終有好多未了解對方嘅地方，所以我就搵咗Matt幫手。
「好耐無見喇，自從係越南返嚟之後就無見過你，你呢排點呀？」Matt帶咗我去食越南嘢，因為佢記得我話過鍾意食越式撈檬粉，所以呢間餐廳都係以撈檬做招牌菜
「就嚟完sem，好多project同片要拍，我又有啲freelance係手，所以都幾忙。」我如實咁同佢講下我嘅近況，不過就無提到我同Jerry嘅事。
「咁我咪好榮幸？你咁忙都約我，哈哈。」佢咧嘴一笑，露出一排整齊嘅牙齒。
「係呀，同埋我有啲嘢想你幫下眼。」
「幫咩？」
我大概同佢講話有個朋友生日，想整個皮革銀包比佢，叫佢幫我眼睇下用咩皮、整咩款式好。
「但係我唔知你個朋友咩style，好難幫你眼架喎。」佢聽到我送比男仔之後個樣好似有啲奇怪，但係好快又回復正常嘅神色。
「佢同Jerry差唔多類型，都係斯斯文文戴眼鏡個種男仔。」我講到好似真係有呢個人咁。
「哦......」佢諗咗陣：「好喇，一陣同你去睇喇。」
「唔該哂你呀！呢餐我嘅！」我雙手合十咁同佢講。
我地一齊去咗深水埗一個無咩人行嘅商場，個到有間專門整皮革銀包嘅鋪頭仔。
「我諗你朋友應該會鍾意呢啲簡單款，用深啡色皮。」佢指一指玻璃櫃入面嘅陳列品，係一個短身啡皮銀包。
「啡色皮男人用OK呀可？」我再三向佢確定。
「如果我呢就不了，不過Jerry自己好似都係用類似嘅款，你朋友應該都啱用掛。」佢聳聳膊：「嗱，戴定頭盔先，我唔知你個friend係點，可能都唔啱佢架。」
「得架喇，我肯整比佢都算係咁喇！」我再三向Matt道謝：「今日真係唔該哂你，無你幫我眼都唔知點算。」
佢擺出一個無奈嘅笑容，然後同我講佢約咗人要走先。
我就係皮革皮買咗啲材料，返屋企自己上youtube學點樣整，終於趕到係同Jerry再出去之前整好比佢。
－－－－－－－－－唔知係咪Exam period太忙嘅關係，我同Jerry呢排唔只少咗見面，而且漸漸佢嘅whatsapp都比起以前覆得少咗好多。
而我都因為要做自己手頭上面嘅project，所以無多諗啲咩。
終於去到十二月二十三號，就係exam period完嘅第二日，我地一早約好咗呢日要出去，所以前一晚我都whatsapp定佢先。
我：23:41 聽晚食飯？
Jerry：23:44 Yes，See u tmr
我小心翼翼地將個皮革銀包用白色盒仔裝好，滿心期待Jerry收到之後嘅樣係點。
「喂，今次到我有嘢送返比你。」當晚同佢係餐廳坐低之後，我雀躍地拎咗個盒出嚟：「你開嚟睇下。」
Jerry先係愕然咗一下，然後「哦」咗聲就打開咗個盒。
「銀包？」佢拎咗出嚟，同我上次見到個袋嘅反應一樣，都係前後左右咁觀察；唔同嘅係佢無我當時嘅喜悅同驚喜，個樣相當冷靜。
「係呀，你上次送咗個袋比我，我咪回返禮比你囉。」Jerry個樣半點開心都無，我心裡面有啲失落，但係都故作輕鬆咁回應佢。
「多謝。邊到買架？」佢隨手就放低咗個銀包，並無好認真咁睇。因為我係皮革嘅右下角刻咗個好細個嘅「J」字，如果佢有認真望嘅話一定會見到。
「我自己整架，咩買呀。」我忍唔住衝口而出講咗呢句。
「....」佢沉默咗一陣，然後好艱難地吐出一句：「梓桐，其實你唔洗對我咁好架。」
個下我嘅心情有如晴天霹靂一樣，本來滿心歡喜以為佢會因為份禮物而開心；殊不知換來嘅只係一盤冷水。
「無啦啦咁講做咩啫，你之前都送個自製嘅布袋比我喇。」我依然極力保持微笑，用輕快嘅語調同佢講。
「唉，我又唔係你男朋友，你唔好咁樣喇。」佢將說話講得更加白。
我當下只係覺得好無辜冤枉，明明之前大家都好地地無咩特別事發生過，點解突然一下子變得如此疏離？我不斷回想自己呢段時間有無做過啲令佢不快嘅事，但係我諗極都諗唔到答案。
呢次之後，我再搵Jerry佢都已經愛理不理，一係就Hea覆，甚至直接藍剔我一了百了。我心裡面萬般個問號，於是我又約咗Matt出嚟食飯。
「上次個銀包你送咗比你個friend未啊？」佢一見到我就問我。
「嗯，送咗喇，佢幾鍾意。」我求其略過呢個話題：「係呢，而家放假都無乜機會係學校撞到Jerry，佢呢排點呀？」Matt一直都唔知我同Jerry私下係咩關係，我諗Jerry都應該無同佢提及過，唔係佢應該會問我。
「哦，個衰仔好似拍緊拖。」佢不以為然咁講。
我心中一驚，Jerry拍拖？應該唔會講緊我呀嘛？
「佢同我講，個女仔係去河內Boat trip識架喎，好似叫咩....Michelle。」
Michelle…..我個腦即時係到回想返Boat trip個日嘅情境：
除咗我地以外，船上面亦有其他遊客係到，包括一對香港情侶。
「Hello，我叫Michelle呀。」
「叫我阿恆得架喇。」
奇怪，Michelle應該有男朋友架喎。
「你都應該識架，唔係咩？」佢繼續講：「個日你地兩個一齊去，你無理由唔知邊個叫Michelle架。」
「我暈船浪，瞓咗半日，可能佢地係個陣識掛。」我追問落去：「佢地一齊咗好耐架喇？係學校唔見佢地一齊嘅。」
「聽Jerry講，Michelle之前有男朋友嘅，佢又一直對人有興趣，咪一路keep住同人地傾計囉。到呢排人地感情有事，佢仲唔乘虛而入咩，又比佢得米。」佢平淡咁講：「唔理佢咁多喇，咁樣得返嚟，唔方長。」
我諗返起個布袋上面個M字，原本我無諗個英文字有咩特別意思，我諗而家唯一可以解釋嘅係，原本呢個袋嘅主人應該係Michelle，而唔係我。
我當係閒話家常嘅話題咁同Matt繼續傾落去，一有機會我就即刻轉咗講其他話題。
因為我怕再討論落去，我會將心裡面嘅無奈、失望，甚至係傷心，完完全全咁係Matt面前表露無遺。