［校園鬼故 X 陳生回歸 X 角色崩壞］無能子鋒與無能鬼: （二十七）鎖定地點
翌日醒來，左臂痛得像要斷掉似的。
我稍為檢查了一下左臂，發現好像有點腫起來了。
我嘗試挪動左臂，基本的動作看起來是沒有問題，但只要稍為用力，便會傳來一陣劇痛，看來必需要去看一下醫生了。
「哇，子鋒你搞咩呀？」炎冰打開大門，看見我站在門外，視線則被我左臂吸引著，只因我整隻左臂包得像木乃伊一樣。
「搞咩？去咗睇醫生囉。噚晚被隻嘢整到成個人跌落地，今朝起身隻左手好似廢咗噉，我梗係第一時間去睇醫生啦。」
「有無咁誇張呀？跌親下啫。」炎冰不以為意地說，好像認為我在小題大造似的。
「咩誇張呀，今朝起身隻手郁下都痛呀！講起依家都有啲痛。」我裝作痛苦狀。
「你兩個唔好企喺門口啦，入嚟啦！」天命叔的聲音傳來。
聽到天命的說話，我慢慢走進了道堂。
甫進到屋內，一種熟悉的感覺油然而生，四周的擺設也沒有任何改變。
雖然只是數月沒有來過這裡，但我卻感到好像跟闊別多年的老朋友再次碰面一樣，心情有點激動起來。
正當我四處張望，心裡滿是懷念之情時，卻發現熟悉的道堂裡，竟缺少了一樣東西。
「子鋒你搞咩呀？四圍望完之後個樣咁驚訝嘅？呢度應該無變先啱㗎。」炎冰看著一臉疑惑的我這樣說。
「唔……唔係喎，點解小詠個神主牌唔見咗嘅？」我指著前方，驚訝地問。
天命叔和炎冰聽到後，兩人對望了一眼，然後把視線望向阿詩。
「哦，小詠個神主牌有啲裂痕，所以暫時拎走咗，等新嘅神主牌整好之後，先會擺返落嚟。」阿詩平靜地說。
我沒有注意到天命叔和炎冰的小動作，而阿詩的說話聽起來亦沒有不妥，所以我也沒有再深究下去。
天命叔看到我沒有再追問下去，亦暗地鬆了口氣。
「噉小詠唔喺度，我哋邊個去卜卦查出德叔下落呀？」比起小詠，德叔這邊更令我放心不下。
「你放心啦，小詠一早已經卜好，之所以要叫你哋嚟呢度集合，係因為卦文出現咗兩個地方。」天命叔拿出一張餐桌般大小的地圖來。
「噉係邊兩個地方呀？」我緊張地問。
「第一個地方，係你間中學！」天命叔指著地圖上觀塘區的位置。
「我間學校？」
「無錯，準備啲講，係呢一個大圓形範圍。鎖定嘅地方有學校、安老院同埋公園。我估計隻嘢為咗完全控制德叔，所以操控德叔嘅身體四圍行，加快散走體內嘅陽氣，等佢可以完全噉操控德叔。」
「噉第二個地方呢？」我追問。
「第二個地方，就係新抱仔嘅屋企。暫時鎖定嘅地方係新抱仔嘅屋企、商場同埋醫院。」
「吓？點解阿詩屋企都會變成目標？」我難掩驚訝之情。
「之前隻嘢襲擊你身邊嘅人，成功嘅目標只有德叔，所以再襲擊新抱仔一啲都唔出奇。始終，人質嘅嘢，愈多愈好。」
我聽到這番說話，一臉不安地看著阿詩，臉上盡是抱歉的神情。
「唔駛擔心我喎，天命叔會保護我㗎嘛。」阿詩笑著對我說，感覺沒有任何害怕的情緒。
「嗯……係嘅，應該無事嘅……」雖然阿詩這樣說，但我還是放心不下，畢竟是我把她牽扯進這次事件的。
「細路你唔駛擔心啦，個個出晒事都好，有我喺度，新抱仔一定唔會有事，你擔心自己好過啦。」
「哼，你淨係掛住幫阿詩！不過算啦，有人保護阿詩都係好事，既然有兩個地方，我哋去邊個地方先？」
「無時間一齊行動啦，我哋分開兩邊，我同新抱仔會先去佢屋企，之後再去附近商場同醫院搜尋。至於你，就同炎冰兩個人返去你間中學附近，總之要盡快搵到德叔！」
「分開行動？噉得唔得㗎？你依家又受咗傷，炎冰噚晚又虛耗咗咁多靈力，會唔會有危險㗎？」想起了昨天晚上的情形，我真害怕會出甚麼意外。
「你少同我擔心，我受咗傷都仲可以一個打十個！同埋，隻嘢依家操控緊德叔，換句話講係肉身狀態。發現佢嘅話，炎冰一個人都應付得嚟。」
「如果隻嘢放棄咗德叔肉身呢？」
「噉仲好，如果佢真係放棄咗德叔嘅肉身，救德叔嘅目的已經達到，你哋唯一要做嘅嘢就係逃走！跟住通知我，我就會嚟會合你哋，一齊對付佢。逃走嘅方法我教咗炎冰，唔駛擔心。」
我點頭表示理解，希望能盡快解救德叔。
「出發之前提你哋少少嘢，尤其係子鋒，你一定要記實。第一：如果到時有任何危險，首要做嘅嘢係逃走，千祈唔好勉強，因為隻嘢最終目標，都係子鋒！第二：如果去到夜晚六點四十四分都未搵到德叔，一定要盡快離開，呢條死線一定要遵守！」
「即係點呀？如果六點四十四分搵唔到，就要由德叔去死呀？」我實在不能接受。
「唔係由佢去死，而係就算搵到德叔，都已經救唔到佢。到時候佢完全操控咗德叔，最後受傷嘅，只會係你自己！」
「無錯呀子鋒，你聽師叔講啦。」
「但係……」說實話，我實在不想再因為我而失去任何人。
「子鋒，你冷靜啲先，其實只要喺六點四十四分之前搵到德叔，所有嘅嘢都唔係問題。」阿詩一矢中的，說出了重點。
「無錯，準備好我哋就出發啦！」天命叔說。
「等陣！出發之前我想問，阿奶呢？」
既然目標是我身邊的人，而阿奶昨夜亦成為了目標之一，她不在這裡實在是有點不自然，到底她去在哪裡呢？