短甜系列 - Summer Lover: #4

我一直都好專心一致咁工作…ok，我認我有分咗三秒心去望佢隻腳…之但係我都係好認真咁做緊嘢㗎喎！
就喺我好細心咁幫佢用繃帶包紥實隻腳，最少可以幫Jacqueline減輕少少痛楚時，突然我feel到有人搞緊我個頭！好自然嘅反應，我抬高頭望一望。
竟然俾我見再…Jacqueline呆咗咁望住我，而佢隻右手就吊住咗係半空，位置差唔多就喺我頭頂。
呢刻就好似俾人定咗格咁，我同佢都停咗大家本來嘅動作，兩個都呆咗咁望住對方，可以話係…四目交投。

氣氛微妙得嚟又有啲尷尬，直到…
「Sailor！」妖～點解啲劇情永遠都咁老土 㗎？成日喺啲唔應該嘅時候，就有啲唔應該出現嘅人嚟阻頭阻勢！我從未試過咁想煎巴呢個明哥仔！！「呢位小姐啲嘢我拎咗返嚟啦。小姐，麻煩你check下，睇下有冇嘢唔見咗？」
「哦…哦～」Jacqueline尷尷尬尬咁望咗我一眼，好細聲咁講咗句:「你…你剛剛頭髮上面有塊葉，我幫你拎走咗。」
「哦～唔該你。」我好自然咁摸摸自己個頭。



Jacqueline再係阿明到接過自己啲嘢，又好快咁望咗兩眼: 「嗯…我諗都喺齊到，唔該晒你。」
「唔駛客氣～」我發現每逢有靚女同阿明講嘢，佢都會自我感覺超級良好。「嘻嘻…呢啲份內事啫。呀！係喇，你有冇屋企人嘅電話？我幫你打俾佢哋，叫佢哋嚟接你啦！係喎，咁點稱呼你呀？」
「阿明呀，你一輪嘴咁，叫人點答呀？」
抄人牌啲橋咁小學雞，真係教你都費事。「不如你出去睇下超哥有冇嘢要幫手啦。呢到有我得㗎喇。」
「吓？！但係…」
「唔該你啦～」拉高尾音呢招，對呢啲毒男堅work。

總算叫打發咗個好煩嘅阿明走。
成個休息室，宜家就只係得返我同Jacqueline。



望真啲，頭髮清爽嘅佢，硬朗嘅眉宇間帶住啲溫柔，鼻高高咀仔細細。望落應該同我差唔多大，20頭啦～
著住背心短褲嘅佢，唔算肥，但亦都唔係瘦到成條柴咁。同我摸到嘅手感一致，佢叫做有啲肉地。
佢成個package，完全係我杯茶。不過問題係，唔知佢係孿定直; 就算係孿，都仲要唔知會唔會只好個啲TB！唉～同完直仔爭，仲要同TB爭，真真係pure嘅悲歌呀！！

宜家更加好衰唔衰，阿明走咗之後我哋再冇乜講嘢，成間休息室靜到死，好鬼尷尬。
「…嗯…」終於同佢包紥完，我局住要做先出聲嗰個。「搞掂㗎喇。不過宜家都只係暫時性，你最好就係去睇下醫生，照一照X光。」
「哦…唔該你呀Sailor！」佢把聲真係好溫柔。咦！？咪住…
「你…你點解知我個名嘅？」
「吓？！你個同事頭先衝入嚟，我聽到佢係咁叫你。」
「啊～原來係咁。哈哈哈…我以為你起咗我底添！」


「點解要起你底呀？」
「哈哈哈！無嘢，我亂講啫！哈哈哈…」唔通我以為你暗戀我所以起我底，我又講你知咩！

唔係陪笑，我唯有搵啲嘢講:「係喎，要打電話俾你屋企人喎！」
正想轉身搵個電話俾Jacqueline打，就俾佢叫住咗:「唔駛喇！」
「唔駛？！但你咁樣，自己一個唔得㗎喎！」我真係有啲擔心。
「呀…我啲屋企人全部唔係到㗎喇！」 誓估唔到，Jacqueline會彈咗句咁嘅嘢出嚟。
「吓？！呀…Sorry呀！」我都唔知俾咩反應好喇。
「呀…唔係呀！我意思係…我啲屋企人全部唔係香港。」
「啊！！真係俾你嚇鬼死！講好啲呀嘛。」
「嘻嘻～Sorry囉。」
「算啦！咁你有冇咩朋友可以嚟接你㗎？」
「嗯…都冇！」
「嘩！你喺香港都冇人冇物，你自己一個人過嚟㗎 ？嚟旅行？小心啲好喎。」
「嗯～其實我嚟係…」Jacqueline欲言又止，真係有啲奇怪。