短甜系列 - Summer Lover: #1

「喂靚妹! 返入嚟抖下先啦，鍾意同陽光玩遊戲都唔係玩成粒鐘架!」超哥對住望緊女…呀唔係…係盡責睇住泳客安全嘅我大叫。
「哦～ 嚟喇!」拍拍屁股上嘅沙粒，我乖乖咁返入休息室休息下。
「嗱，你哋亞嫂煲咗一大煲五花茶，雪凍咗架喇，一人一杯清咗佢。」超哥隊咗杯起晒霧面嘅凍飲俾我，又俾咗杯阿明。「嗱，明仔，呢杯就當阿叔歡迎你嘅！」
雖然超哥叫自己做阿叔，但其實佢一啲都唔老。可能因為長期暴曬，佢嘅皮膚又黑又乾，所以睇落比真實年齡老咗十年。皮膚問題，都可以話係做我哋做救生員嘅一個附帶條件。
不過講開又講，超哥同個老字都有啲關係。佢係呢個沙灘嘅老鬼，守咗呢個灘都五年有多，好德高望重架。佢最抵死就係搬埋嚟附近住，做埋街坊。所以好多時佢嘅任務，就係勸籲啲游早水嘅亞公亞婆要乖，同埋得閒同啲街坊吹下水。

「Sailor，你係出面都睇咗成粒鐘，唔辛苦咩？」新嚟嘅阿明似乎仲未好了解我嘅習慣同喜好。
「你駛同佢擔心？！靚妹出名捱得，最鍾意坐係出面同陽光玩遊戲，你唔叫佢，佢都唔捨得返嚟呀～尤其當出面有好嘢睇！」講完超哥仲好似好醒咁向我打個眼色，好似話I know you bro. 咁。
我只係笑一笑，拎起杯五花茶就隊。
「好嘢睇？！」well，我都預咗阿明呢啲懶醒嘅男仔跟住會講啲咩。「乜呢個灘好多型男架咩？」See！膚淺！


「我仲以為呢到出名嘅係Sailor添！」雖然講得好細聲，可惜都係俾我聽到。如果唔係帶住副超，阿明應該已經俾我銳利嘅目光啤死咗。
好衰唔衰超哥又嚟搭訕喎: 「呢到最出名係妹就真，呢兩年嘅暑假都唔知幾多人慕名而嚟，想見下我哋個靚女救生員。」
連路過嚟R水吹嘅蘭姐都搭咀:「係囉！都唔知幾多仔嚟扮浸親，以為妹會去救佢哋呀、人工呼吸呀咁，結果全部都係超哥搞掂，嚇到班靚仔死呀！」
「咁…鬼叫Sailor又靚又型咩～」阿明一路講一路面紅，唔係呀你？！「好少女仔唔怕曬黑，仲走嚟做救生員架。」
我都費事糾纏係呢啲對話到，重新紥好我條長馬尾，就同超哥示意，出咗去坐喇。

其實我真係可以一整日都坐喺度架。
我唔係懶唔肯郁，更加唔係屬於文靜個類嘅女仔。老實講呀，如果我係懶，我就唔會嚟搵part time做啦。又如果我係文靜個type，我一早去搵坐冷氣房嘅文職嚟做。
我肯坐係到唔怕辛苦，係因為呢到實在太吸引。



試想像下，有邊份兼職係可以俾到份算係咁嘅人工你之餘，工作量唔算太多，而工作環境更加係無敵呀？！
係！有時個太陽係毒啲，啲海水又會搞到我把長秀髮好乾，但係可以望住個藍天白雲同一望無際嘅大海，陣陣清涼又帶微咸嘅海風，加埋海浪聲同吵沙嘅樹葉聲，係咪好正先?
最最最正係咩？當然係有好多好嘢睇啦！
我講緊嘅唔係嗰班游早水嘅可愛公公婆婆，亦唔係個啲嘈到拆天嘅細路，更加唔係個啲自以為事、四肢發達又chok到爆嘅所謂型男，而係…

「喂靚妹，2點，橙黃色，8分！」超哥突然間坐係我隔離，無頭無尾咁彈咗句埋嚟。
我循住佢講嘅方向一望:「嘩！大佬，咁都有8分？佢個躉可以擺足兩圍喎！」
「但…但係佢上半身ok喎！」超哥似乎好想為自己嘅審美眼光而作出辯護。
「美人魚夠上半身ok啦，你唔叫亞嫂去搵條魚尾套上身？」Well～ Sorry，我就係咁咀賤架喇。
「唓！」超哥揚一揚手，好似想撥走腦海中嘅影像咁。「可惜佢宜家上半身都唔ok呢！」


我哋對望咗一秒，又好齊咁互叫一句「賤格!」。
「嗱！大佬，5點，淺藍色top白沙灘褲，身材均勻，夠pure，可惜妹咗啲，7分半。」我好快又發現新目標喇。呢條女，暫時係我今日嘅highlight。
無錯，型男真係唔係我杯茶，因為我係一個lesbian。唔好以為我外表咁女就一定係鍾意TB，我對個啲man啲打扮嘅TB，唔係好提得起興趣…得得意意好似好好蝦個啲小綿羊例外喎。
如果好似btf咁要俾個label自己，我應該算係…pure啩！

「喂喂～11點，粉紅bikini喎，嬌小型！靚妹，細細粒容易食呀，去馬啦！」超哥又好興奮咁叫我齊齊望女喇！
「師傅，呢期你好唔掂咩？幾時做埋扯皮條架你！？」
「無法，要儲錢買條鯨魚尾俾你亞嫂，要咁大先夠裝。」
「…超賤囉你！哈哈哈～」

See？！有靚景、有糧出、有嘢，仲有個咁好玩嘅大佬，呢份工去邊度搵？