自從住咗hall先知，扑野原來可以咁簡單: 《八、旅途愉快》8.3
事後我嘗試搵Michelle個ig出嚟，佢個account係public，所以即使我無follow佢都可以睇到佢所有相片。我發現佢仲未刪走佢同阿恆嘅合照，除咗佢地係越南嘅相之外，我仲見到原來佢地都有去睇方大同個音樂會。
「嚟緊方大同個音樂會，有無興趣先？」我食緊塊多士個時，Jerry問我。
「吓？你抽到飛呀？我用兩個account都抽唔中呀屌。」我激動地講，因為我同過Jerry講我好鍾意方大同，但係就連佢一次演唱會都無睇過。
「總之我而家有兩張飛，咁你睇唔睇呀？」佢好得意洋洋咁望住我。
好奇心真係一件殺人兇器，真相一揭開就足以令你馬上氣絕身亡。
我不禁冷笑咗一下，唔只係個袋，就連個場音樂會都係佢同Michelle睇唔成先同我睇。
原來一切都只係借花敬佛，嚴格嚟講我係執緊二手飯，Michelle唔要嘅嘢佢先退而求之比我，等我仲沉醉係我自以為係曖昧不清嘅關係裡面；實際我只係佢嘅後備，正選唔出席先由我頂上，呢個安排真係精妙至極。
雖然心裡面好想質問Jerry，不過諗深一層，我又有咩資格去打爛沙盤問到篤？畢竟有句說話佢無講錯，佢從來都唔係我男朋友。
－－－－－－－
自從住咗hall之後我就好少返屋企，唔係因為我同屋企人關係唔好，反而我同家中兩老係無所不談；只係我幾乎將成個屋企嘅物件都搬哂入宿，所以方便起見我好少會特意返屋企過夜。
不過我一有時間就會返屋企食飯，聖誕節個晚Jerry當然無約我出去，我唯有返屋企取暖。
「爸爸，媽咪。」入到屋之後我就向坐係梳化嘅媽咪、係廚房煮緊飯嘅阿爸講。
係呀，係我屋企女人嘅角色同男人係恰恰好相反，我阿爸返工之外都會做埋煮飯佬嘅角色；而媽咪就只會負責洗碗嘅工作，因為佢不擅廚藝。
「返嚟喇？今日咁凍，你又著咁少，凍死你呀女。」阿媽抬頭見到我只係著住條黑色短裙，劈頭就轟炸我。
「得喇，我唔凍呀。」我向廚房大叫：「今日有咩食呀爸爸！」
「你飲湯先喇，我煲咗花膠響螺湯呀。」佢向返廳大叫。
「嘩，正呀。」之後我打開放咗係飯枱上面嘅湯煲，裡面熱騰騰嘅香氣迎面而來。
「聖誕節無街出咩桐桐？」我地一家四口，連埋頭先一直係房打機嘅阿哥坐低咗之後，阿爸夾咗條菜同一隻雞翼比我，然後望住我問。
「擺明就無人約先要返嚟食飯喇！」阿哥一臉輕佻咁嘲笑我。
「食屎喇，好過你日日落堂都即刻衝返屋企打機呀，死毒撚。」我不甘示弱咁講。
「喂，女仔唔準咁粗魯呀下。」媽咪聽到我咁講即刻怒視我，用筷子敲敲我個碗。
阿哥見狀馬上露出個勝利般嘅笑容，我偷偷地向佢做咗個鬼臉。
「係，知道。」我即時收歛返：「我住hall少見爸爸媽咪，返嚟陪佢地得唔得呀，吓？」我特意拉長個尾音同我阿哥講。
佢之後就無理我，繼續低頭用電話打機同趴飯。
「好喇好喇，你地兩兄妹唔好嘈喇。」阿爸無理好氣咁講：「難得桐桐返嚟食飯，阿哥你唔好咁樣話佢喇。」
幾時都話呢個世界最愛最錫我嘅男人一定係阿爸。難怪啲人話父親係女兒上一世嘅情人，雖然我內地唔相信真係有前世今生呢啲咁唔科學嘅事，不過我都覺得阿爸由細到大都真係特別錫我對我好，而且思想都比一般嘅父母開通得多，所以我有咩心事都會同佢講。
「桐桐？我入唔入得嚟呀？」食完飯之後我就返咗房，阿爸隔咗陣就嚟敲我道門。
「入嚟喇。」我大叫。
阿爸入咗嚟之後坐係我床邊就開始問我：「聖誕都唔出街玩？唔開心呀？」
我嘟起個嘴，然後鼓起勇氣問佢：「爸爸，係咪每個男人都可以將性同愛分得好開架？」
佢聽完我講之後臉色沉咗沉，佢先答我：「桐桐，呢個世界唔係淨係男人先會咁，如果你係一個逢場作戲嘅女仔，或者你都可以將兩樣野分得好開。爸爸唔知你發生咩事，不過你已經大個女係成年人，有啲嘢你自己一定識諗，最緊要唔好做啲傷害到自己嘅事。」佢摸摸我個頭：「我唔想見到我個女喊住返嚟見我，你自己係外面住要好好照顧自己，OK？有咩事都好，有爸爸媽咪愛你。」
我聽完之後鼻頭一酸，想講嘅說話都哽咽住係喉嚨間，久久未能發聲，所以只好對佢用力點頭。
「記得屋企人永遠都係最錫你最支持你，有咩唔開心就發洩下，唔好行歪路，知唔知啊。」佢再三向我叮嚀。
聽完阿爸講之後，心裡面擺脫同放低Jerry嘅決心就更大，無謂為咗一個咁嘅男人而糟塌自己。
我當時的確以為自己能夠做到。
之後我就Block哂Jerry嘅whatsapp、instagram，總之佢會搵到我嘅途徑我都全部刪除哂。我心裡求神拜佛希望開sem之後唔好再係學校撞到佢。
我諗佢可能會覺得奇怪，點解我會突然間消失咗；又或者佢根本唔會在意我呢個人存在與否，因為佢身邊已經有個對佢嚟講更加重要嘅人。
為咗加快放低佢嘅節奏，我刻意係呢個sem讀18credits，即係六科，等自己可以忙到好攰，攰嘅程度係每日一返到嚟就即刻可以瞓著，第二日又一早出去上堂或者做野；咁樣或者我會過得好啲。
呢段日子入面陪住我嘅唔單祇係忙碌，仲有Matt。
「喂，你係邊呀？我差唔多行到喇。」電話入面傳來Matt爽朗嘅聲音。佢一得閒就會嚟我學校搵我食飯，有時夜晚都會出下街。其實我又唔至於蠢到咩都感覺唔到，不過礙於心裡面仲有一個人係到，加上佢地兩個係好朋友；為免搞到愈來愈複雜，我都希望盡量維持一個朋友嘅關係同距離。
「我坐低咗喇，你上到嚟再打比我喇。」
我百無聊賴地四處張望，一邊拓頭一邊等Matt嚟。正當我掃視到左方之際，一個熟悉嘅身影映入眼簾，佢隔離仲企咗個身形嬌小嘅女仔。
Michelle同我眼神接上咗之後，佢拍拍身邊嘅Jerry，係佢耳邊講咗一句，然後向住我揮手：「hello！好耐無見喇！」佢好熱情咁樣同我打招呼。
佢拉住Jerry行到嚟我身邊，然後問我：「你仲記唔記得我呀？上次係越南boat trip果個呢？Michelle啊！」佢樂不可支咁講。
「記得，梗係記得。」我淡然咁回應，勉強擠出一個微笑。
「係喎，唔記得你同阿B係friend嚟架添，哈哈。」佢好嬌俏咁搖搖圈住Jerry嘅手臂，把聲尖到我覺得異常刺耳。
我望一望Jerry，佢只係低頭㩒電話，無理會我同Michelle講嘢。
「你一個人呀？」佢再問我。
「唔係呀，我約咗朋友。」我好想快啲完結呢場對話。
「好喇，咁我地唔阻你喇。」正當佢地轉身走嘅時候，Matt就到咗。
「咦？丫你個仆街仔，嚟我學校都唔搵我食飯？」Jerry見到Matt之後呆咗一下，之後望一望我地兩個，再咁樣講。
「你有女，邊敢阻住你呀屌你。」Matt笑口騎騎咁講：「我搵梓桐食都唔同你食喇，做電燈膽不了。」
佢地來回傾咗幾句，Jerry係臨走之前再望咗我一眼，然後就比Michelle拉走咗。
無諗過一係唔撞，一撞就兩個一齊撞到。
「喂，無野呀嘛你？成個人定哂格咁嘅。」Matt係我面前揚揚手，定眼咁望住我。
「無，啱先諗緊食咩啫。我想去個廁所先呀。」
之後我衝咗入廁所，眼淚就好似決堤咁一發不可收拾。
原來親眼目擊比起係人地口中聽返嚟更加難以接受，就好似迫一個唔相信自己親人已經死去嘅人去認屍一樣咁殘忍。
－－－－－－－－－－
「我啱啱買咗五月去大阪嘅機票，呢次我當係去grad trip架喇。」我同Matt係機票網到遊離咗一整日，最後我揀咗去大阪作為我畢業旅行嘅目的地。
「點解要揀大阪？」Matt好奇地問我。
「我想去啲唔係購物為主嘅城市，畢竟我覺得旅行用買嘢做終極目的實在太浪費；反而大阪呢個地方有好多世界文化遺產嘅建築物好值得睇，所以咪想去囉，反正我未去過。」
「最衰我報咗summer school喇，無得同你一齊去。」佢有啲洩氣咁講。
「唔緊要喇，你都知我鍾意一個人去旅行架嘛，今次又可以比我闖一闖。」我開懷地答佢。
「咁你自己一個真係要小心呀，今次無我係你後面提你拎返銀包架喇。」佢語重心長地講。
「嗯，知道喇。多謝你一路咁照顧我呀Matt。」我由心而發咁講出呢句說話。
「講埋啲衰嘢。」佢依然擺出一貫嘅嬉皮笑臉。
好可惜我嘅旅程只可以一個人行落去，就算身邊有人都好，果個人都唔會係你。
我膽小到連呢句說話都只能夠係心入面同自己講。
－－－－－－－－－－－
當我以為我生活已經完全脫離咗Jerry，佢又再次活生生咁出現係我面前。
個時已經係Sem尾，即係距離我去日本大半個月前。
「梓桐。」個日我行緊去上堂，就係教學大樓出面嘅嘅馬路見到佢，當時佢係到食緊煙。
我心裡面悸動咗一下，本來想扮見佢唔到，但係雙腳又不使喚咁停低咗。
「點啊，你有咩想講。」我冷冷地道。
「你五月去日本？」佢無視我嘅冷淡，反而問起我旅行嘅事。
「你點知？」我先係愕然，然後諗諗下，佢都應該只可以從一個人口中聽返嚟。
「Matt講。」佢深深咁吸咗一口煙，然後緩慢地吐出一團濃霧：「其實你同佢咩關係。」
「重要咩？」我冷笑咗一下：「你知嚟做咩，你都拍緊拖喇。」
「Matt幾好呀，點解你唔試下同佢發展。」佢嘅語氣事不關己咁，就好似只係講緊一個普通同學嘅八卦事一樣。
「吓，原來好就要發展架喇？你自己唔要嘅嘢就推比你啲friend？當我係乜呀？」我忍唔住連珠發炮咁向佢質問。
佢聽完之後臉色一沉，雙眼嘅視線轉向遠方投射，無回應我。
「其實你唔鍾意我可以唔洗再同我講嘢，我嘅嘢係點都唔關你事。」我繼續講。
「我同Michelle分咗手。」佢緩緩地道。
「所以呢？」
「我買咗五月去大阪嘅機票，一個人。」
「咁關我咩事。」
「我想同你一齊去。」
「.....」我當時心裡面只係覺得呢個人係痴線，之後我無理佢就走咗去上堂。
向來我都係個好專注係課堂上面嘅人，上堂嘅時候基本上好少做自己嘢；但係聽完佢講嘅嘢之後我居然心緒不寧到professor講嘅任何一個字都聽唔入耳。我不斷係到諗住個句「我想同你一齊去」，呢句說話就好似錄音機咁係我個腦入面無限輪迴。
「Hey，TszTung，Could you please anwer my question？」直到professor叫我個名，我先如夢初醒將思緒拉返嚟現實，可惜我答唔到佢嘅問題，因為我基本聽唔到佢問乜。
當晚我忍無可忍，終於將呢一切同哂我roommate Cindy講。
「啊，你覺得我應該點算好。」我將自己塊面深深地埋係個枕頭上，然後個頭就不停地撞向枕頭到。
「講真喇，你都知佢仆街架喇，但係你仲會諗點算，即係你都想同佢去喇。」
係，我又真係駁唔到。
「其實如果你唔怕咪同佢係日本一齊玩幾日囉，你地又唔係一齊瞓，又無咩蝕嘅。」佢繼續講：「最緊要你做完唔好後悔係到叫春。你覺得啱就做喇，唔洗問人架，你想點你自己最清楚。」
我諗我成世人最大嘅缺點就係我唔識真真正正咁嬲一個人，就算佢對我做咗幾多過份嘅事，一但對方嘅態度有轉變同軟化，我就會把持唔住咁原諒咗佢。
Jerry亦唔會係一個例外，特別因為我仲好在意佢。
我當晚同Cindy傾完之後就解block哂佢所有野，之後好不顧一切咁whatsapp佢：係咪一齊去日本？
我知自己實在太恨鐵不成鋼，連自己都睇唔起自己；但係又無法自控咁做呢件事。