短甜系列 - Summer Lover: #2

其實件制服算係幾通爽，但大熱天時真係會堅熱。但無法，唔著啲人又唔知你係乜水。所以大家都會各出其謀去令自已舒服啲。好似超哥咁，坐更亭或者出去撐艇仔時，會博冇人見到而拎起件衫，露出個肚腩。
我作為一個女性就最慘，因為係制服下面重要著多件泳衣，真係唔熱死都焗死。
不過我都算精靈，我唔會著一件頭係入面架，識著梗係著two pieces，去廁所都方便啲呀！

呢日我決定唔坐。襯住唔算好曬，我決定係沙灘行下…sorry，巡下。
見係閒日人少啲，又已經差唔多3點，應該無人會放蛇或者投訴啩。我一邊巡，一邊偷偷地學超哥咁拉高件制服，再係側邊綁個結，變成露腰裝，俾條腰抖下氣。
戴住副超，梳住條高馬尾，露腰，短褲，踢住對拖，係的確會引嚟嗰啲，唔知點解閒日下午會唔駛返工，仲走嚟曬太陽嘅鬼佬垂青。成日係到望住晒，有個仲吹埋口哨㖭。可惜我當緊更，唔係我實送隻中指俾佢。

都費事理佢哋，我繼續我一個人嘅沙灘漫步。
有得揀，我當然唔會想一個人自己行沙灘。但係緣份呢啲嘢，真係強求唔嚟。尤其係我哋呢啲pure，有時真係好難掌握究竟對方係咪都係自己人。


算啦！有啲嘢真係控制唔到咁多。

好彩呢日人少少，個灘有咩咦郁一眼都望晒。巡埋樹蔭個邊，就可以返去休息室。
點知行到近樹蔭個邊時，我突然聽到自己右後方傳嚟一下女子嘅叫聲。我立刻轉身一望，咦？！奇怪，無人喎。
可能係自己聽錯啦。
我正想轉身繼續巡邏，點知又再聲到女人嘅叫聲。
立即轉身，又係一個人都冇！
唔通曬得制，搞到我有幻聽！？
都係嗱嗱淋走好喇…
一轉身，身後又傳嚟女叫聲，今次啲聲音仲有啲…淒厲。


唔係啩！日光日白唔係咁猛嘛？！

唔係咁猛啩？！
咪住！諗諗下，宜家都算正午呀，同埋呢頭都從來冇聽過有啲咩鬼故或者怪事。唔通真係有人出咗事？
我膽粗粗咁向住啲聲音來源行過去，繞過幾棵樹，我係一棵大樹邊見到啲嘢。係…係一隻人腳瞓咗係地呀！
係一隻著住人字拖嘅人腳，唔係一對呀！
望真啲，呢隻係女人腳嚟架。
點算呀？！係咪肢解案呀？係咪要報警呀？？

等…等陣，點解隻腳會郁嘅？咦？！啲人聲又嚟喇！


嚟到呢個位，我點都要再行前幾步先可以再睇得多啲。
咦！
咦！！
咦！！！
仲有另一隻腳架！！係個完整嘅人抱住咗自己一隻腳呀！
頂！！！無啦啦，呢到又多樹，點解會有條女坐係地下㗎？

「…」為咗保持我嘅專業態度，我點都要和藹可親咁去講嘢㗎啦。「小姐，你無事呀嘛？！」
坐係地下嘅個隻女鬼…個位短髮小姐聽到有人講嘢，就立刻抬起個頭，用充滿期待嘅眼神望實我:「我…我扭親隻腳，好痛呀～」
救人要緊，都唔得閒望清楚佢個樣，就嗱嗱淋走埋去，半跪係佢面前:「唔駛驚，我係救生員，我幫你檢查下先。放鬆，慢慢俾隻腳我。」
一邊講，一邊慢慢幫佢檢查:「放心…應該無骨折，可能係扭親啫。嗱！我哋個休息室係前面，我扶你去嗰到先。你手手腳腳都擦傷咗，我同你處理啲傷口，同紥住隻腳先。」
俯身上前，雙手捉住佢兩隻手臂，慢慢拉佢起身。佢又好自然咁一手搭落我膊頭，順勢向前傾，借力企起身。
佢成個人就好自然不過地，挨咗落我嘅懷抱到。一陣太陽油嘅椰香味，加上淡淡嘅髮香，就係咁飄咗入我嘅鼻腔。香味…8分。

我俾佢搭住我膊頭借力，而我就一手攬住佢條腰。隔住佢件沙灘背心，我嘅手感講我知佢算係身材均勻又帶少少肉地，加上頭先見過佢對長腿，嗯！身材，9分。


「小姐，扶住我，我同你慢慢行，休息室係前面好近㗎咋。」佢低住頭輕輕點咗一下。
「唔該晒你…呀！痛！」衰鬼，又叫得幾銷魂喎。聲音，8分。
暫時聲音畫面都冇問題，等我抽下水先！