［校園鬼故 X 陳生回歸 X 角色崩壞］無能子鋒與無能鬼: （二十九）小鬼來襲
來到樓梯前，那神秘的身影早已不見了。
「我哋分兩邊追！」這樣提議的我，已準備跑向上方，卻被炎冰一下子拉住了。
「唔得，呢個情況我唔可以離開你身邊！」的確，沒有靈力的我，即使追上了也不見得有甚麼作用。
「噉點呀？再唔追佢就真係走甩㗎啦。」我緊張地說。
「我哋一齊向下面追，去到入口嘅時候，我哋問返職員有無人走咗，有嘅話我哋再追出去。如果無，即係佢仲喺安老院入面，到時我哋逐層前後包抄，應該會逼到佢出嚟！」炎冰這樣提議。
的確，這樣的做法比我盲目追上去更為理想。
決定好後，我倆回到大堂入口處，只見在大門前已擠滿了院友。
我和炎冰還沒有弄清楚狀況，便已聽到那些院友在叫囂了。
「我唔見咗本書呀！」
「我唔見咗孫仔送畀我個杯呀！」
「我唔見咗孫女畀我條手巾仔呀！」
老人的叫囂聲此起彼落，內容全和遺失東西有關。
「大家冷靜啲先，我明白大家唔見咗親人畀嘅嘢係會好擔心，但頭先嘅嘢入面，都無一啲好值錢嘅嘢，我諗拎呢啲嘢嗰個人並唔係為錢。同埋，嗰個人如果拎住噉多嘢走，我哋職員一定留意到，但啱啱職員已經講咗，無見到可疑人物離開，所以，我相信大家唔見嘅嘢應該仲喺安老院入面嘅。大家唔好亂，過嚟呢邊登記返有啲咩失物，我哋職員會盡快處理。」
院長看到這樣混亂的場面，馬上站了出來。
在院長把話說明後，雖然場面仍然混亂，但明顯比剛才要平靜了不少。
「搞錯呀，無啦啦唔見嘢都有！」
「都唔知係咪啲職員偷嘅！」
「搵唔搵得返㗎，個杯我個孫送㗎！」
在一片混亂的叫囂聲中，我被一把聲音吸引了。
那把聲音一瞬即逝，雖然只有約一秒鐘，但我肯定，那是德叔的聲音！
「德叔！」我馬上踏到聲音的來源處，但卻不見其踪影。
「子鋒，做咩呀？」炎冰對我的舉動感到奇怪。
「我啱啱聽到德叔把聲，但我過到嚟又唔見佢！」我緊張地四處張望。
「頭先咁嘈，會唔會係你聽錯呀？」炎冰雖然有所懷疑，但也積極地搜尋德叔的身影。
「唔會，我好肯定係德叔把聲！」我一下子否定了她對我的猜疑。
就在我跟炎冰在人群裡搜尋著時，突然有人大喊。
「喂，搵到啦，你哋啲嘢喺康樂室呀！」
就因為這一句說話，原本聚集在入口處的人，都紛紛向康樂室走去。
我和炎冰亦因為混雜在人群中，被逼一同前往康樂室。
然後，在康樂室裡真的發現了那些不見了的物品。
只見在康樂室的一個不起眼的角落，那些物品被一個紅白藍袋盛載著，看來是甚麼人這樣安排的。
但院友們倒不太關心背後是否有任何預謀，他們只是紛紛想取回那些物品，亦因為這樣，又引發了另一場混亂。
「大家冷靜啲先，既然啲嘢都搵返，大家一個一個排好隊，我哋職員會幫手分返畀大家。」
在院長和職員的帶領下，院友們有規距地等著領回他們的物品。
而我和炎冰則在康樂室內外都巡視了一遍，但也沒有發現任何奇怪的人。
「唔好意思呀，估唔到安老院會發生呢啲事，畀你見到呢啲醜態添。」情況平靜下來後，院長慢慢走到我們身旁。
「我哋講唔好意思就真啦，突然間要求過嚟。」炎冰笑著回答。
「唔會，係呢，你哋搵到啲資料未呀？」看來炎冰沒有對院長說出實情。
「仲未搵到，不過唔緊要啦，我諗啲資料可能漏咗喺其他地方啫。」
「如果你哋有需要就再同我講啦，我都要出返去櫃枱先，無人喺度始終唔係咁好。」
院長的話刺激了我們兩人，我和炎冰互望一眼後，心裡同時想著：「弊，中計！」
「今日麻煩晒你啦院長，我諗我哋知啲資料放咗喺邊啦！」
炎冰說話同時，我已急不及待離開了安老院。
然後，在對面行人路上，我看到一個疑似德叔的身影，正慢慢向公園方向前進。
「子鋒！點呀？」
「喺嗰邊！」我指向公園方向，而那疑似德叔的身影，此刻竟轉過頭來看著我們。
「真係佢！追！」炎冰和我馬上往公園方向跑，來到交通燈前，德叔的身影已經消失了。
「去咗邊？」我和炎冰四處觀察，只見德叔竟站在康寧道遊樂場前，正面的看著我們。
「睇嚟佢想引我哋過去。」炎冰看著我。
「就算係都無辨法，我哋都要追過去。」我肯定地說。
在別無選擇下，我和炎冰便來到了公園前，當然，德叔的身影早已消失無踪。
我一個箭步踏進了公園內，卻感到了一陣強烈的違和感，我回頭一看，卻看不見炎冰，我馬上發現，自己應該被引誘進了另一個空間裡。
然後，我感到一陣寒意從我背後油然而生，回過頭來，只見為數不少的靈體正把我包圍，卻不見德叔的蹤影。
而那些靈體知道我發現了他們後，便開始慢慢向我逼近。
要是我仍有靈力，這些低級靈體根本不屑一看，但現在，看來我只能跟他們來一場追逐戰，直到炎冰把我從這個空間拯救出來。
但我心裡卻有種不好的預感，那靈體的目標應該是我才對，那麼，為甚麼我在這裡看不到德叔呢？
「子鋒，等陣！」炎冰看見我衝進公園，還來不及提醒我，我已經在她面前消失了。
「可惡！」炎冰感到我闖進了另一個空間後，一陣莫名的怒意從心底冒起。
她馬上雙指作劍，運起劍指，準備把我從那空間裡拖出來。
就在劍指在空中舞動之際，她身旁突然冒出了數十隻靈體向她襲來。
「區區小鬼都夠膽阻我？」炎冰怒意正盛，這些靈體正好成為她發洩的對像。
雖然每隻靈體的力量都不強，但他們好像受到甚麼人操控一樣，成功地拖延了炎冰的步伐。
「奇怪，點解佢哋只係不斷纏繞我，而唔係攻擊我……唔通……」
炎冰到底察覺了甚麼呢？