《我好肯定Siri暗戀緊我》: 33.淇渝，奇遇

幸好我反應夠快，馬上展開輕功，向後躍出十幾米。

一陣恐怖既怪聲由地面個窿傳出，不到幾秒，已經有一個人由個窿到衝左出黎。

果個人一衝出地面，二話不說就向家姐攻去。

所有事只係發生係一瞬之間。而黑影向家姐既攻勢又極其迅速，我心一驚，只祈求家姐平安冇事。

但係，家姐伸出右手，憑空變出一枝棍，馬上再向黑影個頭使出一招「當頭棒喝」。





此時，我已使出獨門自創輕功「契弟走得摩」，走到家姐身旁。

「你冇事嘛?」

「好彩我心念夠快，唔係就可能被佢打低。」家姐右手一掃，原本係手上既武器就咁就消失左:「係呢個『夢』世界入面，好多野都可以靠心念而創造出黎，最基本就係武器同武功。你能夠使用輕功，其實只係因為你心入面好想成為武俠說入面既高手。」

一刻之間有好多資訊顛覆我既常識，但係我諗一諗，家姐講既說話好似真係有道理。現實世界我真係唔識輕功，只係有時我將現實同「夢」混為一談，以為自己真係武功高強既高手。

「不過，心念並唔能夠讓你為所欲為，例如，你唔可以改變其他人既思想，令唔鐘意你既人愛上你，亦唔可以破壞呢個世界等等。」家姐又繼續講。





提到呢個話題，我又諗起阿淇。我係「夢」世界入面同佢表白，即使我心念中好想佢接受我，但到最後佢都係拒絕左我。

諗到呢度，我心口又傳來一陣劇痛。痛得我眼前金星亂舞......

突然，眼前白茫茫一片。我依稀望見眼前遠處有一張床，床上有個人訓著。

走過數十步，黎到床邊，我終於可以望見床上既人係邊個。

係阿淇。





「救我......」阿淇既聲音好柔弱:「你一定要救我......」

「我要點救你?」

* * *

「細佬醒呀!」

我又回到岩岩既地方，果一片樹林。

我一個蜈蚣彈起身，望到阿淇，令我感到四肢百骸都充滿力量。

剛才望見既一定都係真既，阿淇正處於水深火熱之中，我一定要盡快救返佢。

你要等我。