短甜系列 - Summer Lover: #3

話就話抽水啫，實質咪又係好專業咁扶實佢。
我哋開始慢慢行。而可能因為我比佢高少少，我哋嘅姿勢，由本來佢搭住我，變成我右手攬住佢條腰，佢雙手就好用力咁捉實我嘅左前臂，當咗係拐杖咁握實，再一步一步咁行。
所以宜家我某程度，就好似隻蟹咁打橫行。原來打橫加埋一步一步行，係好攰架喎。不過塞翁失馬，焉知非福。就係因為我要面向住佢咁行，我先有機會望清楚佢嘅側面。

佢嘅頭髮啡啡地色，長度大約…好似梁詠琪嗰隻短髮，係清爽但girly嘅短髮。左耳帶咗隻細細粒嘅紅色耳環，加上小巧白皙嘅耳珠，同尚算精緻嘅側面，係佢過耳嘅短髮半遮半掩之下，真係好引人犯罪。
「嗯…痛！」少女一再叫痛，啲叫聲真係搞到我心癢癢。
「你係咪好辛苦呀？就到架喇！一係你坐係到等我，我去搵人嚟幫手？」見佢滿頭大汗，眼泛淚光，真係我見猶憐呀～
點知佢一手捉實我，係咁搖頭:「唔好呀！唔好走！」
Hey baby！你咁樣，好易引爆我嘅獸性架喎。
「咁…」我暗暗深呼吸咗啖氣。「一係我同你講住嘢，分散你注意力啦！」


「嗯…」啲眼淚係對眼入面係咁啷，好想伸手幫佢抹呀～
「你自己一個人嚟？」我都唔算求其搵啲嘢講架，一陣我都要幫佢搵返啲親戚朋友，通知佢哋㗎。
「嗯…」又係點頭。「我放假，見今日好天，咪諗住嚟曬下太陽囉。」
「你又會走咗去樹蔭個邊嘅？」
「頭先曬曬下又覺得太熱，咪諗住行去樹蔭個邊坐。行到埋去我俾樹上嘅蟬聲吸引住，掛住向上望，就俾啲樹根kick親喇。」
「哈～蟬聲都可以咁吸引你，你都幾好奇寶寶。」
「好彩你咁啱巡到嚟。我有叫過救命㗎，但可能太細聲，無人聽到咋。我真係以為我要死係到呀…」
「咁你又會唔會誇咗啲呀？哈哈～」
「點知啫，我又無帶電話係身。」
「一陣幫你通知屋企人啦，你叫咩名呀？」


「我叫Jacqueline…呀！痛！！」

見到Jacqueline佢咁痛苦，我都唔好意思要佢行咁多路。抬頭見離休息室唔算太遠，就決定要做啲失儀事！
我決定放大喉嚨，向住休息室方向大叫:「喂～阿明，出嚟幫手呀！！」
可能我叫得真係太大聲，又或者太過出奇不意，懷中嘅女仔佢呆咗咁望住我。
「哈～Sorry呀，嚇親你。」明明對住佢都算溫柔，轉頭見到慢跑緊過嚟嘅阿明，我立刻變臉大師上身:「快啲啦！你下身機能退化呀？跑咁慢？！」

等到安置好Jacqueline坐係休息室之後，我就好型咁拎住個急救箱，開始先同佢處理咗啲小傷口。
「放心，你對手同膝頭都只係擦傷咗小小，洗完傷口就無咩事架喇！」我一直都低頭專心咁檢查緊Jacqueline嘅手手腳腳。「阿明哥仔呀，你係咁望住我哋兩個靚女冇用㗎喎，不如你幫手去樹蔭個邊拎返小姐啲嘢返嚟，同轉頭打俾佢屋企人叫佢哋嚟接佢好過啦！唔該！」
最後句唔該，我係抬起頭望住阿明，重要笑住咁同佢講。亦都好順利地電到佢暈得一陣陣，嗱嗱淋就跑咗出去囉。


成個休息室宜家只係剩底我同Jacqueline。雖然我同佢洗傷口時都有抽佢少少水，摸下佢手仔咁，但基本嚟講我都算係正人君子㗎喇。

處理好晒佢啲小傷口，我就半蹲咗喺佢前面，想幫佢檢查下扭親嘅地方。我慢慢托起佢隻左腳，好順勢咁就放咗係我個大脾到，一心諗住同佢檢查清楚啲。
就係佢隻腳仔掂到我大脾個刻，佢好似觸電咁，好快就想縮走隻腳。
同一時間我又好自然咁捉實佢小腿，唔俾佢郁:「唔駛驚，俾我同你檢查清楚啲！」
就係呢瞬間嘅一拉一扯，佢嗰幾隻好得意嘅腳指，就好唔為意咁撩咗我條腰幾下。 除咗有啲痕，我覺得更加有啲好奇妙但又唔識形容嘅感覺。

再次放好佢隻腳上我大脾，我就好專業，一臉認真咁同佢檢查，將佢隻腳掌同腳踭左按按右㩒㩒，不時問下佢「痛唔痛？」、「呢到覺得點？」。
雙手游走係佢腳掌至小腿之間。唔知係咪聽錯，有時我會隱約聽到佢「嗯」一聲。唔係叫痛嘅聲音，而係好似…好舒服咁嘅叫聲。