［校園鬼故 X 陳生回歸 X 角色崩壞］無能子鋒與無能鬼: （二十八）搜尋德叔
「你女朋友依家喺教堂嗰邊，同神父一齊禱告緊。」天命叔想了想後才回答我。
「教堂？點解佢唔同我哋一齊去呀？隻嘢會唔會乘機襲擊佢㗎？」我緊張地問。
「首先，小詠已經占卜咗隻嘢出現嘅地方，佢跟過嚟盞仲危險。第二，其實……」天命叔欲言又止，害我更加緊張。
「其實咩呀？你唔好講講下停咗先得㗎。」我緊張地追問。
「其實你同佢都分開咗，佢已經唔算係你『身邊嘅人』，所以師叔先判斷阿奶唔駛跟過嚟。」炎冰在一旁解釋。
「原……原來係噉……」對啊，我已忘了我跟阿奶的關係已經結束了，不，那只是我不想承認罷了。
「子鋒，唔好諗咁多啦，阿奶嗰邊之後再同佢解釋啦。盡快完咗件事，再搵返阿奶啦。」阿詩在一旁安慰我。
我聽著也認為頗有道理，畢竟這情況下把阿奶再一次牽扯進來，也不見得是好事。
「我明啦……好，快快趣趣搵返德叔，我一定要盡快搞掂呢件事！」感覺燃燒起來的我，一個箭步離開了道壇，炎冰則跟隨其後。
我和炎冰離開後，阿詩忍不住開口。
「天命叔，唔同子鋒講阿奶個情況，噉樣……真係好咩？」阿詩不安地問。
「新抱仔，個細路好唔容易先振作，依家同佢講盞影響到佢。而且，佢女朋友嘅情況暫時都可以控制到，只要隻嘢嘅力量唔再增加，佢應該唔會有事。」
「但……但萬一阿奶好似德叔噉……」
「放心，佢只係受咗少少嘅邪氣入侵，唔會有事嘅。只要佢每日過去教堂，就會慢慢無事。」天命叔肯定地說。
「最衰都係我，如果阿奶唔係為咗幫我，就唔會搞到噉。」阿詩自責地說。
「新抱仔你唔好噉諗，其實依家嘅情況係最好。你諗下，如果子鋒知你無喺度出現，佢唔會咁輕易相信，到時佢知道你因為佢而受傷，盞佢又一次變到無晒精神。依家嘅情況，暫時可以呃到佢，我哋只要盡快搞掂件事，子鋒就唔會察覺到佢女朋友嘅事。」
阿詩點了點頭，表示理解，隨後兩人便離開道壇，向將軍澳方向出發。
就在兩人向將軍澳出發時，我亦和炎冰一起來到觀塘。
「子鋒，你唔好咁心急啦！」炎冰喘著氣說。
「呢啲嘢，邊有得唔急㗎！」我也喘著氣。
「你咁急，會整親㗎！呀......」炎冰說話時，不自覺的喊了聲痛。
「對......對唔住，你無事呀嘛？」我關心地問她。
各位對以上的對話別存有任何暇想，事實只是因為我希望快點到達學校，於是便以飛快的腳步爬上了一條直達學校的長樓梯。
而炎冰為了不讓我單獨行動，只好緊緊地在我背後追趕著。
走到一半時，炎冰不慎跌到，我回頭察看她的情況，幸好她反應夠快，並沒有弄傷。
炎冰看我走到她的身旁，冷不防的把我拉著。
「坐低啦你，咁鬼快陣間整親點算？到時咪盞更加搞唔掂。」
「咩......咩啫，我都係諗住快啲搵返德叔啫。」我坐在她旁邊，隨口回應。
「你扮咩嘢呀，一睇就知你緊張啦。我明你之前頹咗咁耐，一定想快快趣趣搞掂晒啲嘢，但係你噉樣勉強自己，對件事無幫助㗎喎。」炎冰平靜地對我說，好像把我整個人都看穿了似的。
「我無勉強自己，只係一諗起之前自己頹廢嗰個樣，又諗起德叔同我講嘅嘢，我就不自覺噉心急起嚟。」說著，我又站了起來，準備繼續向學校出發。
炎冰看到我這樣，也沒有再說甚麼，只是默默跟在我身後。
而我亦稍為調整了自己的步伐，始終我不是一個人在行動，還是要顧及炎冰的情況才對。
來到學校門前，那緊閉的閘門把我們擋著。
雖然應該有保安在看守，但看來暫時沒有人在大門附近。
「無人喎，我哋爬入去啦。」我視察了數遍也沒有看到任何人，決定爬進去看看情況。
「你冷靜啲先！你噉樣爬入去唔畀人當賊就奇啦！等到啲保安返嚟，你再同佢哋講係呢度學生啦。」炎冰看到我準備爬進去，馬上阻止了我。
「仲等？啲保安都唔知去咗邊，等得嚟我都入咗去查完啦。」我略帶不滿地說。
「你係咪想畀人報警拉去差館呀！陣間入到去解釋完可能要聽日先畀你走，噉唔駛搵德叔啦。」炎冰在一旁沒好氣地提醒我。
「噉......噉等囉。」的確，炎冰的說話不無道理，但我實在不想就這樣等著，故不耐煩地在大閘前來回踱步著。
「唉，你咪行嚟行去啦！一係噉啦，我哋去咗安老院同公園先啦，反正我喺呢度感覺唔到啲咩邪力。」
炎冰的說話真是「一言驚醒洛克人」，我怎麼就沒有想到可以先到其他地方調查呢。
「噉我哋快啲去啦！不過，安老院嗰邊......我哋點入去？」我想到安老院也不是一個可以隨意進入的地方，一時間顯得有點慌亂。
「你冷靜啲先，呢層你唔駛擔心，安老院嗰邊我一早已經聯絡好啦。」炎冰用手勢示意我冷靜下來。
「吓？你幾時……」我可看不到她跟安老院聯絡啊。
「我今朝已經聯絡過啦，你估上次真係即興叫你去幫手咩。人哋安老院有規有距，唔係一早聯絡定根本唔會畀你呢啲陌生人入去。嚟啦，我哋慢慢行過去啦。」炎冰站了起來，便以正常的步伐前進了。
來到安老院，跟職員和院長打了招呼後，我和炎冰便開始靜靜地在安老院裡搜尋著德叔的身影。
「喂，我哋差唔多行咗一半啦喎，好似都無咩發現，會唔會唔喺呢度呀？」
「我唔知你記唔記得啦，之前我都有提過，呢隻嘢嘅氣息時有時無，依家佢上埋德叔身，我已經無辨法感受到佢嘅氣息，所以只能夠慢慢搵。不過，佢喺安老院嘅機會都大，始終呢度老人家多，佢要匿埋嘅話，呢個應該係唔錯嘅地方。」
就在我和炎冰討論期間，在樓梯位置，有一個身影瞬速從我們的視線範圍裡逃走。
而在那身影移動的瞬間，剛好被我發現了。
「炎冰，前面！」我沒有解釋太多，便拉著炎冰追了上去。