自從住咗hall先知，扑野原來可以咁簡單: 《八、旅途愉快》
「乘搭前往日本關西國際機場嘅航班UO3989現在可以登機，請各位旅客前往櫃檯，多謝。」機場嘅廣播聲響起，我提起手上面嘅旅行袋，一步步咁行近登機櫃檯。
Jerry：09:47 你上機未？
我：09:48 而家登機
Jerry：09:50 咁我地京都見
我嘆咗口氣，拎咗本護照同機票出嚟比地勤人員核對，個心仲猶豫緊應唔應該上機。
「小姐？可以行架喇。」個地勤女仔係我面前揮揮手，「哦，好呀，唔該。」我先識得比反應向前行。
本來呢個係我嘅畢業旅行，我應該無憂無慮、開開心心咁出發先啱；但係我呢刻仍然掙扎緊我到步之後應唔應該搵Jerry好。
Jerry：10:01 落機話我知，到時我係京都車站接你
結果我都係選擇咗去搵佢。
或者呢次旅程對我嚟講係個有始有終嘅結尾。
過埋呢十日之後，我就要逃離呢個人，永遠。
----------------------------
我同Jerry嘅相識真係一場偶然，偶然到差一步我就唔會識到佢。
我係個好鍾意一個人去旅行嘅人，主要因為我覺得旅行係唔需要刻意安排同計劃行程，瞓到自然醒、隨心所欲去自己想去嘅地方會更加舒服。所以為免要照顧埋其他人嘅需要同感受，唯有自己去先可以掌握哂所有嘢，包括隨意改動行程。
上年嘅Sem break我由旺角搭巴士去越南，就係呢三十個鐘嘅車程入面，我遇到同車嘅Jerry。
架巴士去到南寧嘅時候，因為車程延誤嘅關係，居然錯過咗一日只係得三班嘅車。
幸好當時只係十一點，最後一班去河內嘅巴士係一點四十分先開出，所以我仲可以即日到步。
「仆街，下一班要聽朝八點，差少少就奶嘢。」我望住個站牌，心裡面即時鬆咗一口氣。
時間尚早，我係附近到處行下，見到有間好簡陋嘅餐廳就入咗去，打算隨便食個飯。
「你好，麻煩你要一份餛飩麵，要辣的，謝謝。」我睇完個餐牌，叫咗個最穩陣嘅麵比自己。
成間小店嘅位置唔多，大約有四至五張枱；牆上面嘅石灰早已經剝落得七七八八，仲有年月積累落嚟嘅水漬係到；頭頂上面有個傳統式嘅扇葉風扇，即係中學掛係天花板個種，佢好緩慢地轉動，慢到我分唔清佢到底係熄咗風扇，定本身就係咁慢。鋪入面嘅陳設亦都唔多，就只有幾張木枱，灰白色嘅牆身上有幾張暗紅色嘅揮春，應該係陳年舊物嚟。
鋪入面除咗我，仲有一個男仔，從佢嘅衣著打扮嚟睇，我估佢都係香港人；佢著住一件Pull and Bear嘅深藍色衛衣，下身係一條長棉褲同波鞋，呢個根本係香港人先會有嘅衣著。
「餛飩麵。」店入面個阿姨用普通話放低碗麵之後，就繼續坐低係張木枱到包餛飩。
我食完個麵之後就走咗，打算再遊走一下，當自己去多個景點。
我踏出間餐廳幾步之後，有把急速嘅男聲係我後面響起：「小姐！小姐！」
我聽到之後就轉個身，見到衛衣男企咗係我後面。
「小姐，你掉了錢包沒拿。」佢手上面正正就係我個黑色皮革銀包，居然漏咗係入面。
「啊，謝謝你啊！幸好你看到，如果我上了巴士才發現就麻煩啦。」我連聲向佢道謝，雖然心裡面覺得佢係香港人，不過見佢同我講普通話，我唯有配合佢。
「你一個人來旅行嗎？」佢問我。
「對啊，我準備坐巴士到河內。」我簡單咁回答。
「er….你係咪香港人?」佢突然用返廣東話問我。
「哈哈，係呀，你又知嘅。」
「其實頭先係鋪頭睇你個樣已經覺得你似，呢到啲人應該唔會咁樣打扮。」佢笑住咁講。
「咁你又同我講普通話？」
「我唔肯定嘛，廢時柒咗喇。」
之後我地就開始傾計，講下大家點解會自己嚟旅行咁。
「我唔算一個人嘅，我去到河內個邊有個中學同學會係個到等我。」
「咁都幾開心呀，我就真係自己一個人去足全程。」
「吓？你一個女仔怕唔怕架？始終越南呢啲地方治安都唔係話特別好。」佢半皺起眉頭咁講。
「我之前都試過一個人去旅行，應該無咩問題嘅。」我淡然地回應。
「如果你唔介意嘅話，可以同我地一齊玩呀，多個人多個照應嘛。」佢好熱情咁講。
雖然我覺得佢應該都係出於好心先問我，不過對住陌生人我始終有啲介蒂，我禮貌上回應：「好呀，到時睇下點呀，住得近嘅可以一齊食下飯。」我微笑咁答。
「好呀。」
成個車程搖搖晃晃咁搭咗差唔多十個鐘，我地先到達河內，當時已經夜晚十點幾。
「啊，咁你住邊到？」落咗巴士之後，衛衣男又再問我。
我講咗個hostel名出嚟之後，佢呆咗一下，然後話我地book咗同一間住宿。
「又會咁啱。」我由衷地發現呢個世界嘅巧合同偶遇真係好奇妙。
由於車站同個hostel嘅位置好近，我地搭咗十五分鐘的士就到咗。
本來我對hostel無咩特別大嘅期望，因為我都係見個價錢相宜又近車站先book，所以都係抱住個有個地方住就得嘅心態而來。
去到hostel門口，呢到出奇地熱鬧繁盛。
呢到唔單純係一間住宿，地下設有酒吧同club，所以夜晚十點後嘅人流都唔少，而且都係外國人居多。Hostel門外有個好大嘅紫色嘅霓紅燈牌，上面係一行越南文字，我諗係Hostel嘅名。
「我個friend話佢係酒吧到飲緊野，你一唔一齊嚟？」衛衣男望向酒吧裡面，再望一望我講。
「你等我放低啲嘢先。」
我地check in完之後就各自返咗房放低行李，約好咗直接係酒吧等。
我係酒吧門口見到遠處嘅衛衣男，佢向我招招手，隔離有個戴住黑框眼鏡嘅男仔。
「喂，呢個就係我喺南寧轉車個陣識到果個女仔，佢叫...係喎，你叫咩名？」衛衣男同我傾咗咁耐都無講過自己叫咩名，佢有啲尷尬地咁望向我笑。
「叫我梓桐得喇。」我微微一笑：「你地呢？」我望向衛衣男同黑框男。
「我叫Matt呀，佢係Jerry。」衛衣男講完自己個名之後，指一指佢身邊嘅男框男。
黑框男嘅眼鏡係圓形款，佢個頭微曲帶少少波浪；身上面係一件麻質嘅白色裇衫，典型嘅斯文路線，同佢隔離嘅衛衣男完全唔同style。
「hello。」Jerry向我點點頭。「嘩你仲著住衛衣嘅，生熱痱未？」佢掃視咗Matt一下，Matt馬上除咗佢件衛衣，入面嘅短袖T裇將佢嘅健碩身形表現得恰到好處，好明顯佢係有做開運動。
「啱啱聽梓桐講，你地應該同一間U架喎。」Matt間學校同我同區，不過我地並唔同U。
「係？不過我好似未見過你。」Jerry問：「你咩科架？」
「我讀Media架。」
「咦？我地同一個地方上堂喎，我讀英文架。」佢諗一諗：「不過學校咁多人，未撞過都唔出奇。」
「係囉。」
當晚我地三個輕酌咗幾杯就返咗房休息。
「聽日一齊出去食野呀，好無呀？」Matt臨返房之前問我。
「好呀。」原本我打算聽日瞓到自然醒再出去影下相，但係傾咗成晚之後居然有啲想同佢地一齊玩。
「咁聽日見喇，早啲休息。」Jerry向我講。
唔知你信唔信有一見鍾情，不過我諗我當時已經對Jerry產生咗微妙嘅感覺，但係我自己仲渾然不知。
------------------------
第二日起身，我地約好咗係Lobby集合，就一齊出去搵野食。
人生第一次嚟越南，我第一時間就想食平時係香港食開嘅越式撈檬粉。
「呢到得湯河，無撈檬架喎。」Matt同我講。
行緊嘅路上好多電單車，我諗應該係當地主要嘅交通工具；馬路上面亦都無咩規則可言，基本上你只要避得過啲車就可以行。
「吓？唔係呀嘛，我好鍾意食架喎，乜越南嘢唔係食呢啲架咩？」我好驚訝咁問。
「呢到好多嘢你都估唔到架。」Jerry笑咗笑，之後指住個檔口話：「我地係到食好無？」
我地坐咗係路邊一個檔仔，呢到每一個檔口都係排住密密麻麻嘅矮櫈仔，唔係香港大排檔個種木板摺櫈，而係好似比小朋友做功課個種高度嘅木櫈仔。
「呢到好有味道，好正。」我舉起部相機對住個檔口影咗張相，咁啱Jerry就對住鏡頭回眸一笑，快門就影低咗呢一刻。
「係呀，呢到唔只夠地道，洗錢都唔需要睇價錢，基本上係到消費我地已經做到皇帝，想窮遊又得，啱哂我地呢啲窮撚大學生。」Matt坐低之後問我想食咩，我同Jerry要咗碗雞肉河，Matt就要牛肉河。
「乜你唔食牛架咩？」Matt問我。
「係呀，我對牛肉敏感，一食就會起紅點，所以避得就避。」
「喂，我都係呀，搞到打邊爐都無得食肥牛。」Jerry開口講。
越南食嘢嘅價錢同香港真係差天共地，一碗好好食嘅湯河都唔洗十蚊；呢個質素係香港食應該要成四五十蚊。
「一陣你地會去邊？」我地食到七七八八嘅時候，我問佢地。因為我本來都打算自己周圍利下影下相，所以食完飯應該會同佢地分道揚鑣。
「我地應該會踩單車周圍遊下hea下咁，你有無興趣一齊呀？」Matt滿心歡喜咁望住我。
「吓，咁我唔跟你地去喇，我唔識踩單車架，哈哈。我自己去影下相算喇。」我搖搖頭，尷尬地以笑遮醜。
「唔緊要喇，我地教你囉，學下學下就識架喇。」Matt興奮地講，身旁嘅Jerry就點點頭示好。
「我真係完全唔識架喎，會唔會阻住你地踩架。」
「怕咩呀，我地又唔係趕行程，一於咁話喇。」Matt又點點頭，之後我地一行三人租咗三架單車，去咗附近比較少人行嘅河邊到「學車」。
「拿，你放鬆啲先，唔洗怕嘅，我地兩個係後面扶住你架車，唔會跌架。」Matt係我後面講，我嘗試用手握住單車嘅前柄，但都感覺到成個車身好似搖搖欲墜咁。
「好驚喎，好似好唔穩咁嘅。」當我嘗試向前踩，架車就開始左右咁搖擺。
「初初學係咁樣架，你搵到個平衝點就唔會咁唔定架喇。」Jerry好耐心咁講，之後同Matt講：「一係你踩陣先喇，我再教下佢，轉頭過嚟搵你。」
Matt做咗個「OK」嘅手勢，就騎咗上架單車到踩去大路嘅方向。
Jerry教咗我應該有大半個鐘，但係佢一唔係後面扶我我就會跌。
「唉，好柒呀，你教咗我咁耐我都學唔識。」我有啲靦腆地講，然後係部單車到落返地面：「不如你去搵Matt喇，我自己周圍行下算，廢時搞到你都無得踩。」
「咩呀，我個部有back seat架嘛，你坐我後面咪得囉，我地一齊去搵佢。」講完之後佢就拍一拍架單車嘅後座。
「吓，我好重架喎，會唔會失平衡架...」我一臉擔心咁講，因為我稱唔上係好輕盈個種女仔，兩個人嘅重量好大機會反車。
「得架喇，我單車選手嚟，參加過奧運架，你坐喇。」佢坐咗架車到，又叫我坐上去。
「奧運？」
「澳門運動會呀。」
「屌。」
坐咗上單車後座之後我就係到諗，係咪要好似電影入面嘅女主角咁從後抱實佢條腰？
但係咁樣做好似太夢幻又太親密，仲會搞到好尷尬。
所以我都係決定唔攬，就咁坐定定就算。
但係架車一開之後，我就不奇然咁攬咗落去，因為架車真係開得好快。
我諗我唔捉實佢嘅話我應該已經飛咗出架車到。
於是我就真係好似拍緊《哪些年》咁，從後抱實Jerry。
「你唔好跌出去呀，捉實啲。」佢回頭同我講，我就抱得更加實。
男同女之間嘅親密舉動難免會令人產生啲暇想，我都唔例外；係攬住Jerry呢十幾分鐘嘅過程，我個心就一直呯呯、呯呯咁跳動，我嘅胸口緊緊咁貼住Jerry嘅背部，相識一日都未夠但係又如此靠近，我將頭慢慢挨係佢背上面，佢稍稍回頭望一望我，又繼續向前踩。
「呢到啲風景好靚呀可。」佢同我講。
「嗯，成個環境好舒服，我鍾意去呢啲地方多過淨係得shopping嘅旅遊景點。」
沿路上面有好多車係我地身邊好似走馬燈咁飛過，特別係有好多電單車；呢到嘅空氣質素一啲都唔好，到處都塵土風揚咁，就連吸一口空氣都特別混濁咁。
呢種地道風情同香港個種繁華大都市嘅面貌截然不同，反而令我好樂在其中。
特別係此時此刻。
「讀你呢科啲人，係咪全部都識影相？」Jerry又開口問我。
「識就識嘅，咁我地平時好多科都係同攝影有關，入得呢科多數都有興趣架喇。不過專唔專業就係後話喇。」
「成日覺得讀呢科啲人都係藝術家，好勁。」佢好似好佩服咁講。
「唔係喇，勁嘅人好勁囉，我呢啲都係業餘架咋，一啲都唔專業。」我笑咗笑，然後話：「你讀英文咪仲勁，肯定喇喇聲，我啲英文有限公司嚟。」
「我都係唔知讀咩先揀呢科架咋。」
傾下傾下，我地就踩返出市中心同Matt會合。
「你架車呢？」Matt見到我係Jerry身後，愕然咗一下，然後再問我。
「無呀，我踩唔掂，還咗喇。」我苦笑咗一下：「如果佢唔載我，我諗我到走個日都踩唔到嚟搵你。」
「咁渣架你。」Matt話：「今晚有咩想玩呀。」
「夜晚都無咩特別架喇。」Jerry聳聳膊咁答。
「咁去飲野喇。」Matt當晚就帶咗我地去一條好似酒吧街咁嘅地方到飲酒。