短甜系列 - Summer Lover: #5

「嗯～其實我…」Jacqueline吞吞吐吐咁，有啲古怪。
「其實你唔想講，可以唔講㗎。」我開始覺得呢個人有啲奇怪，對呢個人有啲戒心。「我只不過係八卦啫。」
「我…」
「得㗎喇。萍水相逢，其實你真係唔需要俾我知咁多嘢。」 我擺明落緊後閘啦。「如果你冇人call到，咁一係我幫你截架的士，車你去睇醫生啦。」
都唔等佢有咩反應，我就轉身行咗去工作枱到，拎起個對講機，召喚遙遠嘅超哥嚟幫手。

同超哥一齊扶住Jacqueline等的士。唔知點解我同佢好似陌生咗好多，兩個人除咗冇咩點講嘢，更加係叫冇咩交流，結果成個氣氛都勁尷尬。
「呀…係呢，小姐，你知唔知去邊到有醫生睇？！」超哥好明顯係冇嘢搵嘢嚟講。
「我…」Jacqueline都feel到超哥嘅無聊。
「你咁八婆做咩啫？」我嘗試幫Jacqueline解圍。「快啲幫手截車啦～」


「其實點解我哋唔幫小姐call Uber 或者的士？」大佬，你係咪玩嘢呀！？
我啤咗超哥一眼:「咁八要知人哋去邊做咩啫？去截車啦！」
可能就係語氣重咗啲，超哥真係笠晒水，走去前面截車。

又再次得返我哋兩個，兩個人都望向唔同嘅方向，左顧右盼，好明顯大家都喺度迴避施緊大家。
「Sailor。」佢忍唔住先開口。「其實…其實係咪我頭先講錯嘢呀？」
「吓？！」嘩！連我自己都覺得呢個“吓”好虛偽。「冇呀！你邊有講錯嘢，關咩事啫。」
「咁點解你…」Jacqueline一臉委屈。
唔得！千其唔可以心軟呀！
「咩點解？冇得點解過喎！咁我都係做嘢啫。總之你自己小心啲啦！」算啦朋友，我真係唔想糾纏落去啦！咁大個女，我從未試過咁恨有個男人喺我身邊。超哥呀～你快啲返嚟啦！



話說嗰位姐姐仔扭親腳，都已經係幾日前嘅事。
嗰日，就係我最無奈嘅嗰一刻，超哥就好似一個白馬王子咁，坐住個紅色彩雲…sorry，係紅色的士，好型咁由遠處飄到埋嚟救駕。 我拿拿淋送咗Jacqueline上車，都唔俾機會佢同我講多一句，就叫司機大佬小心駕駛，同埋好狠咁幫佢閂咗道門，目送住佢遠離。

唉～緣份呢啲嘢，真係強求唔嚟。不過算好彩嘅係，我同Jacqueline都只係得兩個零鐘嘅緣份，所以即使最後冇任何事發生，都真係唔會hurt得去邊。

到我真心相信我同佢係有緣冇份嘅時候，個天又開始玩嘢…
話說呢日悶悶地，我就約埋我個死黨，諗住去Silence坐下。
我哋成班朋友都叫佢做鬆弛熊，原因好簡單，就係因為佢個中文名叫宋玉紅，加上佢口頭禪成日都叫人relax，自不然由中學開始，我哋個個都叫佢做鬆弛熊。
亞熊同我一樣，都係lesbian，都係pure。所以係成班同學入面，我同佢算係最多嘢傾。其中一樣我同佢都好相近嘅，就係大家都一致認為Silence老闆娘阿靖，真係好靚好有型。最近見到佢同另外一個女仔係埋一齊，個名好似叫阿Taz，我哋都登佢哋開心。



講返我同阿熊上Silence嗰晚，本來我哋自己自成一角，坐埋一二便喺度吹水，咁當然都有下女啦。就係我哋吹咗差唔多成粒鐘嘅時候，阿熊突然雙眼發光。佢嘅雷射眼，係由門口一路追射到吧枱，全程無鬆懈過。
「喂！緊咩呀？開心share好喎！」我嘗試跟從住阿熊嘅目光去望，可惜今晚人太多，我真係望唔到啲咩。
「吧枱，11點，8分。」就憑著我對阿熊嘅了解，以及佢個流曬口水嘅樣，我竟然可以get到佢要六個字點解。
我嘗試將我嘅視線越過人群，望向11點方向嘅吧枱。
竟然，俾我見到佢…