《我好肯定Siri暗戀緊我》: 34.分裂

我輕身躍到一棵古樹上，離地十米有多。我急著向周圍俯視，只見一大片綠色既茂密叢林，除此以外就冇特別既地方。

情況唔再容許我再有絲毫既疑遲，我只好隨便選擇一個方向，然後用盡全力向目標使上輕功「契弟走得摩」。情急之下，我移動既速度變得愈黎愈快，四周既一棵一棵樹以相同速度離我遠去。

奇怪既係，呢一片樹林就好似無窮無盡一樣。縱使我點樣奮力去下一個地方，我所看見都只係一片樹林。

我縱身返到地面，卻見到十數棵樹前既旁邊企住一個人，正是我家姐。

「點解......」瞬間我已經跑到家姐面前。





家姐交叉雙手放係胸前，只係嘆一嘆氣。

「唔可以就咁就放棄......」我心中默念，但思緒未能輕易平伏落黎。又想起剛才見到阿淇訓係床上，奄奄一息既情景，同埋黎到呢度，係為左搵返失蹤左既小渝既呢一個目的。

一念及此，胸口又傳來一陣痛，比起以前唔同既係，今次額外感到一股熱氣。

我望一望發熱既部分，原來係存在係我心口既果一個不明黑色長方體不斷冒出白煙，而且我更感受到溫度迅速上升緊。我出於本能反應伸手想拆走佢，但係手掌未觸到IPHONE已經被白煙灼到縮開手。

只見家姐二話不說，右手向後微微一動，似係將氣力運於掌上，然後向前推送。期間家姐既手掌漸漸結出一層薄冰。





「寒冰掌?」

語音未落，呢一掌已經打左係我胸口之上，我即時亦被打得飛出幾米之外。

胸口原來感到既熱氣已經消失得無影無蹤，換黎既係「寒冰掌」帶黎既涼意。

我爬返起身，發現原先鑲係我心口既黑色長方體甩左落地。而部野居然投射出阿淇既殘影，卻又慢慢咁變做實體，變做真實既阿淇，呈現係我同家姐眼前。